Read MAASAI REVISED PROTESTANT Enkigilata oo Nkitanapat 5 Bible Online

Enkigilata oo Nkitanapat 5 - MAASAI REVISED PROTESTANT bible

Enkigilata oo Nkitanapat 5

¹Neiturrurru Musa iltung'ana pooki loo Siraeli, nejoki ninche, “Entoning intae Isiraeli inkikoot o kuna kitanapat nairo nanu too nkiyiaa inyi ena olong, niyiolouu intae ning'oring'oro ate pee iasiasa.

²Eitobirua apa Olaitoriani Enkai ang olning'o lo sotua o iyiook te Horeb.

³Mme apa loo papa eitobirie Olaitoriani Enkai ang ele ning'o lo sotua, kake iyiook, kulo pooki ootii ene ooishu ena olong.

⁴Eirorie intae Olaitoriani iduaa nkomomi to ldoinyo, te mpolos eina kima.

⁵Naitashe nanu te rishata o Laitoriani o intae teina kata, pee aibalakinye intae ororei lo Laitoriani; amu ituureishote apa te nkaraki ina kima, neitu ilepilepe aapuo enchumata o ldoinyo. Nejo ninye,

⁶“ ‘Kara nanu Olaitoriani Enkai ino, ilo likiyaua iyie aitupuku te nkop e Misiri, aitupuku te nkop e sinkaisho.

⁷“ ‘Miata kulie aitin neme nanu.

⁸“ ‘Mintobiraki kewan enkitanyaanyukoto e nkai nagueta, aashu empukunoto e ae toki natii shumata aashu enatii abori enkop, aashu ina natii atua enkare tiabori enkop.

⁹Mirrugokino ninche nimiserem ninche; amu ore nanu Olaitoriani Enkai ino naa kara Enkai olom, naitusuj inkera ing'ok oo loo menye o metabaiki eishoi e uni o eniong'uan e lelo laaiba nanu,

¹⁰kake kaitodolu enyorrata too nkalifuni e lelo laanyor neibung inkitanapat aainei.

¹¹“ ‘Mimpot enkarna o Laitoriani Enkai ino te nkiguran: amu meikenaa Olaitoriani ajo eitu eitarruoo ilo oipot enkarna enye te nkiguran.

¹²“ ‘Mbung'a enkolong e Sabato, pee intisiny, anaa enikintanapa Olaitoriani Enkai ino.

¹³Too nkolong'i ile taasisho, nias esiaai ino pooki;

¹⁴kake ore te nkolong e naapishana naa Sabato to Laitoriani Enkai ino; ore teina olong mias hoo ae siaai, iyie aashu olayioni lino, aashu entito ino, aashu olaisiaayiani lino, aashu enkaisiaayiani ino, aashu olkiteng lino, aashu osikiria lino aashu ae ake ninye nabo oo nkishu inono, aashu olomoni otii atua enkaji ino, pee etum ayeng'iyeng'ayu olaisiaayiani lino lee o enkaisiaayiani ino tenebo iyie.

¹⁵Tadamu nchere ira apa osinka te nkop e Misiri, nikintupuku Olaitoriani Enkai ino teine te nkaina enye magilani naitoriori; metaa kintanapa iyie Olaitoriani Enkai ino pee imbung enkolong e Sabato.

¹⁶“ ‘Iyanyita papaai lino o ng'utunyi, anaa enaaitanapa nanu Olaitoriani Enkai ino, pee itum ataseriana, nitum atoponai inkolong'i inono, teinakop naaisho nanu iyie.

¹⁷“ ‘Miar metua.

¹⁸“ ‘Miloloito.

¹⁹“ ‘Nimipurrisho.

²⁰“ ‘Niminteeniki ilo le latia ino elejare.

²¹“ ‘Niming'uar enkitok eilo le latia ino; niming'uar enkaji eilo le latia ino, aashu enkurma enye, aashu olaisiaayiani lenye aashu enkaisiaayiani enye, aashu olkiteng lenye, aashu osikiria lenye, aashu pooki toki ake ninye eilo le latia ino.’

²²“Kulo rorei eirorie intae Olaitoriani te umata inyi pooki to ldoinyo eimunye empolos e nkima, o enkatampoi o enaimin kitok, to ltoilo kitok; neitu ninye eitoki aponaa toki. Neiger ninye kulo rorei too soito oogueta, naaisho ninye nanu.

²³“Ore ake pee ining'ining'i ilo toilo epuku te mpolos eina aimin, ina kata eyupuyupito oldoinyo te nkima, nikipuonunu intae aanyikaki, ilukuny pooki oo loshon linyi, o lpayiani linyi;

²⁴nijojo intae, ‘Eitoduaa iyiook Olaitoriani Enkai ang enkisisa enye o enkitoo, nikitoning'o iyiook oltoilo lenye epuku te mpolos e nkima. Kitoduaa iyiook ena olong Enkai eirorie iltung'ana neton ake eishu lelo tung'ana.

²⁵Amaa naa taata kainyoo iyiook pee kiye? Amu kemut iyiook ena kima kitok; tenikintoki iyiook aaning oltoilo lo Laitoriani Enkai ang, nikiye.

²⁶Amu kaing'ae too looishu pooki oata osesen, otoning'o oltoilo le Nkai naishu eiro eimu empolos e nkima, anaa enikitoning'o iyiook, neton ake kinchu.

²⁷Enchom entinyikakaki pee ining'ining'i nena pooki naajo Olaitoriani Enkai ang; nilikiki iyiook nena pooki naaliki intae Olaitoriani Enkai ang; amu eikining iyiook nikiaas.’

²⁸“Nening Olaitoriani irorei linyi ina kata apa pee kirorierie nanu; naajoki nanu Olaitoriani, ‘Atoning'o nanu irorei le kulo tung'ana likitiakita ninche; eiroro ninche te sipata nena pooki naatejo.

²⁹Oi oshi tenaa keeta ena damunoto anaa ena olong inkolong'i pooki, pee aaureyu nanu neibung inkitanapat aainei pooki, pee etum ninche aataseriana tenebo o nkera enye ntarasi.

³⁰Shomo tiaaki ninche: Entorrinyokinoto ilng'oborri linyi.

³¹Kake ore iyie, intasho tene te mbata nanu, pee aaliki inkitanapat pooki, o nkikoot o nkiguanat nilo aiteng'en ninche, pee epuo ninche aas teinakop nalo nanu aisho ninche.’

³²Shomo naa toduaa kewan pee ias anaa enikintanapa Olaitoriani Enkai ino; nimimbelekenya alo enkalo e tatene aashu ene kedianye.

³³Shomo teina oitoi pooki nikintanapa Olaitoriani Enkai ino, pee itum atopuaa, nitum sii ataseriana, nitumutumu aatobikoi tiatua ina kop naisho intae Olaitoriani.