Read MAASAI REVISED PROTESTANT Iasat 1 Bible Online

Iasat 1 - MAASAI REVISED PROTESTANT bible

Iasat 1

¹Olanyor Oloyanyiti Teofilo: Aigero te mbuku naitera, mbaa pooki naaiterua Yesu aas o naaiteng'enishe,

²o metabaiki ina olong apa nailepieki aaya keper. Ore eton eitu eilepieki Yesu neitanapisho te ngolon e Nkiyang'et Sinyati, aitanap lelo tung'ana apa ootegelua metaa lkipaareta, lenyena.

³Ore te rishata oo nkolong'i artam, etulusoyie keeya enye, neipang'aka ninche katitin kumok, too nkoitoi naaitadedeyie te ninche pee eoru ninche olng'ash nchere keishu; netoduaa ninche ninye, eirorie ninche eimaki mbaa e nkitoria e Nkai.

⁴Ore pee etumo ninche te nebo, neitanap Yesu ajoki, “Emipuo aaing'uaa Yerusalem, kake entaanyu enkishorunoto natejo Papa keishoru, anaa enatiaaka intae.

⁵Amu te nkare apa eibatisishe Yohana, kake ore too nkuti olong'i, keibatisae intae te Nkiyang'et Sinyati.”

⁶Ore enotote ilkipaareta te nebo neikilikuan Yesu aajoki, “Olaitoriani, ai te na rishata irrinyoki Siraeli enkitoria?”

⁷Nejoki Yesu ninche, “Ore rishat o nkatitin naa Papa lai ake openy oitore makewan, nemeishoro intae entayiolo enkata naaku.

⁸Kake ing'amumu intae engolon, tenelotu Enkiyang'et Sinyati shumata intae, niaakuku intae lchakenini laainei tiatua Yerusalem, o tiatua Yudea pooki o Samaria, o metabaiki ineeiting'ie enkop.”

⁹Ore pee eidip atejo neijia, eing'orita ninche, neilepieki aaya keper neitemoo enkatampoi arishie nkonyek enye.

¹⁰Ore egira aaimariri shumata aaduaaya ninye eloito, ore nabo kata nemaniki ltung'ana aare ooishopito nkilani naaibor eitashe.

¹¹Nejo, “Lo lewa le Galilaya, kainyoo pee intasheshe tene aaing'or shumata? Ore Yesu, ele oilepieki aaitung'uaa intae aaya keper keitu aikununye anaa ina nitoduaaitie elo keper.”

¹²Neitoki ilkipaareta aashuko Yerusalem aaing'uaa oldoinyo oji Oloo loirienito otaaniki Yerusalem oba anaa elototo e nkolong e Sabato.

¹³Nejing ninche Yerusalem nepuo aailepaki olgilata le shumata le nkaji apa natijing'a: Aa Petero, Yohana, Yakobo o Anterea, Filipo o Tomas, Bartolomayo o Matayo, Yakobo le Alfayo o Simon laa olkirowuai, o Yudas ole Yakobo.

¹⁴Neiturrurro pooki anaa ake aasaisho te nebo, netii nkituaak naaisiritore, inaatii Mariamu ng'otonye Yesu o lalashera lenyena.

¹⁵Ore te nena olong'i neitashe Petero tiatua ilalashera, te eumata oo ltung'ana oobaya esiana iip o tikitam.

¹⁶Nejo, “Ilalashera laainei, meeta kata apake nemeitabari ilkigerot anaa enatejo Enkiyang'et Sinyati, eimu Daudi, eimaki Yudas, laa ninye otorikuo ltung'ana ooetuo aaibung Yesu.

¹⁷Amu ole siana ang apa Yudas neishooki ematua enye te na siaai.”

¹⁸“Neinyiang'ua ele tung'ani enkurma to lerrinyore le nkarruoisho enye, naa ine etanang'a etusulari neng'era adanya neitiakunye enkoshoke pooki.

¹⁹Nening iltung'ana pooki oomanya Yerusalem ina, nedung'oki ina kurma enkarna te nkutuk enye aajo Akeldama, (eji ‘Enkurma osarge’).

²⁰Amu etisiraki te Mbuku e Olkerempe le Nkai aajo, ‘Metomijoono enkaji enye; nelaii oltung'ani omany.’ Nchoo sii, ‘Meisiaaisho likae te rishata enye.’

²¹Ore naa oltung'ani obo le lelo ooisiritore iyiook teina kata pooki etii Yesu atua iyiook,

²²eiteru te nkibatisare e Yohana, o metabaiki ina olong nailepieki Yesu aaya keper, aaitung'uaa iyiook, meeta kata nemeaku obo le lelo shakenini le mpiunoto te nebo iyiook.”

²³Neaku etegelutua ltung'ana aare: Yosef oji Barsabas (neji sii Yustus) o Matias.

²⁴Neomon ninche nejo, “Olaitoriani, iyiolo iyie iltauja loo ltung'ana pooki. Ore te nkaraki ina, Olaitoriani, tuutaki iyiook olitudutayie te kulo pokira aare,

²⁵ojing ena rishata aaku olkipaaret neisiaaisho amu eshomo Yudas ewueji enye apake.”

²⁶Neosh enkukuo aadut nena arn pokira are. Nedoiki enkukuo Matias neikenakini encholiek e lelo kipaareta tomon o obo.