Read MAASAI REVISED PROTESTANT Enkigilata oo Nkitanapat 32 Bible Online

Enkigilata oo Nkitanapat 32 - MAASAI REVISED PROTESTANT bible

Enkigilata oo Nkitanapat 32

¹“Toning'o iyie shumata, amu kairo nanu; nchoo enkop ening irorei le nkutuk ai.

²Metadou nkiteng'enat aainei edou anaa enchan. Nchoo enkiroroto ai etiu anaa enkoileelio, anaa enchan nashaiki inkujit naanyori, o anaa enkirujuruj nashaiki mbenek.

³Amu kaibalunye nanu enkarna o Laitoriani. Enchoo enkitoo Enkai ang!

⁴“Endapidapoi ninye, nelulung'a esiaai enye amu kesipa nkoitoi pooki enyena. Enkai naisiligayu nemeeta entioto, Kesipa neitoriori ninye.

⁵Etaasa ninche entorroni tialo ninye, meekure ninche aa nkera enyena te nkaraki olminong lenye; eishoi ninche nagolong'u netapong'ori ninche.

⁶Kena intae ilaakiki Olaitoriani, loorere omoda lemedamisho? Aime papaai linyi, ninye ilo oitobira intae, laa ninye oitobirua intae neitubul intae?

⁷Tadamu nkolong'i e apa, tadamu ilarin loo ishoritin kumok; nkilikuana papaai lino, amu aikintodol, ninkilikuan ilpayiani linyi, amu aikiliki ninche iyie.

⁸Ore apa pee eisho ilo otii shumata aisul iloshon njung'oritin enye, ore apa pee eorrior iltung'ana, nepik ninye ilpolosien loo loreren te risioroto esiana oo nkera e Nkai.

⁹Amu ore erubata o Laitoriani naa iltung'ana lenyena Yakobo ninye erubata enye najung.

¹⁰“Enoto apa ninye ninche to lpurkel ti ong'ata te nkop natoyio; neman ninye, neing'or ninye, negolie ninye anaa esoit enkong'u enye.

¹¹Anaa olkurragos oitobir enkaji enye, negolie nkera enyena, nelak inaipuko enyena aibung ninche, too naipuko enyena.

¹²Olaitoriani apa otorikoyie ninye openy, nemeetae apa ae ai omoni tenebo ninye.

¹³Neisho Olaitoriani ninye meima iwuejitin neeika e nkop, nenya ninche ilng'anayio le nkop neisho ninye meibibiu olkenkei te ndapidapoi o eilata te ndapidapoi.

¹⁴Ing'orno oo nkishu o kule oo ntare, tenebo iila oo lkuo le kerra o lmeregeshi, iluat oo nchoo e Bashan o nkineji, o enkano sidai aisul. Ore to sarge loo sabibu niokioko enaisho.

¹⁵“Kake etopiro Yeshurun, neroisho too nkejek; itopiro iyie nisapuku, nisipayu; neitoki ninye aing'uaa Enkai naa ninye naitobirua ninye, nesukeny endapidapoi e njeunoto enye.

¹⁶Nedumaki ninche ninye olom te kulie aitin. Ore too mbaa bususi neitagor ninche ninye.

¹⁷Nepolosaki ninche iloiriruani, leme nkaitin, nena aitin neitu aekata eyiolou ninche nena aitin naaetuo det, neitu aekata ninye eidetidetu loo papaai linyi.

¹⁸Neitu ishilaa ina dapidapoi natoiwuo intae nerikino intae ina Ai natoiwuo intae.

¹⁹“Etoduaa Olaitoriani ina neiturraa ninche, te nkaraki ina naitagoro ninye ilayiok lenyena o ntoyie enyena.

²⁰Nejo ninye, ‘Kaisudoo nanu enkomom ai te ninche, pee adol enebaya ninche amu eishoi marmali ninche, inkera nemeisiligayu.

²¹Aatudumakita ninche olom teina neme enkai, aaitagoro ninche nanu too nkitanyaanyukot enye. Neaku kadumaki nanu ninche olom te lelo leme iltung'ana, kaitagor nanu ninche teilo osho omoda.

²²Amu eyupuyupieki enkima te ngoro ai, naa keyupuyup ometabaiki enguton e nemeneng'a, nemut enkop o nena naabulu neinok too lbakunot loo ldoinyo.

²³“ ‘Nasotoki nanu intorrok shumata ninche nang'orie nanu ninche mbaa aainei o maishaki.

²⁴Kemenayu ninche to lameyu, nemut ninche enkolong napejisho, o nkeeyaitin torrok, nairriwaki nanu ninche ilala loo lowuarak meinosa ninche.

²⁵Ore te wueji neisiasha near ninche olalem, ore tiatua aji neidaaya ilbarnot o selenken, enkerai nanakita tenebo olmoruo oibor elukunya.

