Read MAASAI REVISED PROTESTANT Enkigilata oo Nkitanapat 9 Bible Online

Enkigilata oo Nkitanapat 9 - MAASAI REVISED PROTESTANT bible

Enkigilata oo Nkitanapat 9

¹“Toning'o iyie Israel, ilo taata iyie alang Yordan, pee ilo aiwuang'ie nimany lelo oshon kituaak naa magil te intae, nena anas naateshetaki aaitabaiki shumata,

²lelo tung'ana oogol naa adoru, lelo ayiok le Anakim, liyiololo intae, nitoning'o intae nijojo, ‘Kaing'ae naidim aitasheikinore ilayiok le Anak?’

³Tayiolo naa ena olong nchere ore ilo oloito te dukuya intae anaa enkima nanyaisho naa Olaitoriani Enkai inyi; keidaikie ninche neishie ninche te dukuya intae; metaa ipuopuo intae aamiraa ninche, nimutumutu ninche nabo kata, anaa enaisiligie Olaitoriani intae.

⁴“Milo ake ajo to ltau lino, eidipa Enkai aturrumoi ninche te dukuya intae, ‘Te nkaraki esupatisho ai peyie aayawua nanu Olaitoriani maawa ena kop,’ amu te nkaraki entorroni e kulo oshon pee eturrumoyie Olaitoriani ninche te dukuya intae.

⁵Mme te nkaraki esupatisho ino aashu emborron oltau lino pee ilo iyie aya ina kop enye; kake te nkaraki entorroni e kulo oshon pee earaa Enkai ninche aipang'ie te dukuya intae, pee etum ninye atudupa ilo rorei apa oinosie Olaitoriani olmumai too loo papaai linyi, Abraham o Isaak o Yakobo.

⁶“Tayiolo naa nchere, mikinchorita iyie Olaitoriani Enkai ino ena kop sidai te nkaraki esupatisho; amu ira iyie olorere ogolong'u.

⁷Tadamu nimincho kirikino ina apa nintagoro Olaitoriani Enkai ino to lpurkel; ebaiki ina olong apa nitupukuo iyie te nkop e Misiri ometaba anaa nilotu ene wueji, igolong'aki oshiake Olaitoriani.

⁸Ore ninye apa to ldoinyo le Horeb nintagoro intae Olaitoriani, negorokino intae Olaitoriani oleng eyieu eidaikie intae.

⁹Ore apa lelo soito oogueta, lelo soito dapashi lo lning'o lo sotua apa oitobira Olaitoriani tenebo intae, natobiko nanu to ldoinyo nkolong'i artam o nkewarieitin artam; neitu nanu anya endaa anaa aok enkare.

¹⁰Naaisho nanu Olaitoriani lelo sooito aare oogueta ooigeroki to lkimojino le Nkai, neigerokino ninche lelo rorei pooki apa ooirorie Olaitoriani intae to ldoinyo aimunye empolos enkima teina olong apa eumata.

¹¹Ore te siadi nena olong'i artam o nkewarieitin artam naaisho nanu Olaitoriani lelo soito pokira aare oogueta, lelo soito lo lning'o lo sotua.

¹²Naaitoki nanu Olaitoriani ajoki, ‘Tudumunye, shomo tadoi tasiooi tung'uai ene; amu ore iltung'ana linono apa liyaua aitung'uaa Misiri netaasa entorroni; eibelekenyate ninche aasioki aapaash ina oitoi apa naitanapa ninche; eitobirakita ninche ate enkitanyaanyukoto naasholuno.’

¹³“Naaitoki nanu Olaitoriani ajoki, ‘Atoduaa nanu kulo tung'ana ajo iltung'ana oogolong'u ninche;

¹⁴tapalaki nanu, pee atumoki aidaikie, naiwuang'ie nanu enkarna enye te nkop, naitayu nanu te iyie olosho magilani naa kitok alang ninche.’

¹⁵Neaku aibelekenye apa nanu nadou to ldoinyo, naa keyupuyup apa ilo doinyo te nkima; ore lelo soito aare oogueta lo lning'o lo sotua netii inkaik aainei.

¹⁶Naing'orisho nanu, nadol ajo itaasa intae eng'oki tialo Olaitoriani Enkai inyi; intobirakita ate olashe osholuno; itasiokito intae aaibelekenya aaing'uaa ina oitoi naitanapa intae Olaitoriani.

¹⁷Neaku aibung'a apa nanu lelo soito pokira aare oogueta, narrar nanu ninche te dukuya inkonyek inyi.

¹⁸Nairrabalakino nanu enkop te dukuya Olaitoriani anaa apake, nkolong'i artam o nkewarieitin artam; neitu anya endaa aashu aok enkare, te nkaraki ina ng'oki pooki nitaasa, aas ina bae torrono too nkonyek o Laitoriani, aaitagor ninye.

¹⁹Amu kaure apa nanu engoro o ina pijan apa naata Olaitoriani tialo intae, ometaa kejo aidaikie intae. Kake aatoning'o ake sii Olaitoriani ina kata.

²⁰Netagorokine sii apa Olaitoriani Aron ometaa kejo aidaikie ninye; naomonoki sii apa ninye Aron ina kata.

²¹Naitoki nanu adumu ina ng'oki torrono, ilo ashe apa lintobira napejoo te nkima nabelibel ninye, aiwutuwut ometotiuo anaa empunyua; nanang'aki nanu ina punyua enye ina reyiet nadou to ldoinyo.

²²“Ore sii apa te Tabera, o te Masa o te Kibrotafa intagoro intae Olaitoriani,

²³naa ore apa pee eirriwaa intae Olaitoriani Kadesh-Barnea, ejo, ‘Elepa enchom embung'a ina kop naishoo nanu intae’ nitogolong'akita intae enkitanapata o Laitoriani Enkai inyi, neitu intae irukuruku ninye aashu ining'ining'i oltoilo lenye.

²⁴Itaa intae iloogolong'aki Olaitoriani ebaiki ina olong natayiolo intae.

²⁵“Neaku airrabalakine nanu enkop te dukuya Olaitoriani te kuna olong'i artam o nkewarieitin artam, naatejo Olaitoriani keidaikie intae.

²⁶Naomon nanu Olaitoriani najo, ‘Olaitoriani Enkai, Ooi mindaikie iltung'ana linono o enjung'ore ino, laa iyie otokordua te nkitoo ino, naa iyie oitupukuo te nkop e Misiri te nkaina magilani.

²⁷Tadamu isinkan linono, Abraham o Isaak o Yakobo; mishilaa engolon enkong'u ele orere, aashu intorrok enye, aashu eng'oki enye,

²⁸mejo ake ina kop nintupukunye iyiook: Te nkaraki apa nemeidim Olaitoriani ayau ninche atua ina kop apa naisiligie ninche, naa ore te nkaraki naibayie ninye ninche eitupukuo ninche pee elotu aar tiong'ata.

²⁹Amu iltung'ana linono ninche naa enjung'ore ino ninche, laa iyie oitupukuo ninche te ngolon ino kitok o te nkaina ino naitoriori.’