Read MAASAI REVISED PROTESTANT Yohana 7 Bible Online

Yohana 7 - MAASAI REVISED PROTESTANT bible

Yohana 7

¹Ore pee eidipayu kuna baa nemanaa Yesu te Galilaya, amu meyieu nemanaa te Yudea te nkaraki naing'oru Lyahudi pee ear ninye metua.

²Netinyikua osirua loo Lyahudi, aa osirua loo lng'oborri.

³Neaku etiakita lalashera lenyena ninye, “Tung'uai ene shomo Yudea, pee edol sii ninche lkipaareta linono isiaaitin niasita.

⁴Amu meetae oloas ai bae too nkisudorot laa keyieu ninye openy neliooyu aibalayu. Tenaa iasita iyie nena baa aibalunye, imbalakinye kewan enkop.”

⁵Amu eitu doi eiruk ilalashera lenyena ninye.

⁶Nejoki Yesu ninche, “Eton eitu ebau enkata ai, kake ore te ntae keishiaa erishata pooki.

⁷Meidim enkop aibayu intae, kake kaaiba nanu, amu kaishakenoki nchere kaarruok iasat enyena.

⁸Elepa intae enchom osirua. Mailep nanu alo ele sirua amu eton eitu ebaya enkata ai.”

⁹Ore pee eidip atiaki ninche nejia, nebik te Galilaya.

¹⁰Ore eidipa lalashera lenyena aailepa aashom ilo sirua, neitoki sii ninye Yesu alo, neitu eitalio kewan, kake etiu anaa keisudori.

¹¹Neaku keing'oru ninye Lyahudi teine to sirua, nejo, “Koree ninye?”

¹²Netii olong'unyung'unyi atua esiamo te nkaraki ninye, ejo kulikae, “Oltung'ani supat,” nejo kulikae, “A'a keitapong'oo ninye olorere.”

¹³Kake ore eyia nejia metii hoo obo oimaki ninye aibalunye eure Lyahudi.

¹⁴Ore pee eitorito ilo sirua, neilep Yesu ajing enkaji e Nkai, neiteru aiteng'enisho.

¹⁵Neing'asia Ilyahudi nejo, “Kaji eiko pee eyiolo ele tung'ani isirat, neitu ae kata eiteng'eni?”

¹⁶Newaliki Yesu nejoki ninche, “Mme enaai enkiteng'enare naata, kake ene ilo laairriwua.

¹⁷Te nenyorraa oltung'ani aas eyieunoto e Nkai, keyiolou ineina kiteng'enare, te naa ke Nkai eing'uaa aashu te naa ai te nkitoria ai makewan airo.

¹⁸Ore oloiro makewan, enchunet enye makewan eing'oru; kake ore ilo oing'oru enchunet e ilo oirriwua, nesipa ninye, nemetii inemesipa atua ninye.

¹⁹Keitu eisho intae Musa nkitanapat? Nemetii obo linyi oibung'ita nena kitanapat. Kainyoo pee king'oruru aar nanu?”

²⁰Newaliki olorere aajoki, “Aiata oloirirua, Aing'ae liking'oru aar?”

²¹Newaliki Yesu ajoki ninche, “Ataasa esiaai nabo ning'asiate pooki.

²²Te nkaraki ena pee eishoo intae Musa emuratare, (neme Musa doi eing'uaa kake lelo loo papa), nimuratata intae oltung'ani te nkolong e Sabato.

²³Amaa amu kemurati oltung'ani te nkolong e Sabato pee megili nkitanapat e Musa, oo pee kigorokinono intae nanu amu aitaa oltung'ani biyoto katukul te nkolong e Sabato?

²⁴Eminguanare too naalioo, kake enguanare te nkiguana oo sipat.”

²⁵Nejo kulikae le Yerusalem, “Aime ele tung'ani doi eing'oru enkitoria aar metua?

²⁶Kake eng'ura eiro aibalie, neitu ejoki ninche ae. Keidimayu sa metaa keyiolo ilooitoreisho aajo ele Kristo?

