Read MAASAI REVISED PROTESTANT Yohana 9 Bible Online

Yohana 9 - MAASAI REVISED PROTESTANT bible

Yohana 9

¹Ore eloito Yesu nedol oltung'ani otoiwuoki aa modooni.

²Neikilikuan lkipaareta lenyena ninye aajoki, “Rabi, aing'ae otaasa eng'oki, kele tung'ani, anaa ilootoiutuo, pee etoiwuoki ninye aa modooni?”

³Newaliki Yesu ajoki, “Eitu eitarruoo ele tung'ani, anaa ilootoiutuo, kake nkiasin e Nkai eji pee eibalunyeki tiatua ninye.

⁴Kenare nikias isiaaitin e ilo laairriwua eton aa dama; amu kelotu enkewarie, nemeidim oltung'ani aitayu esiaai.

⁵Ore eton atii enkop, kara nanu ewang'an e nkop.”

⁶Ore pee ejo ilo rorei, nenotaki enkop, neipurjaki nkamulak inkulupuok; neyelie nkonyek e ilo modooni.

⁷Nejoki, “Shomo sujai to lmoti le Siloam.” (Keji ina arna oirriwayioki). Neaku eshomo aisujaa neshukunye etodolishe.

⁸Neaku, ore ile latia, o lelo ootoduaa apa ele tung'ani aa olaomononi, nejo. “Aimme ele oshi oton aomonisho?”

⁹Nejo kulikae, “Ninye.” Nejo kulikae, “Mme ninye, kake kenyaanyukie ninye.” Nejo ninye openy. “Nanu ilo.”

¹⁰Nejoki ninche ninye. “Kaji kinkunaki pee etabolote nkonyek inono?”

¹¹Newaliki ajoki, “Oltung'ani oji Yesu oipurja esarng'ab, naaelie nkonyek aainei, naajoki, ‘Shomo Olmoti le Siloam isujai.’ Nalo aisujaa nadolishoyu.”

¹²Nejoki ninche, “Kaji etii?” Nejoki, “Mayiolo nanu.”

¹³Nerik ninche ilo modooni enetii Ilfarisayo.

¹⁴Naa enkolong e Sabato ina olong pee eipurj Yesu esarng'ab abol inkonyek enyena.

¹⁵Neitoki sii Lfarisayo aaikilikuan ninye eneikuna pee etodolishe. Nejoki ninche, “Esarng'ab aaelie nkonyek aainei, naisuj, nadolishoyu.”

¹⁶Nejo kulikae loo Lfarisayo, “Mme Nkai eing'uaa ele tung'ani, amu meibung nkitanapat enkolong e Sabato.” Nejo kulikae, “Keidim oltung'ani arruoni ataasa inaaing'asiaisho naaijo kuna?” Nejing empong'o atua ninche.

¹⁷Neaku etiakita ninche ilo tung'ani modooni, “Aijo iyie aa ninye, amu kitabolo naa nkonyek?” Nejo, “Oloiboni ninye.”

¹⁸Kake ore ake etiu nejia, eitu eiruk Ilyahudi mbaa enyena nchere modooni apa netodolishe, ometaba anaa neipot intoiwuo eilo tung'ani otodolishe,

¹⁹neikilikuan ninche aajoki, “Kele olayioni linyi litejo apa etoiwuoki aa modooni? Kaji etiu taata pee edolisho?”

²⁰Newaliki intoiwuo enyena aajoki. “Kiyiolo aajo olayioni lang, netoiwuoki apa aa modooni;

²¹kake mikiyiolo eneikuna pee etodolishe taata, nimikiyiolo olotabolo nkonyek enyena. Ai botor doi, enkilikuana ninye; kelimu mbaa enyena makewan.”

²²Etejo intoiwuo ena te nkaraki naure Ilyahudi; amu eidipa Lyahudi aatoning'okinoto nchere, “Ore ake oltung'ani oibalie ajo ninye Kristo, nearari aaipang'ie te nkaji e ntumo.

²³Neaku ina pee etejo intoiwuo, ‘Ai botor doi, enkilikuana ninye,’ ”

²⁴Neitoki taa aaipot ene are ilo tung'ani ora apa modooni, nejoki ninye, “Inchoo Enkai enkisisa. Kiyiolo iyiook aajo olarruoni ele tung'ani.”

²⁵Newaliki ninye ajoki, “Te naa kolarruoni mayiolo nanu; nabo ake ayiolo, inchere kara apa modooni nadolisho taata.”

²⁶Neitoki ninche aajoki, “Kaji kinkuna? Kaji eikuna pee kitabolo nkonyek inono?”

²⁷Newaliki ajoki ninche, “Aidipa duoo atoliki intae, neitu ining'ining'i. Kaji etiu pee iyieuu nintokiki ake aaning? Iyieuu sii intae niakuku lkipaareta lenyena?”

²⁸Nemor ninche ninye nejoki, “Ira iyie oloiteng'eni lenye, kake kira iyiook lkipaareta le Musa.

²⁹Kiyiolo iyiook aajo eirorie Enkai Musa, kake ore ele, mikiyiolo eneing'uaa.”

³⁰Newaliki ilo tung'ani ninche ajoki, “Kainyoo, ene nking'asia eji miyiololo eneing'uaa ninye kake etabolo nkonyek aainei!

³¹Kiyiolo aajo mening Enkai ilaing'okok; kake ore oloserem Enkai neas enayieu ninye, kening Enkai ninye.

³²Eitu aekata ening'i olotabolo nkonyek o ltung'ani oini aa modooni.

³³Te neme Enkai eing'uaa ele tung'ani meidim ataasa toki.”

³⁴Newaliki ninche ninye aajoki, “Aa keiyie olotu aiteng'en iyiook oltung'ani otoikioki atua elulung'ata oo ng'ok?” Nearaa ninche ninye aaipang'ie.

³⁵Nening Yesu nchere etaaraitie Lfarisayo olapa tung'ani oishiuo emodoo aaipang'ie; ore pee elo netum nejoki ninye, “Iruko iyie Enkerai e Tung'ani?”

³⁶Newaliki ajoki, “Lo Kitok, ai ng'ae ilo pee atum airuko ninye?”

³⁷Nejoki Yesu ninye, “Itoduaa iyie, naa ninye ele likirorie.”

³⁸Nejo ninye, “Olaitoriani, airuko,” neserem ninye.

³⁹Nejo Yesu, “Te nkaraki enkiguana pee aewuo nanu enkop, pee edolishoyu lelo lemedolisho, neaku modook iloodolisho.”

⁴⁰Nening ele rorei kulikae Farisayo ooboitare nejo, “Eikira sii iyiook modook?”

⁴¹Nejoki Yesu ninche, “Te naa naaji irara modook anaata miatata eng'oki Ore enatiu, ijojo, ‘Kidolisho;’ nebik enkitarruorroto inyi.”