Read MAASAI REVISED PROTESTANT Enkigilata oo Nkitanapat 8 Bible Online

Enkigilata oo Nkitanapat 8 - MAASAI REVISED PROTESTANT bible

Enkigilata oo Nkitanapat 8

¹“Ore kuna kitanapat naitanapa nanu intae ena olong enchom entisipu entaas, pee itumutumu aatopok niponariri, nipuopuo aaya ina kop nainosie Olaitoriani olmumai pee eisho loo papaai linyi.

²Nidamumu ina oitoi pooki natorikunye intae Olaitoriani Enkai inyi te kulo arin artam tiong'ata, pee etum ninye aitoborro intae, netem intae, pee etum atayiolo ina natii iltauja linyi, tenaa imbung'ubung'u.

³Neitobor ninye intae, neisho intae esumash, neitoti intae te Mana, apa nimiyiololo intae, nemeyiolo sii apa loo papaai linyi; pee etum ninye aitayiolo intae nchere, meishu oltung'ani te nkaraki endaa ake, kake keishu oltung'ani te nkaraki pooki toki naing'uaa enkutuk o Laitoriani.

⁴Eitu apa epolosa nkilani inyi, neitu ejeyu inkejek inyi, te kulo arin artam.

⁵Tayiolo naa to ltau lino nchere, ore anaa enaitame oltung'ani enkerai enye aikintame sii ninye iyie Olaitoriani Enkai ino.

⁶Metaa shomo mbung'a inkitanapat o Laitoriani Enkai ino, alo too nkoitoi enyena niureyu ninye.

⁷Amu eikiyau iyie Olaitoriani Enkai atua enkop sidai, enkop oo nong'ot naatii nkariak, neetii nchorroi oo nkonyek, naarukunye too erat o too ldoinyo,

⁸enkop e nkano o entapa, enkop oo sabibu o lng'abolo o lng'anayio, enkop oo loirienito o enaisho,

⁹ina enkop nilo iyie aadaare nimintoki aekata aisumashu, nimilaunye toki, ina kop naa ore isoito lenyena naa isekenke, ore too ldoinyo linono nilo aturu osuyai.

¹⁰Nilo iyie adaa araposho, nisis Olaitoriani Enkai ino teinakop sidai nikinchoo ninye iyie.

¹¹“Toduaa naa ake mikirikino Olaitoriani Enkai ino, nipal eitu imbung nena kitanapat enyena, o nkikoot enyena o nkiguanat enyena naaitanap nanu iyie ena olong.

¹²Pee tenilo nidaa araposho, nishet nkajijik sidain nimany,

¹³ore teneponari inkishu inono o ntare, neponari nkoshola inono o saabu, ore nena pooki niata neponari,

¹⁴nedumunye taa oltau lino, nikirikino Olaitoriani Enkai ino, laa ninye likiyaua aitung'uaa enkop e Misiri, aitupuku te nkop e sinkaisho,

¹⁵laa ninye likitorikoyie aimie ilo purkel kitok, ilo otii ilasuriaa torrok o nkolupani o ina kop natoyio nemetii enkare, laa ninye likiyaka iyie enkare aimunye e ndapidapoi nagol.

¹⁶Naa ninye likintotio iyie tiong'ata teina mana apa nemeyiolo loo papaai linyi; pee kitum aitoborro nikitem iyie, pee kitum ninye aitaasa esidai te siadi.

¹⁷Toduaa kewan, pee mijo ake to ltau lino, ‘Engolon ai o enkidimata e nkaina ai anotie nanu kuna masaa!

¹⁸Tadamu Olaitoriani Enkai ino, amu ninye likincho iyie engolon niakunye karsis; pee etum aitudupa ilo mumai apa oinosie loo papaai linyi, anaa enatiu ena olong.

¹⁹Naa tenikirikino Olaitoriani Enkai ino, nilo arubare kulie aitin nisiaai ninche niserem ninche, kaaunoki nanu aikok ena olong nchere ilo ake aidaaya.

²⁰Anaa lelo oshon ooishoo Olaitoriani meidaai te dukuya nkonyek inono, te nkaraki nimiyieu iyie nining oltoilo lo Laitoriani Enkai ino.