Read MAASAI REVISED PROTESTANT Iasat 13 Bible Online

Iasat 13 - MAASAI REVISED PROTESTANT bible

Iasat 13

¹Neetae apa te sirit e Antiokia, te sirit natii ine, iloibonok le Nkai o laiteng'enak otii Barnaba, Simeon oji Olorok o Lukio le Kirene o Manaen oyati[6] lo lmarei lo laiguanani Herode o Saulo.

²Ore eseremita ninche Olaitoriani neitupukoo ate, nejoki Enkiyang'et Sinyati “Entegelakaki Barnaba o Saulo te nkaraki esiaai naipotoko.”

³Neaku ore pee eidip empukoroto neomon, neiteleiki ninche lelo nkaik, neirriwaa meshomo.

⁴Neisho Barnaba o Saulo, eirriwayie Enkiyang'et Sinyati, nedoyio aapuo Seleukia; nejing empeut teine aapuo Kupro.

⁵Ore etii Salamis, nelikioo ororei le Nkai te nkaji oo Lyahudi e ntumo; nerikito Yohana oji Marko eretito ninche.

⁶Ore pee epolos ilo odung'oro pooki aabaiki Pafo, netum olkuyantiki, oloiboni le lejare, laa Olyahudi, oji Bar-Yesu;

⁷neboitare ilo olgafanai oji Sergio Paulo, oltung'ani ng'en. Neipot ilo tung'ani Barnaba o Saulo meshomo enkang enye, eyieu nening ororei le Nkai.

⁸Kake etorishie Elimas, (amu neijia eji ewalunoto e nkarna enye), ilo taa kuyantiki ejo pee eng'adie ilo balusui enkirukoto.

⁹Kake ore Saulo, oji Paulo, eiganya Enkiyang'et Sinyati, neing'ode ninye,

¹⁰nejoki, “Aish ele obore olosek o enkarruoisho pooki, ai mipal ake mikordil inkoitoi supati o Laitoriani?

¹¹Ng'ura! Kitabaikia enkaina o Laitoriani. Naa imodoku, nimidol enkolong o metulusoi enkata naje.” Nedoiki nabo kata ninye enkirupurup o enaimin; nemanaa eing'oru olorik aibung enkaina.

¹²Ore ilo balusui, pee edol ina nataase, neiruk, eing'asie te nkaraki enkiteng'enare o Laitoriani.

¹³Nejing Paulo o encholiek enye empeut te Pafo, nepuonu Perga te Pamfilia; nelo Yohana oji Marko aing'uaa ninche teine nerrinyo Yerusalem.

¹⁴Kake etudumunye ninche te Perga, nepolos aapuonu Antiokia te Pisidia, nepuo enkaji e ntumo te nkolong e Sabato, netoni.

¹⁵Ore eidipaki aaisuma nkitanapat e Musa o loibonok le Nkai, ore ilaitoriak le ina aji e ntumo, nejoki, “Ilalashera, te niatata ororei oret olorere, eroro.”

¹⁶Neinyototo Paulo, neyuk te nkaina nejo, “Lo lewa loo Siraeli o intae ilooure Enkai, enining'o.

¹⁷Enkai e le orere loo Siraeli nategelua iloo papa, neitaa olosho kitok eton emanya Misiri neilepie enkaina enye neriku aitung'uaa ine.

¹⁸Naa ore te rishata oo larin artam neng'iri empeepeen enye ti ong'ata.

¹⁹Ore pee eidip atumuta loshon oopishana te nkop e Kanaan, neisho ninche enkop enye metujung'o, te rishata oo larin iip ong'uan o onom.

²⁰Ore etulusoitie nena neisho ninche larishak o metabaiki enkata e Samuel olapa oiboni le Nkai.

²¹Ore te siadi neomonu ninche olaiguanani, neisho Enkai ninche Saulo ole Kishi, oltung'ani lo losho le Benchamen, te rishata oo larin artam.

²²Ore pee eiwuang'ie ninye, neitasheyie Daudi metaa olaiguanani lenye, oloitaikia Enkai shakeni, nejo, ‘Anoto Daudi ole Yese, oltung'ani onyor oltau lai, oas nena pooki nayieu.’

²³Te ishoi e ilo tung'ani eitaikia Enkai Siraeli, Olaitajeunoni, Yesu anaa apa enaisiligie.

²⁴Netang'asa apa Yohana alikioo etiooyo elotunoto enye, enkibatisa naitoduaaya enkirridunoto natolikio ltung'ana pooki loo Siraeli.

²⁵Naa ore etaa keidip ninye Yohana inaaitanapaki, nejo, ‘Ijojo intae kara nanu ng'ae? Mara nanu ninye. A'a kake kelotu likae te siadi nanu, laa kaamakua te nalak nkeenta o namuka enyena.’

