Read MAASAI REVISED PROTESTANT Yohana 19 Bible Online

Yohana 19 - MAASAI REVISED PROTESTANT bible

Yohana 19

¹Nerik Pilato Yesu meidong'i te nkeene;

²neshetu isikarini olmarisian loo lkiku, nepik elukunya enye, neishopoki olkila onyokie.

³Neaku kepuonu enetii aajoki, “Supa, lo aiguanani loo Lyahudi!” Nedam isederi.

⁴Neitoki Pilato aipang nejoki ninche, “Eng'ura, kaipang'akinye intae ninye pee iyiolouu aajo eitu atumie hoo enkitarruorroto.”

⁵Neipang'u taa Yesu eishopito olmarisian loo lkiku o lkila onyokie. Nejoki Pilato ninche, “Eng'ura ele tung'ani.”

⁶Ore pee edol ilapolosak kituaak o larripok ninye, nebuak aajo, “Tasho! Tasho!” Nejoki Pilato ninche, “Ewaita intae oopeny, entasho; amu eitu atumie nanu ninye hoo enkitarruorroto.”

⁷Newaliki Lyahudi ninye aajoki, “Ekiata iyiook enkitanapata naa ore teina kitanapata keishiaakino keeya te nkaraki naitaa kewan Enkerai e Nkai.”

⁸Ore pee ening Pilato ilo rorei neureishoyu oleng,

⁹neitoki ajing atua enkaji o Lbalusui, nejoki Yesu, “Kaji ng'uaa iyie?” Kake eitu eisho Yesu ewalata hoo nabo.

¹⁰Nejoki Pilato, “Aimikirorie nanu? Aimiyiolo ajo kaata engolon naalakunyie naata engolon naasheyie?”

¹¹Newaliki Yesu nejoki, “Miata hoo naaji engolon te nanu te neme eikinchooki eing'uaa Keper. Neaku ina pee eeta olaatorikoko iyie eng'oki nalusoo.”

¹²Ore te nkaraki ena walata neing'oru Pilato enaiko pee elaku Yesu. Neidikidik Ilyahudi aabuak ejo, “Ti nilak ele tung'ani, nimira olchore le Kaisari. Ore pooki ng'ae oitaa kewan olaiguanani, naa Kaisari egilunore.”

¹³Ore pee ening Pilato lelo rorei neipang'unye Yesu boo, neton to lorika le nkiguana te wueji neji olpura loo soito, neji te nkutuk oo Lbrania Gabata.

¹⁴Naa te Nkitobirakinoto e Pasaka naa inoo saa ile. Nejoki ninye Lyahudi, “Neilo olaiguanani linyi!”

¹⁵Nebuak aajo, “Iwuang'ie, Iwuang'ie ninye, tasho ninye!” Nejoki Pilato, “Kashe olaiguanani linyi?” Newaliki lapolosak kituaak, “Mikiaata iyiook olaiguanani leme Kaisari.”

¹⁶Neishooyo taa Pilato ninye meshomo aashe. Neibung ninche Yesu nerik.

¹⁷Neipang enapita openy osalaba aya “Ewueji neji Emborbor”, neji (te nkutuk oo Lyahudi Golgota).

¹⁸Neshe ninche ninye teine, o kulikae tung'ana aare te nebo ninye, atii ake obo enkae matua netii olikae enkae netii Yesu erishata.

¹⁹Nesir Pilato olkigeroto nepetoki osalaba, osira ajo, “Yesu le Nasaret, Olaiguanani loo Lyahudi.”

²⁰Neisum Ilyahudi kumok ilo kigeroto amu ore ine wueji netasheyieki Yesu kenyikita ina anasa, natisiraki te nkutuk oo Lbrania o enoo Roma o enoo Lyunani.

²¹Neaku ina pee etiaakita ilapolosak kituaak loo Lyahudi Pilato, “Misir ajo, ‘Olaiguanani loo Lyahudi’, kake nchere etejo ninye, ‘Kara Olaiguanani loo Lyahudi.’ ”

²²Newaliki Pilato ajo, “Ore enatisira, atisira.”

²³Ore pee eidip isikarini aatasho Yesu neya nkilani enyena neor kat ong'uan, neya ake osikari eoroti nabo, neya sii ilo kila. Nemeeta ilo kila lenye emanaroto e ripata olkila, keshetuno te shumata o meiting'o.

²⁴Naa ina pee etiaakinote, “Emikipolos, ematooshie ele enkukuo, pee kitum oloya,” pee ebaya ilo kigeroto ojo, “Etoorikinote nkilani aainei neoshie enkukuo olkila lai.”

²⁵Kuna baa etaasa isikarini. Ore te mbata o salaba le Yesu neitashe ng'otonye, o Mariamu enkanashe ng'otonye, o enkitok e Kleopas, o Mariamu Magdalena.

²⁶Ore pee edol Yesu ng'otonye, eitashe teine, o loiteng'eni apa onyor, nejoki Yesu ng'otonye, “Yieyio, ng'ura enkerai ino.”

²⁷Neitoki ajoki ilooiteng'eni, “Ng'ura ng'utunyi.” Ore ebaiki ina kata nerik ilooiteng'eni Mariamu enkang enye.

²⁸Ore te siadi ena, etayiolo Yesu ajo eitabayioki mbaa pooki, pee etumi aaitabai olkigeroto katukul, nejo, “Kaata enkure.”

²⁹Netipikaki emoti ine, nabore siki; nepik osuguroi obore ina siki oloomi le hisopo netuloki enkutuk enye.

³⁰Ore pee eng'amu Yesu ina siki nejo, “Eidipe!” Neirrug elukunya neitaaya enkishui enye.

³¹Ore Ilyahudi te nkaraki naa enkolong e rreten e Sabato, ejo pee meing'uari seseni te shumata o salaba te nkolong e Sabato amu enkolong kitok Sabato, neomon Pilato metigili ninche nkejek neiwuang'ieki aaya.

³²Neaku eetuo isikarini apa negil inkejek ole dukuya o no likae apa otashoki te nebo ninye.

³³Ore pee ebaiki enetii Yesu, nedol aajo eidipa atua, neitu egil inkejek enyena.

³⁴Kake etaremo osikari obo ematua te remet, nepuku osarge o enkare.

³⁵Ore ilo otoduaa neishakenoko, naa kesipa shakenisho enye, neyiolo ninye ajo esipata ejoito, pee irukuruku sii intae.

³⁶Etotiutuo kuna baa pee ebaya olkigeroto ojo, “Meetae oloito lenye ogili.”

³⁷Enyaaka sii ajo likae kigeroto, “Keyooki ninche aaing'or ilo otaremo.”

³⁸Ore te siadi nena, neishori Yosef le Arimatea, laa oloiteng'eni apa le Yesu, kake too nkurrat te nkaraki naure Ilyahudi, neomon Pilato meishoo meewa osesen le Yesu; neisho Pilato. Nelotu neya osesen lenye.

³⁹Nelotu sii Nikodemo, olapa otang'asa alo ayiaya Yesu kewarie, neshoru enkitushulati e ilata narropil o emanoo o esonkoyo nabaya ilkiloi tomoni uni.

⁴⁰Neya osesen le Yesu neirin too nkarash e kitani napuyiapui te nebo o ina ilata narropil, anaa enatiu olkerreti loo Lyahudi le nukaroto.

⁴¹Netii ine wueji netasheyieki ninye enkurma, netii atua ina kurma enkurare ng'ejuk neton eitu aekata enukarieki likae.

⁴²Ore te nkaraki rreten e Sabato oo Lyahudi, netaana ina kurare, nenukari Yesu teine.