Read MAASAI REVISED PROTESTANT Iasat 22 Bible Online

Iasat 22 - MAASAI REVISED PROTESTANT bible

Iasat 22

¹“Ilalashera laainei o loo papa, entoning'oki te kuna namitunye kewan te dukuya intae.”

²Ore pee ening'i aajo enkutuk oo Lbrania eirorie, neitirring'a oleng aainining. Nejo,

³“Kara Olyahudi, naa te Tarso e Kilikia aaini, kake te na anasa aaitubuluaki too nkejek e Gamaliel, naaiteng'eni te risioroto oo nkitanapat oo loo papa naarrish, naata olokiyo te Nkai anaa ena nitiuu pooki tele kekun.

⁴Aisilisilo nanu iltung'ana lena Oitoi o metuata naen anang'aki jila ilewa o nkituaak,

⁵naa olchakeni lai olapolosani kitok naa nejia etiu olkiaama pooki loo lpaiyiani. Ninche laaishoo mpala nayaki lalashera, pee adumunye alo Dameski aibung lelo ootii ine ayau Yerusalem eena pee eitamei.

⁶“Ore aloito atinyikaka Dameski, etaa enaipirie enkolong newang'u nabo kata ewang'an naing'uaa shumata naaman.

⁷Nabatata te nkop naning oltoilo laajoki, ‘Saulo Saulo ainyoo pee kisilisil?’

⁸Nawaliki ajoki, ‘Olaitoriani, aira ng'ae?’ Naajoki ninye, ‘Kara Yesu le Nasaret lisilisilito!’

⁹Ore lelo laairiamariyie nanu nedol ina wang'an kake eitu ening oltoilo le ilo laairorie.

¹⁰Najo, ‘Olaitoriani, kaji aiko?’ Naajoki Olaitoriani, ‘Inyo, shomo tijing'a Dameski, paa teine kilikini nena pooki nikitegelakaki taasa.’

¹¹Ore amu meekure adolisho te nkaraki ina wang'an, naariki aaibung enkaina lelo ootii te nebo nanu, o maetu Dameski.

¹²“Netii ine oltung'ani obo oji Ananias, oserem ninye Enkai anaa enajo nkitanapat, ooilet Ilyahudi pooki te supatisho, laa ine nemanya ninye.

¹³Nelotu ilo enatii, neitashe tialo nanu naajoki, ‘Olalashe lai Saulo, todolisho.’ Ore teina saa ake nadolishoyu nadol ninye.

¹⁴Nejo ninye, ‘Enkai oo loo papa nikitegelua tayiolo yieuna enye, nikincho toduaa ilo obo Asipani nining oltoilo te nkutuk enye;

¹⁵amu iaku shakeni lenye too ltung'ana pooki te nena nitoduaa o nitoning'o.

¹⁶Kainyoo naa taata ianyita? Inyo mikimbatisai, intukuoi ing'ok inono, impoto enkarna enye.’

¹⁷“Ore pee aidip atushukunye Yerusalem aomonito te nkaji e Nkai, naainepu enduaata

¹⁸nadol aajoki ninye nanu, ‘Isarisara tasiooi tung'uai Yerusalem, amu meng'amaa hoo ninche shakenisho ino tialo nanu.’

¹⁹Najo, ‘Olaitoriani, eyiolo ninche maate enaikuna meeta enkaji e ntumo neitu ajing napik jila naar lelo likiruko.

²⁰Naa ore pee eibukori osarge le Stefano olchakeni lino, aitashe sii nanu atonyorrayie, naa nanu oitasheikio nkilani e lelo ootara.’

²¹Naajoki ninye, ‘Shomo, amu nanu laairriwaa neelakua shomo enetii Loreren.’ ”

²²Neinining lelo tung'ana Paulo o metejo ele rorei; nejo ake nejia, neilepie pooki ltoiloishi nejo, “Ewuang'ie ele tung'ani te nkop! Amu meishiaakino neishu!”

²³Ore ebuakita neisuaakita ilkilani lenye nekur enterit aaisuaaya,

²⁴neitanapisho ilo kitok loo sikarini meyauni Paulo atua emanyata enye, nejo metaari meiroro, pee eyiolou enatabuaakinye ninche ninye.

²⁵Ore eidipaki aateen too nkeenta, nejoki Paulo osajini oitasheiki, “Keishiaakino pasa neidong'i oltung'ani loo Roma, leitu eng'asi aaiguanare?”

²⁶Ore pee ening ilo sajini ina nelo enetii olkitok loo sikarini nejoki, “Kaa bae ena nijo aas? Amu oloo Roma ele tung'ani.”

²⁷Metaa nelotu ilo kitok enetii Paulo nejoki, “Tolikioki sii iyie japa, eji ira doi oloo Roma?” Nejoki Paulo, “Ee.”

²⁸Newaliki ilo kitok loo sikarini ajoki, “Kainyiang'ua nanu ina kiela too ropiyiani kumok oleng.” Nejoki Paulo, “Kaikino nanu.”

²⁹Metaa nepuo nabo kata aalam lelo apa oojo pee epuonu aajur; neureshoyu sii ninye ilo kitok loo sikarini amu etayiolo ajo oloo Roma Paulo neidipaki aateen.

³⁰Kake ore pee ekenyu, neyieu ake olkitok loo sikarini neyiolou enaitang'orie Lyahudi Paulo pee eisitaaitie, nelaku ninye, nejoki lapolosak kituaak o lkiaama pooki menototo, neriku Paulo neitasheyie te dukuya ninche.