Read MAASAI REVISED PROTESTANT Iasat 17 Bible Online

Iasat 17 - MAASAI REVISED PROTESTANT bible

Iasat 17

¹Nepuo Paulo o silaima Amfipoli o Apolonia o meetu Sesalonike, netii ine enkaji oo Lyahudi e nkomono.

²Nelo Paulo nejing ine anaa olkuaak lenye. Ore te rishata oo wikii uni neishankarrarre oloreretoo lkigerot,

³eliki enajo neitadedeyie ti atua ninche nchere meeta apake kata nemeinosieki Kristo osina, neitoki ake apiu too lootuata. Nejoki, “Naa ele Yesu laliki intae, ninye doi Kristo.”

⁴Nenyorraa kulikae lenye nena neaku ile nkalo e Paulo o Sila, naa nejia etiu Lyunani kumok ooserem Enkai, neme kuti sii ninche nkituaak arikok naairuko.

⁵Kake eishoo ninche Lyahudi te nkaraki olom nepuo aasotu ilarruok o lwushuush too neemirishoreki, nesotu esiamo neliman ina anasa pooki; nerasaki enkaji e Yason, ejo pee erikoki ninche lelo tung'ana.

⁶Ore pee elau, neikurtutaa Yason o kulikae le lelo alashera aayaki ilaitoriak le ina anasa, ebuakita aajo, ore “Kulo tung'ana ooijulujulo enkop aitala eseriani neetuo sii ene;

⁷naa Yason otang'amua arik enkaji enye: neetuo pooki aas inemeishoruno aakesh Kaisari, ejo eji eetae likae aiguanani oji Yesu.”

⁸Neng'uyan ninche ilo orere o lelo aitoriak le ina anasa pee ening ilo rorei.

⁹Ore pee eya te Yason o te lelo kulikae mpisai naaisiligieki, neisho meshomo.

¹⁰Ore ake pee emutu neisikie nabo kata lelo alashera Paulo o Silas kewarie meshomo Berea. Ore pee ebaya ninche ine nepuo aajing enkaji oo Lyahudi e nkomono.

¹¹Neaku kening'isho ninche lelo metiu anaa ile Sesalonike, amu etang'amutua ilo rorei eyieu to lokiyo sapuk, nejur ilkigerot anaa ake pee edol te naa ai nejia etiu kuna baa.

¹²Neaku eiruko lkumok lene te nkaraki ina, o meiruko sii ninche nkituaak neme kuti naa nkarikok o Lyunani, o lewa leme kuti sii ninche.

¹³Ina ake etoning'o Lyahudi le Sesalonike nchere etolikioyie Paulo ororei le Nkai te Berea, neitoki ake aapuonu ine, neing'oling'ol olorere aaitanyamal.

¹⁴Nerik nabo kata lelo alashera Paulo meshomo o meitabaiki enaiposha: neng'as ninche Silas o Timoteo aabik teine.

¹⁵Ore lelo ootoriko Paulo neitabau Atene. Ore eitanap Paulo ninche aisho olkilikuai oyaki Silas o Timoteo metasieku ine, nerrinyo aapuo.

¹⁶Ore eanyita Paulo sils o timoteo te Atene, nenyamalu naleng te kewan enye etoduaa eneba enkumoi oo nkitanyaanyukot naaitaai nkaitin teina anasa.

¹⁷Neishankarrarre Lyahudi o lkulikae tung'ana ooserem Enkai te nkaji e nkomono, o te nemirishoreki anaa ake, ilo oba anaa lootumore.

¹⁸Neetae sii kulikae ang'eni teine, ooji ile Epikureo looji ile Stoiko oonotore ninye. Nejo kulikae lenye, “Kejo aa ele shoshoroi?” Nejo kulikae, “Ketiu anaa nkaitin eeiking'a elimu;” naa te nkaraki natolimuo Yesu o empiunoto.

¹⁹Metaa ninche ootudumutua Paulonerik olkiu te wueji neji Areopago, ejoito, “Kaa kiteng'enare ng'ejuk ena nilimu amu eikiyieu nikiyiolou?

²⁰Amu eijo keitu aekata kining kuna baa nilimu: kiyieu naa nikiyiolou enajo kuna baa.”

²¹(Naa ore lelo tung'ana pooki le Atene o lomon ootii ina anasa, meeta ai naas neme ketoni ake aairo, einosakino aashu einining'u embae ake pooki ng'ejuk.

²²Metaa neitashe Paulo te dukuya ilo kiu le Areopago, nejo, “Lo lewa le Atene, adolita ajo ore te pooki oitoi irara ilaseremak oleng.

²³Amu ore aloito, nadol olperere lo lasar oigero ajo nji, ‘ENE ENKAI NEMEYIOLOI.’ Ore naa ina Ai niserememe miyiololo ninye ena naliki nanu intae.

²⁴Ore ina Ai naitobira enkop o ntokitin pooki, aa ninye taa Olaitoriani le shumata enkop, mme nkajijik naaitobiri too nkaik emany ninye.

²⁵Neme too nkaik eisiaai ninye, anaa keeta ae toki nayieu, naa ninye sii doi oisho pooki ng'ae enkishui, o enkiyang'et, o pooki toki.

²⁶Naa te ilo tung'aniobo eitobira iloreren pooki te nkop, metamanya oriong e nkop. Naa ketang'asa te dukuya aitaiki rishat o lpolosien oorish ineemany.

²⁷Neitaa ninche peyie etum aaing'oru Enkai, pee ebaiki ake neirrapirrapu, nebaiki netum. Hoo nemelakuaniki ninye hoo obo lang,

²⁸amu, ‘Ninye kinchuyie, naa ninye kipuoyie, naa ninye pee kira.’ Anaa enatejo likae aranyani linyi otejo, ‘Kira sii iyiook eishoi enye.’

²⁹Te nikira naa eishoi e Nkai, emikintoki naa ake aajo eji ketiu empukunoto e Nkai anaa saabu, anaa enkosholai, anaa osoit oguetu enkarriyiano aashu endamunoto olosek le tung'ani.

³⁰Te nkaraki ina pee eimula Enkai enkong'u te nena katitin e modai; kake ore taata eitanapa ajoki ltung'ana te pooki wueji, ‘Embelekenyata entung'uai nkoitoi inyi e nkarruoisho.’

³¹Amu eidipa ninye atuuno enkolong, nayooki aiguanare enkop too sipat, te ilo tung'ani otegelua. Naa ninye eitadedeyie ninye too ltung'ana pooki, eitopiwuo ilo aitung'uaa ilootuata.”

³²Ore pee ening ninche eimaki empiunoto oo lootuata neikordod kulikae; kake etii kulikae lenye ootejo, “Kintoki ake aainining iyie te likae kekun.”

³³Metaa nepuku Paulo alo aing'uaa.

³⁴Kake etii kulikae ootaa le nkalo enye neiruk: ilootii Dionisio, obo le lelo le Areopago, o enkitok naji Damaris, o kulikae ake.