Read MAASAI REVISED PROTESTANT Enkigilata oo Nkitanapat 4 Bible Online

Enkigilata oo Nkitanapat 4 - MAASAI REVISED PROTESTANT bible

Enkigilata oo Nkitanapat 4

¹“Ore naa taata iyie, Israel, toning'o nkitanapat o kuna kikoot naiteng'en nanu intae, niasiasa ninche, pee itumutumu aatopok nipuopuo aaya ina kop naisho intae Olaitoriani Enkai oo loo papaai linyi.

²“Miponaa ororei teina kitanapata naishoo nanu intae, nimiwuang'ieng'ie; pee itumutumu aaibung'a nena kitanapat o Laitoriani Enkai inyi naitanapa nanu intae.

³Etoduaa inkonyek inyi ina nataasa Olaitoriani te Baal-peor; amu eidaikie Olaitoriani Enkai inyi aishie tiatua intae lelo tung'ana pooki ootusujaitie ina kitanyaanyukoto e nkai e Peor.

⁴Kake ore intae ooibung'a aakurraki inkitanapat o Laitoriani Enkai inyi, ninchushu pooki ena olong.

⁵Aiteng'ena nanu intae nkikoot, anaa enaaitanapa Olaitoriani Enkai ai, nchere pee ipuopuo aas teinakop nipuopuo aaya.

⁶Embung'a ninche niasiasa; amu kelo ina aaku eng'eno inyi o eyiolounoto inyi te dukuya iltung'ana, laa, tenening ninche kuna kikoot pooki, nejo, ‘Kesipa ore ele osho kitok naa oloo ltung'ana ng'eni.’

⁷Amu kalo osho kitok oata enkai nataaniki anaa enataana Olaitoriani Enkai ang te iyiook, enkata pooki naba anaa enikimpot ninye?

⁸Naa kalo likae osho kitok oata inkikoot o nkiguanat naasipa anaa ena kitanapata nairragie nanu te dukuya intae ena olong?

⁹“Tagolie ake kewan, ning'or oltau lino oleng, pee mikirikino ake nena tokitin naatoduaa nkonyek inono, pee milo alamari to ltau lino too nkolong'i pooki e nkishui ino. Ntayiolo ninche inkera inono o nkera oo nkera inono

¹⁰eninkuna apa ina olong pee intashe te dukuya Olaitoriani Enkai ino te Horeb, pee aajoki nanu Olaitoriani, ‘Inturrurrokoki nanu kulo tung'ana, pee aitoning nanu ninche irorei laainei, pee aayiolou ninche naaureyu nanu inkolong'i pooki naaishu ninche tioriong enkop, netum sii aaiteng'ena inkera enye nena baa.’

¹¹Nietuo apa intae aanyiku nintasheshe te ntonata o ldoinyo, ina kata eyupuyup ilo doinyo te nkima nebaiki olng'ejep keper, neimulumul enkatampoi kitok o empuruo.

¹²Neirorie intae Olaitoriani tiatua empolos eina kima; nining'ining'i oltoilo loo rorei lenyena, kake eitu idolidolo ilo oiro; oltoilo ake itoning'o.

¹³Neibalakinye ninye intae olning'o lenye lo sotua, ilo oitanapa intae pee iasiasa, aa taa, nena kitanapat tomon, neiger ninye ninche too mbelat oo soito oogueta.

¹⁴Naaitanap nanu Olaitoriani ina kata pee aiteng'en intae nena kikoot o nkiguanat, pee itumutumu aataas ninche teinakop nipuopuo aaya.

¹⁵“Ore te nkaraki ina, entujurroto maate amu eitu apa idolidolo ilo oiroro teina olong nairorie intae Olaitoriani te Horeb te mpolos enkima.

¹⁶Entodol minyalinyala ate aaitobiraki ate inkitanyaanyukot naagueta te mpukunoto e ae toki, te mpukunoto olee aashu ene ng'oruoi,

¹⁷te mpukunoto e ae ng'ues ake ninye natii oriong enkop aashu te mpukunoto e ae motonyi ake ninye nakuet to loing'ang'e,

¹⁸te mpukunoto e ae toki ake ninye naiserpepiari te nkop aashu te mpukunoto osinkirri ake ninye otii atua enkare tiabori enkop.

¹⁹Naa entodol ate mishumumu ake nkonyek inyi aaing'or shumata, ore ake pee idolidolo enkolong, o lapa o lakir, ilo orora pooki le shumata, neyiataa intae nipuopuo aaserem ninche nisiayiayia ninche, nena tokitin naatoorikia Olaitoriani Enkai ino iltung'ana pooki ootii abori shumata pooki.

²⁰Kake kintayio iyie Olaitoriani, nikintupuku aitung'uaa olkokuet le sekenkei oyupuyup, aitupuku te Misiri, pee iaku olorere lenye kewan, anaa enatiu taata.

²¹Ore etiu neijia, aatagorokine apa nanu Olaitoriani te nkaraki intae, nenya ninye olmumai nchere malang nanu Yordan o nchere sii, malo nanu ajing ina kop sidai naisho intae Olaitoriani Enkai inyi pee ijung'ujung'u.

²²Amu meeta nchere maye nanu tena kop, meeta nchere kashomo nanu lido kekun le Yordan kake ilang'ilang'a intae aapuo aaya ina kop sidai.

²³Eng'ura ate, merikino ake intae olning'o lo sotua lo Laitoriani Enkai inyi apa oitobira ninye tenebo intae, nimintobiruru enkitanyaanyukoto nagueta e ae ake ninye pukunoto natomitikio intae Olaitoriani Enkai inyi.

²⁴Amu ore Olaitoriani Enkai inyi naa enkima nanyaisho, Enkai olom.