²⁷Kake ore ele eikiyiolo eneing'uaa. Naa tenelioyu kenya ilo oji Kristo aibalayu nemeetae oloyiolo eneing'uaa ninye.”

²⁸Te nkaraki ina pee etabuaa Yesu te nkaji e Nkai eiteng'enisho ejo, “Eikiyiololo nanu niyiololo enaing'uaa. Neitu alotu te yieunoto ai makewan, kake ore ilo laairriwua ninye osipa, naa ninye miyiololo.

²⁹Kayiolo nanu ninye, amu ninye aing'uaa naa ninye laairriwua.”

³⁰Neing'oru ninche eneiko pee eibung ninye, kake metii obo oiteleikia enkaina ninye, amu eton eitu ebau esaa enye.

³¹Neiruk ilkumok ninye tiatua olorere, nejo, “Amaa te nelotu Kristo, keas inkitoduaat kumok naalang inaasita ele tung'ani?”

³²Nening Ilfarisayo eimaki esiamo nena baa enyena, neirriwaa lapolosak kituaak o Lfarisayo larripok meshomo aaibung ninye.

³³Nejoki Yesu ninche, “Eng'or enkiti kata eton atii tenebo intae, pee aitoki alo enetii ilo laairriwua.

³⁴Aikiyiookiki aaing'oru, kake mikitumutumu, ore enatii nimindimidimi aaetu.”

³⁵Nejokino Lyahudi maate, “Kaji ejo pee elo, nimikitumie? Kejo pee elo enetii Lyahudi ooidapashakinote Ilyunani, nelo aiteng'en Ilyunani?

³⁶Kalo rorei ele otejo, ‘Aikiyiookiki aaing'oru nimikitumutumu, ore enatii nimindimidimi aaetu?’ ”

³⁷Ore te nkolong nabayie, naa ninye enkolong kitok e ilo sirua, neitashe Yesu nebuak ajo, “Te neeta oltung'ani enkure, inchoo elotu enatii aokisho.

³⁸Ore olaairuk nanu, anaa enajo ilkigerot. ‘Keyooki aarukunye nchorroi e nkare naishu to ltau lenye.’ ”

³⁹Ore pee etejo Yesu nejia, Enkiyang'et eimaka natum lelo pooki ooiruk ninye, amu eton eitu ebau ina Kiyang'et ina kata, amu eton eitu eilepieki Yesu metaa kitok.

⁴⁰Ore pee ening ematua oo ltung'ana kulo rorei nejo, “Kesipa ilo oiboni ele.”

⁴¹Nejo kulikae, “Ele Kristo.” Nejo kulikae, “Ai Galilaya epukunye Kristo?

⁴²Keitu ejo lkigerot eishoi e Daudi eimu Kristo, apukunye Betlehem, enkang natii apa Daudi?”

⁴³Ore teina nejing empong'o atua esiamo te nkaraki Yesu.

⁴⁴Neyieu kulikae neibung ninye, kake metii oloitabaikia ninye enkaina.

⁴⁵Nepuonu ilarripok enetii lapolosak kituaak o Lfarisayo, nejokini ninche, “Kainyoo pee eitu iyauu ninye?”

⁴⁶Newaliki larripok nejo, “Eitu aekata eiro oltung'ani anaa enairo ele tung'ani.”

⁴⁷Newaliki Lfarisayo ilarripok aajoki, “Keitapong'oyioki sii ninche intae?

⁴⁸Keetae too laitoriak anaa too Lfarisayo oloiruko ninye?

⁴⁹Kake ore ena siamo nemeyiolo nkitanapat naa kedia.”

⁵⁰Nejoki Nikodemo ninche, olapa taa otang'asa alotu enetii Yesu, laa obo le lelo Farisayo,

⁵¹“Amaa kedung'oki nkitanapat ang oltung'ani enkiguana eton eitu eng'asi aainining neyiolouni enataasa?”

⁵²Newaliki aajoki ninye, “Aa Galilaya sii yie ing'uaa? Ing'urai tisipu ilkigerot, inchere meetae oloiboni opuku eing'uaa Galilaya.”

⁵³Nelo pooki tung'ani enkaji enye.