Read MAASAI REVISED PROTESTANT Enkigilata oo Nkitanapat 31 Bible Online

Enkigilata oo Nkitanapat 31 - MAASAI REVISED PROTESTANT bible

Enkigilata oo Nkitanapat 31

¹Nelo Musa dukuya airorie Israel pooki kulo rorei,

²Nejoki ninye ninche, “Kara taata nanu oloo larin iip o tikitam ena olong; meekure aidim atorikoi intae. Aatiaka nanu Olaitoriani, ‘Milo iyie alang ele keju le Yordan.’

³Olaitoriani Enkai ino makewan likilo arikoo; kelo ninye aidaikie kulo oshon ootii dukuya iyie pee itum aiwuang'ie ninche, nelo Yoshua arikoo intae te dukuya, anaa enatejo Olaitoriani.

⁴Naa keitaas Olaitoriani ninche anaa enaitaasa Sihon o Oog, lelo aiguanak le Amori o enkop enye, ina kata apa pee eidaikie ninche.

⁵Naa keishoru Olaitoriani ninche aisho intae, nipuopuo intae aaitaas ninche te risioroto ena kitanapata pooki naitanap nanu intae.

⁶Entagoluoto nintagololo oishuaa, miureishoyuyu nimimputukunyunyu te nkaraki ninche, amu Olaitoriani Enkai ino ilo olo te dukuya iyie; mikintiak ninye nimiking'uaa.”

⁷Neipotu Musa Yoshua, nejoki ninye te dukuya Israel pooki, “Tonyua nintagol oshoke; amu ilo iyie o ele orere atua ina kop apa nainosie Olaitoriani olmumai too loo menye pee eisho ninche; naa iyie olo aisho ninche.

⁸Olaitoriani ninye olo te dukuya iyie; keaku ninye tenebo iyie; mikintiak ninye aashu king'uaa; miureishoyu nimishalu.”

⁹Neiger Musa ena kitanapata neisho ilapolosak lelo ayiok loo Lawi, apa ootanapa osanduku lo sotua lo Laitoriani, o lpayiani pooki le Israel.

¹⁰Neitanap Musa ninche ajoki, “Ore ake te nkiting'oto oo pooki arin oopishana, teina kata nategeluaki pee epalakinoi isilen, to sirua loo lng'oborri,

¹¹ina kata epuonu Israel pooki aalioyu te dukuya Olaitoriani Enkai ino, teine wueji negelu ninye, nilo aisum ena kitanapata te dukuya Israel pooki metoning'o.

¹²Nturrurro iltung'ana ilewa o nkituaak o elelero, oilo tung'ani omoni otii atua inkang'itie inyi, pee etum ninche aatayiolo neureyu Olaitoriani Enkai, neing'or pee eas lelo rorei pooki loo nkitanapat,

¹³paa ore nena kera enye nemeyiolo ena kitanapata, netum aatoning, neyiolou aatureita Olaitoriani Enkai, te nkata naba anaa eninchu teinakop nilo alang'aki te lido kekun le Yordan alo aya.”

¹⁴Nejoki Olaitoriani Musa, “Etinyikutua inkolong'i pee iye iyie; mpotu Yoshua, nipuonunu atua ilo ng'obor le ntumo, pee atum aitanapa ninye.”

¹⁵Neipang'aki Olaitoriani Musa o Yoshua ti atua ilo ng'obor te ng'ape e nkatampoi, ore ina ng'ape e nkatampoi neitashe te mbata e kutukaji eilo ng'obor.

¹⁶Nejoki Olaitoriani Musa, “Etataana enkata niye iyie, nirura tenebo iloo papaai linyi; naa kedumunye ele orere te nkiborra oo nkonyek nesuj kulie aitin ng'ejuko ena kop napuo ninche aashulare ninche, naa kaapuo ninche aaing'uaa nanu negil ilo ning'o lai lo sotua apa laitobira o ninche.

¹⁷Netum taa engoro ai ayupuyupo tialo ninche teina olong, naing'uaa nanu ninche naisudoo enkomom ai teine, nemuti ninche; nepuonu ntorrok kumok o nyamalaritin shumata ninche, ometaa kejo ninche teina olong, ‘Aimeetuo kuna torrok shumata iyiook te nkaraki nemetii Enkai ang atua iyiook?’

¹⁸Naa kaisudoo nanu enkomom ai katukul ina olong te nkaraki ina torroni nataasa ninche, amu eibelekenyakinote ninche kulie aitin.

¹⁹Ore naa taata ngero ele sinkolio, ninteng'en ninye iltung'ana le Israel; tipika ninye atua nkutukie enye, pee etum ele sinkolio ataa shakeni te nanu tialo iltung'ana le Israel.

²⁰Amu ore aidipa nanu ayau ninche atua ina kop naruko naishi o kule, apa nainosie olmumai pee aisho loo menye, netadaate ninche neraposho nepiru, naa keibelekenyakino ninche kulie aitin neisiaai ninche, naamenaa ninche nanu negil olning'o lai.

²¹Naa tenelo kenya nepuonu ntorrok kumok o nyamalaritin shumata ninche, nerany ninche ele sinkolio metaa shakeni (amu merikinisho ilo sinkolio too nkutukie oo nkera enye); amu kayiolo nanu nena kipirakinot naaitobirita ninche, apa eton eitu ayau ninche atua ina kop apa nainosie olmumai pee aisho ninche.”

²²Neaku eigero apa Musa ilo sinkolio ina olong ake, neiteng'en ninye iltung'ana le Israel.

²³Neitanap Olaitoriani Yoshua olayioni le Nuni nejoki, “Tonyuaa nintagol oshoke; amu eilo iyie ayau inkera oo Siraeli atua ina kop apa nainosie olmumai pee aisho ninche. Kaaku nanu tenebo iyie.”

²⁴Ore ake pee eidip Musa aigero irorei lena kitanapata tiatua embuku, omeitabaiki enkiting'oto,

²⁵neitanap Musa lelo tung'ana loo Lawi apa oonap osanduku lo sotua lo Laitoriani ejoki,

²⁶“Ewaita ena buku oo nkitanapat, nipikipiki embata eilo sanduku lo sotua lo Laitoriani Enkai inyi, pee etum ninye ataa teine shakenisho tialo intae.

²⁷Amu kayiolo nanu enkiseroto o engolon enkong'u inyi; ng'ura ena olong ajo itogolong'akita intae Olaitoriani; kebaa naa kenya engolong'akinoto te siadi keeya ai!

²⁸Enturrurrokoki nanu ilpayiani pooki loo loshon linyi o larikok linyi pee atumoki airoro kulo rorei too nkiyiaa enye naipotu shumata o enkop meishakenoki ninche.

²⁹Amu kayiolo nanu ajo ore te siadi keeya aimeeta nchere miasiasa entorroni, nimbelekenyanya aapaash ina oitoi apa naitanapa nanu intae; naa ore too nkolong'i naapuonu nejing intae entorroni, te nkaraki naa iyiookiki intae aas entorroni te dukuya Olaitoriani, aaitagor ninye tialo esiaai oo nkaik inyi.”

³⁰Neitoki taa Musa airo irorei leilo sinkolio ometaba anaa nening ina umata pooki e Israel.