Read MAASAI REVISED PROTESTANT Iasat 11 Bible Online

Iasat 11 - MAASAI REVISED PROTESTANT bible

Iasat 11

¹Neaku etoning'o apa ilkipaareta o lalashera ootii Yudea nchere etang'amutua sii ninche loreren ororei le Nkai.

²Ore pee eilepu Petero alotu Yerusalem, neishankarrarre lelo oorrep emuratare ninye,

³aajoki, “Ishomo iyie ajing enetii Lmemurata, nilo ang'arie endaa.”

⁴Kake eiterua Petero aibalakinye ina bae aitobiraki, ajoki,

⁵“Enkanasa naji Yopa apa atii aomonito: naainepu enduaata, e ntoki natiu anaa olkarasha oing'uaa shumata oitadouni too lcholo pokira oong'uan, nelotu enatii.

⁶Neaku ore pee akurraki nkonyek aing'or, nadol ajo, ng'uesi e nkop oo nkejek maa ong'uan, o ng'uesi e ong'ata, o ntokitin naaikurtutari o motonyi e shumata.

⁷Naning sii oltoilo laajoki, ‘Inyo Petero, teyiang'a naa nosa.’

⁸Kake atejo, ‘Olaitoriani, Mme nejia, amu eitu aekata eim enkutuk ai entoki e nturuj anaa enemesinya.’

⁹Kake aatawalikia ilo toilo ajoki te nkata e are eing'uaa Keper, ‘Ore entoki naitisinya Enkai, nimintaa iyie enturuj.’

¹⁰Neikoni nejia katitin uni, neitokini aainyaaya pooki Keper.

¹¹Ore ina kata eitashe ltung'ana okuni ti auluo ina aji nikitii, eirriwuaki eing'uaa Kaisaria pee epuonu enatii.

¹²Naajoki Enkiyang'et maturubare, nemapik olng'ash. Naairiamariyie kulo alashera pokira ile; nikijing enkaji e ilo tung'ani.

¹³Neliki ninye iyiook olmalaika otoduaa te nkaji enye, otiaka, ‘Irriwai ltung'ana Yopa, mpoto Simon oji Petero;

¹⁴pee kilotu aliki irorei lijeunye, iyie o enkaji ino pooki.’

¹⁵Neaku ore pee aiteru airo nedoiki ninche Enkiyang'et Sinyati, anaa apa enatadoikio iyiook te nkiterunoto.

¹⁶Nadamu ororei lo Laitoriani, otejo apa, ‘Te nkare eibatisishe Yohana, kake keibatisae intae te Nkiyang'et Sinyati.’

¹⁷Amaa naa te neeishoo Enkai ninche enkishorunoto naaijo enapa naishoo ninye iyiook pee kiruk Olaitoriani Yesu Kristo, kara nanu ng'ae oibooyo Enkai?”

¹⁸Ore pee ening ninche nena baa negira neisis Enkai nejo, “Eishoo naa Enkai sii ninche Loreren enkirridunoto nayau puaan.”

¹⁹Neaku ore lelo ooisardakieki to lapa sina otupukuo te nkaraki Stefano nepuo o metabaiki Foinike o Kupro o Antiokia, naa Lyahudi ake einosakita ilo rorei.

²⁰Kake etii kulikae lenye, ltung'ana ooing'uaa Kupro o Kirene, laa ore pee ebaya Antiokia neinosaki sii ninche Ilyunani, nelikioo Olaitoriani Yesu.

²¹Neiriamariyie engolon o Laitoriani ninche; ore lkumok ooiruko neibelekenyakino Olaitoriani.

²²Nebaiki ina nataasa ninche nkiyiaa e ina sirit natii Yerusalem: neirriwaa ninche Barnaba meshomo Antiokia.

²³Ore pee ebaya, nedol enkiaas e mpiris e Nkai, neng'ida, neisisaki pooki nejoki metaa ilooisiligayu to Laitoriani te nkitashoto nauno oo ltauja.

²⁴Amu oltung'ani supat ninye obore Enkiyang'et Sinyati o enkirukoto. Neponikino Olaitoriani olturrur sapuk.

²⁵Neaku eshomo Barnaba Tarso aing'oru Saulo.

²⁶Ore pee etum, neriku Antiokia. Neya olari olulung'a egira ake aatumore ina sirit, neiteng'en esiamo kitok e ilo orere; naa te Antiokia eiteraki aajo lkipaareta ile Kristiano.

²⁷Ore te nena olong'i nepuonu loibonok le Nkai ooing'uaa Yerusalem aapuo Antiokia.

²⁸Ore obo lenye oji Agabus neinyototo aibonu te Nkiyang'et ajo kelotu olameyu kitok e nkop pooki; (neewuo ina aaku too nkolong'i e Klaudio).

²⁹Nedung lkipaareta aajo ore anaa enaidima oltung'ani, keirriwaki eretoto ilalashera oomanya Yudea.

³⁰Neiko nejia, neisho Barnaba o Saulo nena kishoorot meyaki ilpayiani te Yerusalem.