Read MAASAI REVISED PROTESTANT Yohana 14 Bible Online

Yohana 14 - MAASAI REVISED PROTESTANT bible

Yohana 14

¹“Emincho enyamalu iltauja linyi, eruko Enkai nikirukuruku sii nanu.

²Etii enkaji e Papa ilgilat kumok amaa, te neme nejia etiu kanaata atiaaka intae, kalo aitobiraki intae ewueji?

³Naa te nalo aitobiraki intae ewueji, naitoki ashukunye, naa karikoki intae kewan paa ore enatii nitii sii intae.

⁴Ore enalo, iyiololo intae enkoitoi.”

⁵Nejoki Tomas ninye, “Lo Kitok mikiyiolo enilo; kaji kinko ti nikiyiolou enkoitoi?”

⁶Nejoki Yesu ninye, “Kara nanu enkoitoi o esipata, o enkishui. Metii oltung'ani olotu enetii Papa mme nanu eimayie.

⁷Te naa aikitayioloito nanu, anaata iyiololo sii Papa. Ore ebaiki taata iyiololo ninye; nitoduaa ninye.”

⁸Nejoki Filipo ninye, “Lo Kitok, intoduaa iyiook Papa, amu keidip iyiook.”

⁹Nejoki Yesu ninye, “Kaboitare oshi intae ena kata pooki, neton ake mikiyiolo iyie Filipo? Ore olaatoduaa nanu netoduaa Papa; kainyoo pee itejo intoduaa iyiook Papa?

¹⁰Ai miruk inchere atii nanu atua Papa netii Papa atua nanu? Ore irorei laliki intae malimu te nkitoria ai makewan, kake Papa oton tiatua nanu oas isiaaitin enyena.

¹¹Irukoki inchere atii nanu atua Papa, netii Papa atua nanu: aashu naa kiruk te nkaraki oo siaaitin ate.

¹²Kesipa, kesipa, aajoki, ore elde laairuk nanu, ore kuna siaaitin naas neas ninye, naa keas isapuki naalang kuna amu kalo enetii Papa;

¹³naa ore pooki niomonunu te nkarna ai, ina aas, pee etumi aaterrep Papa te nkaraki Enkerai.

¹⁴Tinikiomonono toki te nkarna ai naa kaas ina.

¹⁵“Te naa aikinyorrinyorro nanu naa imbung'ubung'u nkitanapat aainei,

¹⁶naa kaomon nanu Papa, naa keisho intae likae Autaroni metobiko te nebo intae intarasi;

¹⁷laa Enkiyang'et e sipata, lemeng'amu enkop amu medol ninye nemeyiolo ninye. Iyiololo intae ninye amu keton tiatua intae, netii atua intae.

¹⁸“Maing'uaa intae irara okishin; kalotu enitii.

¹⁹Eng'or enkiti kata pee maaitoki adol ena kop, kake kidolitata intae nanu, ore amu kaishu ninchushu sii intae.

²⁰Ore teina olong niyiolouu intae aajo atii atua Papa, nitii intae atua nanu, natii nanu atua intae.

²¹Ore oloata nkitanapat aainei, neibung ninche, ninye laanyor; naa ore olaanyor kenyorru Papa ninye, naa kanyorru nanu ninye. Naa kaibalakinye kewan ninye.”

²²Nejoki Yudas ninye kake mme Iskariot, “Kaji inko lo Kitok, ti niboloki iyiook kewan, nimiboloki enkop?”

²³Newaliki Yesu ajoki ninye, “Te naanyor oltung'ani nanu, keibung ororei lai, naa kenyorru Papa ninye, naa aikipuonu enetii ninye nikimany nebo o ninye.

²⁴Ore olemaanyor nanu, nemeibung irorei laainei, ore ele rorei lining'ining'i neme olalai kake ole Papa laairriwua.

²⁵“Atolikio intae kuna baa, eton aboitare intae.

²⁶Kake lido Autaroni, ora Enkiyang'et Sinyati oirriu Papa te nkarna ai, oitayiolo intae imbaa pooki neitadamu intae nena pooki natolikio intae.

²⁷Atung'eikia intae eseriani, aishoo intae eseriani ai. Aisho intae neme anaa enaishoru enkop. Emincho ltauja linyi enyamalu; emincho eureishoyu.

²⁸Itoning'o enatiaaka intae ajo, ‘Kalo, naa kashukokino intae.’ Te naa naaji aikinyorrinyorro anaata ing'idada nchere enetii Papa alo, amu kitok Papa te nanu.

²⁹Ore o taata, atolikio intae eton eitu eaku, pee te neaku nirukuruku.

³⁰Meekure aitoki airorie intae oleng, amu kelotu olkitok le na kop, kake meeta engolon te shumata nanu,

³¹kake kaas nanu anaa enaaitanapa papa pee etum enkop atayiolo nchere kanyor nanu Papa. Enyoito emaape te ne.