Read MAASAI REVISED PROTESTANT Iasat 15 Bible Online

Iasat 15 - MAASAI REVISED PROTESTANT bible

Iasat 15

¹Nedou kulikae tung'ana ooing'uaa Yudea neiteng'en ilalashera, aajoki, “Te nememurati intae anaa enaitanapishe Musa, nimindimidimi aatajeu.”

²Ore pee eishankarrarre Paulo o Barnaba ninche neirish aaiguanare too mbaa kumok, negelu lalashera Paulo o Barnaba o kulikae ake lenye, meshomo Yerusalem eitarioo esirit ninche, neimaa Foenike o meshomo Yerusalem enetii lkipaareta o lpayiani te nkaraki ina bae.

³Ore taa pee eitarioo esirit ninche, neimaa Foinike o Samaria, einosaa enkibelekenyata oo ltung'ana loo Loreren; neyaki lalashera pooki eng'ida kitok oleng.

⁴Ore pee epuonu Yerusalem, neng'amu ina sirit o lkipaareta o lpayiani, neinosaki mbaa pooki naataasie Enkai ninche.

⁵Kake einyieito kulikae le ncholiek oo Lfarisayo ooiruko, nejo, “Meeta nchere pee memurati ninche, neitanapi meibung'a nkitanapat e Musa.”

⁶Netumo lkipaareta o lpayiani te nebo aaimaki ena bae.

⁷Ore etoodoro enkiguana narrish, neinyototo Petero, nejoki ninche, “Ilalashera laainei, iyiololo aajo ore apa te nkata naado etegelua Enkai obo linyi, peyie aa te nkutuk ai ening ltung'ana loo Loreren ororei supat, neiruk.

⁸Ore Enkai nayiolo ltauja le pooki ng'ae, neaku shakeni te ninche aisho Enkiyang'et Sinyati, anaa enapake naishoo iyiook;

⁹neitu epik olgelati arish iyiook o ninche, neituku ltauja lenye te nkirukoto.

¹⁰Oo naa taata pee itemiteme intae Enkai, aaiteleiki enchata murto oo lalashera, eneitu eidim iloo papa neitu kindim iyiook aatanap?

¹¹Kake, kiruko iyiook nchere te mpiris e Yesu Kristo kijeu iyiook, naa nejia etiu ninche.”

¹²Negira olturrur pooki; neinining Barnaba o Paulo einosaki nkitoduaat o ne nking'asia naataasie Enkai ninche too ltung'ana lo Loreren.

¹³Ore pee egira ninche, newalu Yakobo nejo, “Ilalashera, entoning'oki:

¹⁴einosua Simeon eneikuna apa Enkai pee ebaiki ltung'ana loo Loreren, agelu tiatua ninche ltung'ana le nkarna enye.

¹⁵Neitadedeyie ina naairoro iloibonok le Nkai anaa enatisiraki nchere,

¹⁶‘Ore pee elusoo kuna karrinyunye nanu, naa kaitoki ashetu enkaji e Daudi e nkomono naturori; naa kaitoki ashet ilmuaateni lenye: naitasheyie nanu:

¹⁷pee eing'oru ltung'ana ootelekutua Olaitoriani, lelo tung'ana pooki loo loreren, ooipotieki enkarna ai.

¹⁸Olaitoriani ojo, ololimu apa kuna baa te nkiterunoto e nkop.’

¹⁹Ore te nkaraki ina, neiguana aajo, emikintanyamal lelo loo Loreren ooibelekenyakino Enkai;

²⁰kake emaigeroki metalama lkereu loo nkiri naapolosakini nkitanyaanyukot naaitaai nkaitin, nelam eloloito, o ntokitin naagori, o sarge.

²¹Amu eeta Musa too lajijik o lajijik te nkanasa ake pooki lelo oolikioo ninye, eisumitai ninye anaa ake too nkolong'i e Sabato too nkajijik e ntumo.”

²²Nedol ilkipaareta o lpayiani o ina sirit pooki aajo sidai te negeluni ltung'ana le ina sirit enye, neirriwari Antiokia te nebo Paulo o Barnaba. Negelu Yudas oji Barsaba o Sila, laa larikok too lalashera.

²³Neigeroki lelo nejo, “Ilkipaareta o lpayiani alashera ooigeroki ilalashera oora iloo Loreren te Antiokia o te Siria o Kilikia, kiroroki intae;

²⁴te nkaraki naa ai kitoning'o aajo etii kulikae ooing'uaa atua iyiook ooetuo aaitanyamal intae too rorei neitapong'oo ltauja linyi; neitu kincho iyiook ninche imbaa naayaki ninche intae;

²⁵nikidol iyiook eishiaakino, kitoning'okinote nabo, nikigelu lewa likirriwaki intae meiriamunore ilaisotuak lang Barnaba o Paulo,

²⁶iltung'ana ootipika bata enkishon enye te nkaraki enkarna o Laitoriani lang Yesu Kristo.

²⁷Kirriutua naa Yudas o Sila naa ninche maate ooliki intae kuna baa te nkutuk.

²⁸Amu etoduaa Enkiyang'et Sinyati o iyiook; nchere pee mikinteleiki intae likae ola olusoo te kuna baa naata tipat;

²⁹nchere entirishie ate nkiri oo ntokitin naapolosakini nkitanyaanyukot naaitaai nkaitin, o sarge o ntokitin naagori, o eloloito; amu te nintalamilama ate nena, nitaasa supati. Ayia sere.”

³⁰Ore ninche, pee eishori epuo, nedoiyio aapuo Antiokia; ore pee eiturrurru olorere te nebo, neitarasaki ina palai.

³¹Ore pee eisum ninche, neng'ida te nkaraki ina kilejilejata.

³²Ore Yudas o Sila amu loibonok le Nkai sii ninche maate, neinosaki lalashera nkumok neitagol.

³³Ore ewaita enkata ebikito teine, neitanapare ilalashera ninche te seriani neisho enetii lelo apa ooirriutua ninche.

³⁴[Kake etoduaa ninye Sila ajo keishiaakino neton teine.]

³⁵Kake etobiko ninche Paulo o Barnaba te Antiokia eiteng'enisho nelikioo ororei lo Laitoriani, te nebo sii kulikae kumok.

³⁶Ore etulusoitie nkuti olong'i nejoki Paulo Barnaba, “Manyaai aabaiki ilalashera too nkanas apa pooki nikinosakita ororei lo Laitoriani, pee kidol eneikununo.”

³⁷Neyieu Barnaba neshoroo Yohana oji Marko meiriamariyie.

³⁸Kake etoduaa Paulo ajo mme sidai te nerik oltung'ani apa otorrinye aing'uaa ninche te Pamfilia, leitu erubare ninche te siaai.

³⁹Nejing empong'o o metooroto olikae o likae, nerik Barnaba Marko pee eiriamari nejing empeut aapuo Kupro.

⁴⁰Kake etegelua ninye Paulo Sila, nepuo, neitanap ilalashera ninche neomonoki empiris e Nkai.

⁴¹Neimaa Siria o Kilikia neitagol nena sirito.