Read MAASAI REVISED PROTESTANT Iasat 14 Bible Online

Iasat 14 - MAASAI REVISED PROTESTANT bible

Iasat 14

¹Neaku ore te Ikonio, nejing Paulo o Barnaba enkaji e ntumo oo Lyahudi te nebo, neiro o meiruko esiamo kitok oo Lyahudi o enoo Ilyunani.

²Kake eing'oling'ola lelo Yahudi leitu eiruk iltung'ana loo Loreren, neitagogong iltauja tialo lalashera.

³Neaku etobiko naleng lelo kipaareta teine eshirraki aairo tiatua Olaitoriani, neitadedeyie ninye ilo rorei le mpiris enye, neishoru metaasi ilmonek o mbaa e nking'asia too nkaik enye.

⁴Kake etoorote olorere le ina anasa neibung'are kulikae Ilyahudi, neibung'are kulikae lkipaareta.

⁵Ore pee edumakino ndung'ot pokira, Iloreren o Lyahudi o laitoriak lenye pee esul ninche aaitukurru, nenang'i too soito,

⁶neiyiolou ninche ina, neisikaki Listra o Derbe nena anas e Likonia o lelo kirinen oomanita:

⁷nelikioo ororei le Nkai te nene wuejitin.

⁸Ore apa te Listra netii oltung'ani otonita maima, olaa olmaima pee eini, leitu ai kata elo too nkejek.

⁹Nening ninye Paulo eiro, ore Paulo, nekurraki nkonyek nedol ajo keeta enkirukoto pee eishiunyeki,

¹⁰nejoki to ltoilo sapuk, “Ntasho ntoriori too nkejek inono!” Neitiamu aitashe nelo.

¹¹Ore pee edol esiamo ina nataasa Paulo, neilepie ltoiloishi, aajo te nkutuk oo Likonia, “Etadoutuo nkaitin naatiu anaa ltung'ana!”

¹²Nejo Barnaba Seu; nejo Paulo Herme, amu ninye oljartan to rorei.

¹³Nereu olapolosani le Seu otii olkitaret lenye auluo ina ang ilmong'i neyau lmarisian kishomi, naa anaata etopolosishote te nebo o nena siamon.

¹⁴Kake ore pee ening ilkipaareta ina, Barnaba o Paulo, nepolos ilkilani lenye, neipang'u te siamo, ebuakita neishir,

¹⁵nejo, “Lo kituaak! Kainyoo pee nkoko nji? Kira sii yiook iltung'ana ake laaijo intae, naa lomon supati kiyaki intae, pee imbelekenyanya, aaing'uaa kuna nemeeta tipat aaing'oru Enkai naishu, naitobira Keper o enkop o naaiposha, o nena naatii pooki:

¹⁶olaa ninye oishoo loreren pooki too lajijik ooishari meshomo loshon too nkoitoi enye maate.

¹⁷Kake eitu sii epal kewan meeta ake shakeni enye, amu etaasa supati, neisho intae enchan eing'uaa shumata neisho intae larin oosinyunye, neitaraposh iltauja linyi te ndaa o te ng'ida.”

¹⁸Naa te pesho ade te kulo rorei etomitikio Paulo nena siamon epolosaki ninche.

¹⁹Kake eetuo Lyahudi ine ooing'uaa Antiokia o Ikonio: ore pee eitoosh isiamon, nenang Paulo too soito neikurtutaa auluo ina anasa, ejo ninche ketua.

²⁰Kake ore pee eitashe lkipaareta aaman, neinyototo, nejing ina anasa: ore pee ekenyu nepuku o Barnaba aapuo Debe.

²¹Ore pee elikioo ororei supat teina anasa, neitaa lkumok lkipaareta, nerrinyo Paulo o Barnaba aapuo Listra, o Ikonio o Antiokia.

²²Neitagol lkipaareta ltauja, nekurraki metobiko tiatua enkirukoto, “Amu kumok isinaitin likiimaa kijing enkitoria e Nkai”.

²³Ore pee egelaki ninche lpayiani too sirito enye pooki, neomonoki ninche Olaitoriani, egira aitupukoo ate, ilo laa ninye eiruko ninche.

²⁴Neimaa Pisidia, nepuonu Pamfilia.

²⁵Ore pee einosaa ilo rorei te Perga, nedoyio aapuo Atalia;

²⁶nejing empeut te ine aapuo Antiokia, enapa wueji neisiligieki ninche empiris e Nkai te nkaraki ina siaai naitabaitie.

²⁷Ore pee ebau, neiturrur esirit te nebo, neinosaki nena pooki naataasishore Enkai ninche, ina nataboloko loreren enkoitoi e nkirukoto.

²⁸Nebik ninche teine nkolong'i kumok te nebo o lelo ooiteng'eni.