Read MAASAI REVISED PROTESTANT Yohana 18 Bible Online

Yohana 18 - MAASAI REVISED PROTESTANT bible

Yohana 18

¹Ore pee eidip Yesu atejo kuna baa nepuku o lkipaareta lenyena, aapuo lido kekun lo yarata le Kidron enetii olokeri oshomo ninye o lkipaareta lenyena.

²Ore Yudas, ilo otakaldayie ninye naa keyiolo sii apa ninye ine wueji amu kesesh apa elo Yesu ine o lkipaareta lenyena.

³Nedumu Yudas empikas oo sikarini o larripok ooirriutua lapolosak kituaak o Lfarisayo, nepuonu ine eeta ltaai o lkilang'ilang'eta o masaa o larrabal.

⁴Ore Yesu, eyiolo inaaitaasi ninye pooki, nepuku nejoki, “Ai ng'ae ing'oruru?”

⁵Newaliki ninche aajoki, “Yesu le Nasaret.” Nejoki Yesu ninche, “nanu ilo.” Ore sii Yudas ilo otakaldayie ninye neitashe te nebo ninche.

⁶Ore pee eidip atiaaki ninche, “nanu ilo,” nerrinyo siadi nebatata te nkop.

⁷Neigil, aikilikuan ajoki, “Ai ng'ae ing'oruru?” Nejo ninche, “Yesu le Nasaret.”

⁸Newaliki Yesu ajoki, “Atiaka intae nanu ilo, te naa nanu ing'oruru, enchoo kulo epuo.”

⁹Pee eitabari ororei apa oiroro, ajo, “Ore te lelo likinchoo, maata olaiturrayie.”

¹⁰Neeta Simon Petero olalem, neshutu, neoshie osinka lo Lapolosani Kitok nedung'u enkiok e tatene. Keji enkarna e ilo sinka Malkus.

¹¹Nejoki Yesu Petero, “Inyiaaki olalem lino enchashur. Amaa enkikompe naaishoo Papa, ai ninye maok?”

¹²Ore ina pikas o sikarini o lkitok lenye o larripok loo Lyahudi, neibung Yesu neen,

¹³neng'as aarikoki Annas, amu olaputani le Kaiafas, laa ninye Olapolosani Kitok te ilo ari.

¹⁴Kaiafas olapa otiaaka Lyahudi nchere keishiaakino naa oltung'ani obo onang olorere.

¹⁵Nesuj Simon Petero o likae oiteng'eni Yesu. Neyiolo ilo likae oiteng'eni Olapolosani Kitok, nejing ninye o Yesu atua olkoriet lo Lapolosani Kitok.

¹⁶Kake neitashe Petero ti auluo te mbata e kishomi. Nelotu taa ilo likae oiteng'eni oyiolo Olapolosani Kitok, neirorie enkarriponi e kishomi, neitijing'u Petero atua.

¹⁷Ore ina tito narrip kishomi, nejoki Petero, “Aa ira sii iyie obo loo lkipaareta lele tung'ani?” Nejo, “Mara.”

¹⁸Neinuaa isinkan o larripok enkima oo nkuk amu keirobi, naa ore eitashoo teine, eijito enkima, neitashe sii ninye Petero o ninche, aij enkima.

¹⁹Neikilikuan Olapolosani Kitok Yesu mbaa oo lkipaareta lenyena o mbaa naaiteng'enishe.

²⁰Newaliki Yesu ajoki ninye, “Airorie enkop aibalakinye mbaa. Aiteng'enisho oshi ake too nkajijik e ntumo o te nkaji e Nkai natumore Lyahudi pooki, nemeeta embae nairoro too nkisudorot.

²¹Kainyoo paa nanu inkilikuan? Inkilikuana ilaatoning'o enatiaaka. Keyiolo ninche enatejo.”

²²Ore pee ejo ninye nejia, neosh obo loo larripok oitashe teine eseder te nkaina, nejoki, “Ai nejia ijo ti niwaliki Olapolosani Kitok?”

²³Newaliki Yesu ajoki ninye, “Te naa katejo ntorrok, tolimu shakeni e ina torroni; kake amaa te naa sipat, kainyoo pee kiosh?”

²⁴Neirriwaa Annas ninye eena enetii Olapolosani Kitok Kaiafas.

²⁵Neitashe Simon Petero aij enkima. Nejoki ninche ninye, “Oo iyie, aa ira obo loo lkipaareta lenyena?” Nemiki, nejo, “Mara.”

²⁶Ore osinka obo lo Lapolosani Kitok alashe le ilo otundung'oyie Petero enkiok, nejo, “Keitu duoo aadol to lokeri te nebo Yesu?”

²⁷Neitoki ake Petero amiki, ore ina kata neru olchogoo.

²⁸Nerik ninche Yesu aaitung'uaa Kaiafas, aarik enkaji o Lbalusui; naa enasirie. Eitu ejing ninche maate enkaji o Lbalusui pee meidurukieki. Amu kejo pee etum aainosa Pasaka.

²⁹Neaku eipang'aka neipang'aki Pilato ninche nejo, “Kaa kitarruorroto iyaunye ele tung'ani?”

³⁰Newaliki ninche aajoki, “Te neme olaasani loo ntorrok ele tung'ani, anaata eitu kirikoki iyie.”

³¹Nejoki Pilato ninche, “Ewaita intae ninye eng'uanare too nkitanapat inyi.” Nejoki Lyahudi ninye, “Meishoro iyiook matar oltung'ani metua.”

³²Etotiwuo nejia pee etum atabai enatejo Yesu pee eutu ajo kaa keeya eye ninye.

³³Neitoki Pilato ajing atua enkaji o Lbalosi neipot Yesu nejoki, “Aa ira iyie olaiguanani lo Lyahudi?”

³⁴Newaliki Yesu ajoki, “Ai iyie makewan ojo nji ana ai lkulikae likitolikitio mbaa aainei?”

³⁵Newaliki Pilato ajoki, “Kara nanu Olyahudi? Olorere lino o lapolosak kituaak likiyautua iyie enatii. Kaa itaasa iyie?”

³⁶Newaliki Yesu ajoki, “Ore enkitoria ai mme ene na kop. Te naa naaji ke ne na kop enkitoria ai anaata aatang'oro lkipaareta laainei, pee maapiki nkaik oo Lyahudi; kake ore enatiu, mme ene ne enkitoria ai.” Nejoki Pilato ninye, “Metaa ira iyie olaiguanani?”

³⁷Newaliki Yesu ajoki, “Iyie otejo nchere kara nanu olaiguanani. Aatoiwuoki nanu te nkaraki ena, naa te nkaraki ena pee aewuo enkop pee aishakenoki esipata. Kening ole sipata pooki oltoilo lai.”

³⁸Nejoki Pilato ninye, “Kainyoo esipata?” Ore pee eidip Pilato atejo nejia, neitoki aipang'aki Lyahudi nejoki, “Eitu atumie hoo ninye entiyoto naishiakinore enkiguana.

³⁹Kake iatata olkerreti lalaakinye intae oltung'ani obo te Pasaka. Iyieuu nalaaki intae olaiguanani loo Lyahudi?”

⁴⁰Nebuak pooki aaitoki aajo, “Mme ele tung'ani, kake Barabas.” Naa olaisimani apa Barabas.