Read MAASAI REVISED PROTESTANT Yohana 13 Bible Online

Yohana 13 - MAASAI REVISED PROTESTANT bible

Yohana 13

¹Ore eton eng'or enkolong osirua oji ole Pasaka, etayiolo Yesu ajo etabawua esaa enye nalotie aing'uaa ena kop, alo enetii Papa. Netonyorra lelo lenyena ootii enkop, netonyorra ninche metabaiki enkiting'oto.

²Ore einosita endaa, neidipa oloirirua atipika oltau le Yudas Iskariot, enkerai e Simon endamunoto nchere pee ekaldaa Yesu.

³Neyiolou Yesu ajo eishoo Papa engolon e pooki toki, neyiolo ajo enetii Enkai eing'uaa naa enetii Enkai eito.

⁴Neinyototo aing'uaa endaa, neirragie nkilani enyena, nedumu enkarasha arreten kewan.

⁵Nebukoki enkare embeshen neiteru aisuj inkejek oo lkipaareta nejut te nkarasha narretenare.

⁶Nelotu enetii Simon Petero. Nejoki ninye, “Lo Kitok, aa inkejek aainei intuku?”

⁷Neng'amaa Yesu ajoki ninye, “Ore enaasita nimiyiolo iyie taata kake iyiooki ayiolou te siadi.”

⁸Nejoki Petero ninye, “Mikintuku nkejek aainei ai kata!” Newaliki Yesu ajoki ninye, “Te neitu aaisuj iyie, nimira ole nkalo ai.”

⁹Nejoki Simon Petero ninye, “Lo Kitok, mme naa nkejek aainei ake, kake intukuoki nkaik o endukuya ai.”

¹⁰Newaliki Yesu ninye, “Ore oloidipa aitukuoyu meitoki ayieu enkitukuo meteleku nkejek enyena, tuan[5] pooki wueji enye, nirara intae tuani, kake mme intae pooki;”

¹¹amu keyiolo apa Yesu olokaldaa. Ina pee etejo, “Mirara tuani intae pooki.”

¹²Ore pee eidip aitukuo nkejek enye neishop nkilani neitoki aton, nejoki ninche, “Aiyiololo enaitaasa intae?

¹³Kijojo intae nanu, ‘Lo Aiteng'enani’, o ‘Lo Kitok’ nitisipa amu kara.

¹⁴Amaa te naituku nanu intae Olkitok, nara Olaiteng'enani nkejek inyi, keishiaakino sii ninche intae neituku olikae olikae nkejek.

¹⁵Aishoo intae enkitanyaanyukoto, paa ore ena naitaasa intae, nintaasasa sii intae,

¹⁶Kesipa, kesipa, ajoki intae, mme kitok orrindik to lkitok lenye, neme kitok oloipaayioki to loipaayie.

¹⁷Ti niyiololo kuna baa, imayianana ti niaasiasa.

¹⁸Mme intae pooki aimaki. Kayiolo ilo lategelua; kake nchoo eitabari lkigerot oojo, ‘Ore ilooinosa emukate ai aatudumaka entutunyo enye aagilunore nanu.’

¹⁹Ore ebaiki taata, kaliki intae eton eitu eaku, pee te neaku, nirukuruku nchere, Kara nanu.

²⁰Kesipa, kesipa, ajoki intae, ore olong'amu pooki ng'ae lairriwaa, nanu eng'amu, ore olaang'amu naa ilo laairriwua eng'amu.”

²¹Ore pee eidip Yesu atejo nejia, nenyamalu to ltau nejo, “Kesipa, kesipa, ajoki intae, kaakaldaa obo linyi nanu.”

²²Neing'urung'ura lkipaareta maate amu meyiolo aajo kalo eimaki.

²³Neirishakino olgoo le Yesu, obo loo lkipaareta onyor Yesu.

²⁴Neyuk Simon Petero te nkaina nejoki, “Nkilikuana tiaaki ai ng'ae eimaki.”

²⁵Neirishakino olgoo le Yesu nejoki ninye, “Lo Kitok, aing'ae?”

²⁶Newaliki Yesu ajoki, “Ilo laisho endung'oti e mukate aidipa aitadoiki embakuli.” Ore pee eidip aitadoiki, neitayu neisho Yudas Iskariot olayioni le Simon.

²⁷Ore pee eidip Yudas atang'amai endung'oti nejing Sheitani atua ninye. Neaku etiaaka Yesu ninye, “Tasioki taasa ina niyeu niaas.”

²⁸Nemetii te lelo ooinosita endaa, oloyiolo ajo kainyoo pee etiaaka nejia.

²⁹Nejo kulikae, amu Yudas apa onap olbene loo mpisai, eji ketiaaka Yesu, “Inyang'u ntokitin nikiyieu to sirua,” aashu etiaaka meishoo ilaisinak toki.

³⁰Ore pee eng'amaa ninye endung'oti e mukate neipang nabo kata; naa eikewarie.

³¹Ore pee eidip Yudas aipung'o boo nejo Yesu, “Eitaaki taa kitok Enkerai e Tung'ani, neitaaki Enkai kitok tiatua ninye.

³²Te neitaaki Enkai kitok tiatua ninye, keitaa sii ninye Enkai ninye kitok tiatua kewan, naa taata inji eitaa ninye kitok.

³³Nkera aainei, keng'or enkiti kata eton aboitare intae. Eikiyiookiki aaing'oru nanu, naa ore anaa enatiaaka Lyahudi, ‘Ore ine nalo mindimidimi aaetu,’ nejia sii ajoki intae taata.

³⁴Kaisho intae enkitanapata ng'ejuk, entonyorrata anaa enatonyorra nanu intae.

³⁵Teina eyiolou pooki ng'ae ajo, irara lkipaareta laainei, ti niatata enyorrata olikae o likae.”

³⁶Nejoki Simon Petero ninye, “Lo Kitok, kaji ilo?” Newaliki Yesu ajoki, “Ore enalo, nimikindim atusuju taata, kake eikisuju te siadi.”

³⁷Nejoki Petero ninye, “Lo Kitok, Kainyoo pee maaidim atusuju taata? Ekaitayu enkishui ai te nkaraki iyie.”

³⁸Newaliki Yesu nejoki ninye, “Eji intayu enkishui ino te nkaraki nanu? Kesipa, kesipa, aajoki, meru olchogoo eitu kimiki iyie katitin uni.