Read MAASAI REVISED PROTESTANT Enkigilata oo Nkitanapat 6 Bible Online

Enkigilata oo Nkitanapat 6 - MAASAI REVISED PROTESTANT bible

Enkigilata oo Nkitanapat 6

¹“Ena enkitanapata o nkikoot o nkiguanat naaitanapa nanu Olaitoriani Enkai inyi pee aiteng'en intae, pee itumutumu aataas teinakop nipuopuo aaya;

²pee itumutumu aaturia Olaitoriani Enkai inyi, intae o layiok linyi o layiok loo layiok linyi, nimbung'ubung'u kuna kikoot pooki o nkitanapat enyena, naitanap nanu intae, too nkolong'i pooki enkishui inyi; pee etumi aatoponai inkolong'i inyi.

³Toning'o naa, iyie Israel ning'or kewan pee iyau kuna kitanapat; pee itum ataseriana, nitum sii atoponari oleng, anaa apa enaisiligie intae Olaitoriani, Enkai oo loo papaai linyi tiatua ina kop naruko naishi o kule.

⁴“Toning'o iyie Israel: ore Olaitoriani Enkai ang naa nabo.

⁵Tonyorra Olaitoriani Enkai ino to ltau lino pooki o te nkishui ino pooki o te nkidimata ino pooki.

⁶Ore kulo rorei laaitanap nanu iyie ena olong nchoo ejing oltau lino;

⁷nilo iyie aunoki aiteng'en inkera inono, niimaki kulo omon teniton tiatua enkaji ino, o tenilo te nkoitoi, o tenirrag, o tenidumunye.

⁸Niyeniki ninche enkaina ino metaa olmonekie, netiu ninche anaa nkishiliaa te rishata oo nkonyek inyi.

⁹Nisir ninche too mbokishi e kutukaji e nkaji ino o too ntaloishin e kishomi.

¹⁰“Ore kenya ake pee kiyau Olaitoriani Enkai ino atua ina kop apa nainosie olmumai too loo papaai linyi te Abraham o te Isaak o te Yakobo, pee eisho intae inkanas sapuki naa sidain neitu ishetishete,

¹¹o nkajijik naabore ntokitin pooki sidain neitu intae imputuputu o lchorroi ooturo leitu intae ituruturu o nkurman oo sabibu o noo loirienito leitu intae iunuunu, naa tenidaa intae aaraposho,

¹²ning'oring'oro naa ate merikino ake intae Olaitoriani, ilo laa ninye oitupukuo intae aitung'uaa enkop e Misiri, aitung'uaa enkop e sinkaisho.

¹³Shomo turia Olaitoriani Enkai ino; shomo isiayia ninye, ninya olmumai te nkarna enye.

¹⁴Milo ake asujaa kulie aitin, nena aitin e lelo tung'ana likimanita iyie.

¹⁵Amu ore Olaitoriani Enkai ino ilo otii empolos inyi naa Enkai olom; pee meyupuyup ake engoro Olaitoriani Enkai ino tialo yie, nikindaikie ninye aiwuang'ie tioriong enkop.

¹⁶“Nimitem Olaitoriani Enkai ino, anaa enitetema ninye te Masa.

¹⁷Mbung'a tukurraki inkitanapat o Laitoriani Enkai ino o shakenisho enye, o nkikoot enyena apa nikintanapa ninye.

¹⁸Taasa isidan naishiakino too nkonyek o Laitoriani, pee itum ataseriana, nitum sii ashomo aawa ina kop sidai apa nainosie Olaitoriani olmumai pee eisho iloo papaai linyi

¹⁹nchere kerrumoo ninye aipang'ie ilmang'ati linyi te dukuya intae, anaa enaisiligishore Olaitoriani.

²⁰“Ore kenya tinikinkilikuan olayioni lino te nkata nalotu ajoki, ‘Kainyoo eutu ena shakenisho, o kuna kikoot o nkitanapat, o nkiguanat nikintanapa iyie Olaitoriani Enkai ang?’

²¹Nitum taa atiaki olayioni lino, ‘Eikira apa irrindiki le Farao te Misiri; neyau iyiook Olaitoriani aitupuku te Misiri te nkaina magilani;

²²neitodolu Olaitoriani inkitoduaat o mbaa e nking'asia, mbaa sapuki naaitureisho tialo Misiri o tialo Farao o enkaji enye pooki, nikidol too nkonyek ang;

²³neyau ninye iyiook aitupuku teine, pee etum aitijing'u iyiook neisho iyiook ina kop apa nainosie ninye olmumai pee eisho loo papa.

²⁴Neitanapa iyiook Olaitoriani pee kiaas kuna kikoot pooki, pee kiureyu Olaitoriani Enkai ang, te nkaraki eseriani ang maate e anaake, pee etum ninye atagolie iyiook metaa eikinchu anaa enikitiu ena olong.

²⁵Naa kelo ena aaku esipata te iyiook, teniking'or aabaraki pee kiaas ena kitanapata pooki te dukuya Olaitoriani Enkai ang anaa enaitanapa ninye iyiook.’