Read MAASAI REVISED PROTESTANT Yohana 10 Bible Online

Yohana 10 - MAASAI REVISED PROTESTANT bible

Yohana 10

¹“Esipa esipa, ajoki intae, ore ilo lemeimu kishomi ejing emuatata, kake dikae ekedu aimu, olapurroni naa olaisimani,

²kake ore ilo oimu kishomi ninye olchekut loo nkerra.

³Naa ninye ebolu olarriponi; nening nkerra oltoilo lenye; neipot inkerra enyena too nkarn enye nerik auluo.

⁴Ore pee eidip aipang'ie nkerra enyena pooki nerik ninche, nesuj inkerra ninye; amu keyiolo oltoilo lenye.

⁵Mesuj olomoni, kake keituria amu meyiolo oltoilo lo lomoni.”

⁶Etolikio Yesu ninche ena kitanyaanyukoto, kake eitu eyiolou ninche enatiaaka.

⁷Neitoki Yesu ajoki ninche nchere, “Esipa esipa, ajoki intae, kara nanu kishomi oo nkerra.

⁸Ore pooki ooiturukutuo te dukuya nanu naa lapurrok o laisimak, kake eitu ening inkerra ninche.

⁹Kara nanu enkishomi; ore olaaimu nanu keitajeuni, nejing atua nepuku netum endaata.

¹⁰Melotu olapurroni mme kelotu apurroo neiyieng neitarruoo. Aewuo nanu pee etum aanoto enkishui, netum te nkiputakinoto.

¹¹Kara nanu olchekut supat. Keitayu olchekut supat enkishui enye te nkaraki nkerra.

¹²Ore olchekut oigero, leme olopeny inkerra, kedolu osuyiani elotu, neing'uaa nkerra aisik, neibung osuyiani ninche, neisardaikie.

¹³Amu ore olchekut oigeroki nemeetayie tipat inkerra.

¹⁴Kara nanu olchekut supat; nayiolo inaainei, naayiolo sii nanu inaainei,

¹⁵anaa enaayiolo Papa, nayiolo sii nanu Papa; naa kaitayu nanu enkishui ai te nkaraki nkerra.

¹⁶Naata sii kulie kerra, neme inena muatata. Meeta kata nemareu sii ninche naa kening oltoilo lai, naa keaku eluaata nabo, o lchekut obo.

¹⁷Te nkaraki ena pee aanyor Papa, amu kaitayu enkishui ai, pee aitoki atum.

¹⁸Meetae olaaoru enkishui ai, kake kaitayu openy te yieunoto ai. Kaata enkidimata pee aitayu, naata enkidimata naitoki ang'amunye. Te Papa atang'amua ena kitanapata.”

¹⁹Neitoki ake ajing eoro atua Ilyahudi te nkaraki kulo rorei.

²⁰Nejo ilkumok lenye, “Keeta oloirirua netijing'aki. Oo pee inining'ining'i?”

²¹Nejo kulikae, “Mme lo loata oloirirua kulo rorei. Keidim oloirirua atabolo inkonyek oo lmodook?”

²²Neetae apa osirua le Nkitisinyata te Yerusalem, naa te nkata e nkirobi;

²³nemanaa Yesu te nkaji e Nkai, to lgoriet le Solomon.

²⁴Neman Ilyahudi ninye nejoki, “O anu kenya ing'ashing'ashieshie iyiook? Te naa iyie Kristo toliki iyiook imbalakinye.”

²⁵Newaliki Yesu ninche nejoki, “Atolikio intae neitu irukuruku; isiaaitin naas te nkarna e Papa, kuna naaishakenoki nanu;

²⁶kake mirukuruku intae, amu mirara loo nkerra aainei, anaa enatiaaka intae.

²⁷Kening inkerra aainei oltoilo lai, nayiolo ninche, naa kaasuj ninche,

²⁸naa kaisho ninche enkishui nemeish, nemeimin ninche ntarasi, nemetii olaaidim aikonyarie ninche aitung'uaa enkaina ai.

²⁹Ore Papa laaishoo nanu ninche naa eikitok te pooki, nemetii hoo oloidim aikonyai te nkaina e Papa.

³⁰Kira nabo nanu o Papa.”

³¹Neitoki Ilyahudi aadumu soito aanang ninye.

³²Newaliki Yesu ajoki ninche. “Aitoduaa intae isiaaitin kumok naaing'uaa Papa lai. Kaa nabo te kuna siaaitin kinang'ieng'ie nanu too soito?”

³³Newaliki Lyahudi aajoki, “Mikinang iyie too soito te siaai supat, kake te nkaraki nitamoro Enkai, o te nkaraki nintaa iyie kewan Enkai, nira oltung'ani.”

³⁴Newaliki Yesu nejoki, “Aimesira tiatua Nkitanapat inyi nchere, ‘Atejo irara nkaitin?’

³⁵Amaa te netejo Enkai ninche nkaitin, lelo ootabaikia ororei le Nkai, nemeidimi aaiwuang'ie ilkigerot,

³⁶nijokiki intae oloitisinyua Papa, neirriu enkop, ‘Itamoro Enkai,’ Te nkaraki natejo, ‘Kara nanu Enkerai e Nkai?’

³⁷Te nemaas isiaaitin e Papa, emikiruk;

³⁸kake te naas ninche, ore hoo ti nimikirukuruku nanu, eruko nena siaaitin, pee imusoso niyiolouu aajo ketii Papa atua nanu natii nanu atua Papa.”

³⁹Neitoki ake aaing'oru eneibung'ie Yesu; kake etuluarie ninye ninche.

⁴⁰Neitoki Yesu alo lido kekun le Yordan ewueji neibatisishore apa Yohana te nkiterunoto; neton teine.

⁴¹Nepuo ilkumok enetii ninye; nejo, “Eitu eas Yohana olmonekie kake ore pooki natejo Yohana eimaki ele tung'ani naa kesipa.”

⁴²Neiruk iltung'ana kumok ninye teine.