²⁵“Te nitum inkera o nkera oo nkera inono, nimoruau teinakop, tenipong'ori aitobiru enkitanyaanyukoto nagueta te mpukunoto ake ninye e ae toki, ore te yasata eina bae torrono te dukuya Olaitoriani Enkai ino, aitagor ninye,

²⁶kaipotu nanu keper o enkop pee kinchakenoki iyie ena olong, nchere ipuopuo nabo kata aaidaaya nipuopuo aaye te lido kekun le Yordan; mipuopuo intae aabik teinakop, kake keidaikieki intae.

²⁷Naa kelo Olaitoriani aidapashaki intae iloreren, niakuku kuti tiatua lelo oshon ooreu intae Olaitoriani.

²⁸Ore teine nipuopuo aaisiaai inkaitin oo nkeek o noo soito, ina siaai oo nkaik oo ltung'ana, ina nemedolisho, nemening'isho nemenya endaa, nemeing'uaya toki.

²⁹Kake ore teine ning'oruru Olaitoriani Enkai inyi, naa itumutumu intae ninye, tininyokinyoko aaing'oru ninye too ltauja linyi pooki o te nkishui inyi pooki.

³⁰Tenijing'ijing'i intae atua osina, nepuonu kuna baa pooki shumata intae too nkolong'i e siadi, nirrinyokinono intae Olaitoriani Enkai inyi, nining'ining'i oltoilo lenye,

³¹amu ore Olaitoriani Enkai inyi naa Enkai olng'ur; meitiak ninye intae neidaikie intae nemerikino ninye ilo ning'o lo sotua loo loo papaai linyi apa oinosie olmumai tialo ninche ntarasi.

³²“Nkilikuanisho taata tialo nena olong'i naatulusoitie, nena apa e dukuya te iyie, ebaiki ina olong apa naitayu Enkai oltung'ani apik oriong enkop, ninkilikuanisho ebaiki eluboto nabo e keper o metabaiki enkae, tenaa ketaase aekata embae kitok naikununo nji aashu tenaa ketoning'oki aekata.

³³Ketii apa aekata iltung'ana ootoning'o oltoilo le nkai eiro te mpolos enkima, anaa enitoning'o intae neton ake inchushu?

³⁴Tenaa keetae aekata enkai nashomo ayaki kewan olosho aitung'uaa empolos e likae osho, too ntemat, o too nkitoduaat o too mbaa enking'asia o to larrabal te nkaina magilani o te nkaina naitoriori, o too ntabo sapuki, te risioroto e nena pooki naataasa Olaitoriani Enkai inyi te nkaraki intae te Misiri te dukuya inkonyek inyi?

³⁵Ore te intae, neitodoluaki apa, pee itumutumu aatayiolo nchere, Olaitoriani ninye Enkai, metii likae oponieki ninye.

³⁶Te shumata eishoo ninye intae entoning oltoilo lenye, pee etum aiteng'ena intae, ore te nkop neisho intae entodol ina kima enye kitok, nining'ining'i intae irorei lenyena epuku te mpolos eina kima.

³⁷Ore te nkaraki natonyorra apa ninye iloo papaai linyi negelu eishoi enye te siadi ninche, neitayu intae aitupuku te nkop e Misiri, te ngolon enye kitok, etii ninye tenebo intae.

³⁸Nearaa ninche te dukuya intae iloshon kituaak naa magil aalaang intae maate pee etum aishoo intae ina kop enye metaa enjung'ore inyi anaa enatiu taata.

³⁹Entayiolo naa taata, ena olong nipikipiki iltauja linyi nchere, Olaitoriani ninye Enkai te shumata o tiabori enkop; meetae likae.

⁴⁰Metaa embung'a inkikoot enyena o nkitanapat enyena, nena naitanapa nanu intae ena olong, pee iserianunu intae o nkera inyi te siadi intae, nitumokiki aaitoodoro inkolong'i inyi teinakop naisho intae Olaitoriani Enkai inyi ntarasi.”

⁴¹Negelu Musa inkanas uni te nkalo o loosaen te lido kekun le Yordan,

⁴²pee etum aisikaki oltung'ani oitayu iloikop, ilo oar metua ole latia enye eitu eotiki, meetakinore mang'atisho too nkolong'i naatulusoitie, neaku tenesaru ninye nabo e kuna anas neidim aitajeu enkishui enye.

⁴³Beser tiatua ina kop naitoriori too ltung'ana le Ruben o Ramoti tiatua Gilead too ltung'ana le Gad o Galan tiatua Bashan too ltung'ana le Manase.

⁴⁴Ena enkitanapata nairragie Musa te dukuya inkera oo Siraeli.

⁴⁵Kuna ninche shakenisho o nkikoot o nkitanapat naa ninche eirorie Musa inkera oo Siraeli ina kata apa eipang'u aapuku te nkop e Misiri,

⁴⁶te lido kekun le Yordan teilo erata oipirakinore Bet-peor, tiatua enkop e Sihon olaiguanani le Amori, apa omanya Heshbon laa ninye etimira Musa o nkera oo Siraeli ina kata apa pee eipang'u ninche te Misiri.

⁴⁷Neya ninche ina kop enye o enkop e Oog olaiguanani le Bashan o lelo aiguanak oaare le Amori, apa oomanya enkalo o loosaen teidia alo e Yordan;

⁴⁸ebaiki Aroer, aa ninye naigaraki oerata le Arnon ometabaiki Oldoinyo le Sirion (aa taa Harmon)

⁴⁹tenebo ina Araba pooki te nkalo oloosaen le Yordan o metabaiki enaiposha e Araba, tiabori nena kishong'ishong'at e Pisga.