Read MAASAI REVISED PROTESTANT Iasat 12 Bible Online

Iasat 12 - MAASAI REVISED PROTESTANT bible

Iasat 12

¹Ore teina kata neibung olaiguanani Herode kulikae tung'ana le ina sirit pee einosie osina.

²Nejo ninye metaari Yakobo olalashe Yohana to lalem.

³Ore pee edol ajo keitiship ina Lyahudi, neitulus aibung sii Petero. Naa to sirua loo Nkolong'i oo Mukateni Nemeisuishieki.

⁴Ore pee eibung Petero, nepik jila, neitarasaki ndung'ot ong'uan oo sikarini maa oong'uan metorripo ninye, aa kejo pee eyooki arikoki olorere etulusoyie osirua oji Pasaka.

⁵Nerripi Petero te jila; kake eitirrisha ina sirit aasai Enkai naleng te nkaraki ninye.

⁶Ore ina kewarie, etaa kejo Herode pee elaku Petero, neirura Petero te rishata oo sikarini aare, eenikino lelo sikarini pokira too lpisia, nerripito kulikae sikarini kutuk aji e ina jila.

⁷Ore nabo kata neitashe olmalaika lo Laitoriani atashare ninye, neitawang ewang'an ina aji: neosh Petero ematua, neinyeyie, nejoki, “Inyo tasioki?” Neitiaari iladuoo pisia ootii nkaik teine.

⁸Nejoki olmalaika ninye, “Terretenayu, nchopo namuka.” Neiko nejia. Nejoki, “Nchopo olkila tusujuaki.”

⁹Neipang alo nesujaa sii ninye: neton meyiolo ajo kesipa ina naasita olmalaika, kejo kenduaata ake.

¹⁰Ore pee egiroo larripok le dukuya o li aare, nepuonu kishomi e sekenkei naipang'aki ina anasa; nebolo openy neipang aapuo, negiroo neng'eliki ai oitoi nabo nelo nabo kata olmalaika, ainguaa ninye.

¹¹Ore pee eputunye Petero ayiolou enaasita, nejo, “Atayiolo taa taata ajo Olaitoriani oirriwua olmalaika lenye maatasaru ang'adie enkaina e Herode, o nena pooki naayiewuaki olorere lo Lyahudi.”

¹²Ore pee eyiolou ina bae, nelotu enkaji e Mariamu, ng'otonye Yohana oji Marko naa ine esotore iltung'ana kumok eomonito.

¹³Ore pee eoshiosh kishomi, nelotu enkaisiaayiani ainining'isho, naa keji ina Rhoda.

¹⁴Ore pee eyiolou oltoilo le Petero, neng'as apal kishomi mebolo, nekuet aji te ng'ida alikioo nchere eitashe Petero te kishomi.

¹⁵Nejokini, “Oloirirua iata iyie.” Kake etareikio ninye ajo nejia etiu. Nejo ninche, “Olmalaika lenye pae!”

¹⁶Neitoki ake Petero aoshiosh kishomi, ore ade pee eboluni, nedoli ninye neing'asiae.

¹⁷Kake eiyuko ninye ninche te nkaina metigirata, neibalakinye eneikuna Olaitoriani pee esaru aitung'uaa jila. Nejoki, “Entoliki kuna baa, Yakobo nilikiki sii lalashera.” Nelo ninye, dikai wueji.

¹⁸Ore ake pee ekenyu, neng'uala sikarini oleng ejo kainyoo naawa Petero.

¹⁹Ore pee eing'oru Herode, nelau, nejur lelo sikarini ootorripo neitanapisho meewai aar metuata. Neing'uaa Herode Yudea nedoyio alo Kaisaria, nebik teine.

²⁰Ore amu etagorokine Herode lelo tung'ana le Tiro o Sidon oleng; nepuonu ninche etoning'ote enetii ninye. Neng'as ninche aaning'ore Blasto aa ninye olaing'urani le nkaji o laiguanani, nepuonu aaing'oru osotua, amu enkop e ilo aiguanani apa etumie ninche endaa.

²¹Ore teina olong nageluno neisikarra Herode aishop ilkilani le nkitoo, neton to lorika le nkitoo, neirorie olorere.

²²Nebuakita lelo tung'ana aajo, “Ole nkai ele toilo, mme olo ltung'ani.”

²³Ore nabo kata ake neosh olmalaika lo Laitoriani ninye, amu mme Nkai eishoo enkitoo, neiruj; ilkurt nedung'o tau.

²⁴Kake etubula ninye ororei le Nkai neponari.

²⁵Nerrinyunye Barnaba o Saulo eing'uaa Yerusalem, eidipa esiaai enye, neriku Yohana oji Marko.