²⁶Anaata naaji atejo: Kaidapash ninche meshomo oleng, kaisho nanu ninche metaa meitokini aadamu tiatua iltung'ana.

²⁷Teneme naaji ilmang'ati lenye medamu ake embae nemesipa pee melo ake nejo: Enkaina ang natimirishe, mme Olaitoriani oyaua ena pooki.’

²⁸“Amu olosho ninche lemeeta kiguana nemetii eyiolounoto atua ninche.

²⁹Tenaa aing'eni apa ninche, anaata etayioloito ena, anaata etumusutuo enkiting'oto enye!

³⁰Kaji eiko oltung'ani obo tenemir enkalifu, naa kaji eiko oaare tenedumu nkalifuni tomon mekueta, teneme Endapidapoi enye natimira ninche, netapalayie ninche Olaitoriani?

³¹Amu metiu Endapidapoi enye anaa Endapidapoi ang, keishakenoki doi ninye ilmang'ati lang ina.

³²Amu ore eishoi enye naa osabibu le Sodom epukunye, o nkurman e Gomora; ore isabibu lenye naa isabibu le sayiet, ore inkimarrimarrat enye naa kedua.

³³Ore enaisho enye oo sabibu naa esayiet oo lasuriaa, esayiet torrono e nturbubua.

³⁴“Keitu eshumi kuna te nkaraki nanu, nemishirakini olchumati lai?

³⁵Enaai elap naa kaitalaku, teneideketari nkejek enye amu etataana enkolong enkidaata enye; naa kelotu keeya enye asioki.

³⁶Amu keilepunye Olaitoriani iltung'ana lenyena neing'urrie isinkan lenyena, tenedol ninye ajo eishunye engolon enye, neitu elakuni hoo obo, oloena aashu ololakuno.

³⁷Paa keitoki taa ajo, ‘Koree nkaitin enye, ina dapidapoi nashomo ninche aasaru.

³⁸Ina nainosa ineepir oo lasarri lenye neok enaisho oo lasarri lenye ooki? Nchoo ninche edumunye pee kiretu iyie, nchoo ninche mikitomitu iyie!

³⁹“ ‘Toduaa naa taata nchere, nanu, ee nanu, ninye ilo nemeetae ae ai napudare, kaar nanu matua naitopiu; kapik nanu olbae naishiunye; nemeetae hoo ng'ae oidim atokordu te nkaina ai.

⁴⁰Amu kadumu nanu enkarna ai aitabaiki keper, nanya olmumai, anaa enaishu nanu ntarasi.

⁴¹Tenaii nanu olalem lai neibung enkaina ai enkiguana naitalaku nanu too lmang'ati laainei, naitalaku nanu te lelo laaiba nanu.

⁴²Kaitemer nanu mbaa aainei to sarge nemut olalem lai ninche tenebo lelo ootaraki o looena, te nena lukuny oo lpapit adoru oo lmang'ati.’

⁴³“Esisa iltung'ana lo Laitoriani, lo oreren amu keitalaku ninye osarge loo sinkan lenyena, neitalaku elap too lmang'ati lenyena neitobir olkipoket te nkop oo ltung'ana lenyena.”

⁴⁴Nelotu Musa airo kulo rorei pooki lele sinkolio aitoning iltung'ana, ninye o Yoshua olayioni le Nuni.

⁴⁵Ore ake pee eidip Musa airoro kulo rorei pooki te Israel pooki,

⁴⁶nejoki ninye ninche, “Embung'a too ltauja kulo rorei laliki intae ena olong, pee itumutumu aaitanapa ninche inkera inyi, pee etum ninche aaing'ura neas irorei pooki lena kitanapata.

⁴⁷Amu mme rorei le pesho kulo te intae, kake enkishui inyi, ore te nkaraki ina, ipuopuo aabikoo teinakop nilang'akiki te lido kekun le Yordan nipuopuo aaya.”

⁴⁸Nejoki Olaitoriani Musa ina kata,

⁴⁹“Takedo ele doinyo le Abarim, oldoinyo le Nebo, otii enkop e Moab, oipirakinore Yeriko; ning'or ina kop e Kanaan naisho nanu iltung'ana le Israel meitaa enenye;

⁵⁰ilo iyie aye teilo doinyo liked enchumata, nikinturrurrokini iltung'ana linono, anaa apa enatua Aron o lalashe lino to ldoinyo le Hori neiturrurrokini iltung'ana lenyena:

⁵¹te nkaraki apa neitu intae kirukuruku nanu tiatua iltung'ana le Israel too nkariak e Moribat-Kardesh, to lpurkel le Sin; te nkaraki neitu intae kiyanyitutu aaitaa sinyati te mpolos oo ltung'ana le Israel.

⁵²Amu idol iyie ina kop te dukuya iyie kake milo iyie ajing atua ina kop naishoo nanu iltung'ana le Israel.”