²⁶“Lo alashera, kira e ntalipa e Abraham, o intae kulo ooure Enkai, iyiook eirriwakaki irorei le na jeunoto.

²⁷Te nkaraki lekua oomanya Yerusalem o laitoriak lenye, amu ninye eitu eyiolou, aashu eyiolou iltoiloishi loo loibonok le Nkai ooisumi anaa ake too nkolong'i e Sabato, ninche ooitabaitie ina pee edung'oki Yesu enkiguana e keeya.

²⁸Naa ore hoo netalaita te ninye ai naitanang, etoomono Pilato meishoo ninye metari.

²⁹Re pee eitabaya nena pooki naasirakino ninye, neitadou ninye to lchani nenukaa te nkurare.

³⁰Kake eitopiwuo Enkai ninye aitung'uaa ilootuata:

³¹netoduaaki too nkolong'i kumok lelo apa ooiriamunore ninye eing'uaa Galilaya alotu Yerusalem, naa ninche taata shakeni to lorere.

³²Nikiyaki intae ilomon supati le nkisiligata naishoo apa Enkai iloo papa,

³³eneikona Enkai pee eitabaya ina te iyiook inkera enye, aitopiu Yesu anaa enaigero to Lkerempe le Nkai, le are nchere, ‘Ira iyie Enkerai ai, tele kekun aatoiwuo.’

³⁴Naa ore ina naitopiwuo Enkai aitung'uaa ilootuata, nemeitoki naa aikata arrinyokino keeya, eiroro nejo, ‘Ekaaisho iyie ilo sinyati imayianat naadede e Daudi.’

³⁵Amu etejo sii to Lkerempe le Nkai, ‘Nimincho iyie Ilo Sinyati lino epurda ang'uoyu.’

³⁶Amu ore Daudi, eidipa too rishat enyena aitabai inaaitanapishe Enkai, neirura, neirragieki te nebo iloo menye, neng'uoyu osesen lenye.

³⁷Kake ore ilo oitopiwuo Enkai eitu eng'uoyu osesen lenye.

³⁸Entayioloito naa aajo, ilalashera laainei, tele tung'ani elikini intae enkitayunoto oo ng'ok:

³⁹naa te ninye eoruni ntiyot pooki ng'ae oiruk ninye, neikenakini esupatisho te Nkai nemetum too nkitanapat e Musa.

⁴⁰Entodol naa ate, meinepu intae enapa nairoro iloibonok le Nkai aajo:

⁴¹‘Eng'ura intae, ilasurdaanyak, ning'asiasia nindaayaya; amu keeta enaas too nkolong'i inyi amu ore enkiaas naas nemeeta nchere iruko, te neliki intae likae.’ ”

⁴²Ore eipung Paulo o Barnaba aapuo, nesai menyaaki aaigilie lelo omon te nkolong e Sabato nasuju ina.

⁴³Ore pee eidapasha entumo, nesuj Ilyahudi kumok o kulikae ooure Enkai Paulo o Barnaba: neirorie ninche lelo neitirrishaki metobiko te mpiris e Nkai.

⁴⁴Ore te nkolong e Sabato natusujua ina, peno eitu etumokino ine enkanasa nalulung'a aaning ororei le Nkai.

⁴⁵Kake, ilo orere ake etoduaa Ilyahudi, neigany olom, neishankarru nena naatejo Paulo, nemor Enkai.

⁴⁶Neiro Paulo o Barnaba aashirraki, nejo, “Keishiaakino naa intae eiteraki aaliki ororei le Nkai. Kake ore amu itanang'aitie, nitoduaa oopeny nchere meishiaakino intae enkishui nemeish, kipuo iyiook enetii Loreren.

⁴⁷Amu ina doi eitanapa iyiook Olaitoriani, ajoki. ‘Aaitaa iyie ewang'an oo Loreren, peyie iyau iyie enjeunoto o metabaiki ineeiting'ie enkop.’ ”

⁴⁸Ina ake etoning'o loreren, neng'ida oleng, neisho ilo rorei le Nkai enkisisa: ore lelo oogelakino enjeunoto neiruk.

⁴⁹Neibulunyeki ororei lo Laitoriani ilo kirine pooki.

⁵⁰Kake eshomo Lyahudi aaisur nkituaak naayanyiti, o lewa ooitore ina anasa, neing'oling'ol pee einyali Paulo o Barnaba, nearari metung'uai ilo Kirine lenye.

⁵¹Kake eipiripirokito ninche enterit oo nkejek enye, nepuonu Ikonio.

⁵²Neiput lkipaareta enchipai o Enkiyang'et Sinyati.