Read MAASAI REVISED PROTESTANT Iasat 23 Bible Online

Iasat 23 - MAASAI REVISED PROTESTANT bible

Iasat 23

¹Neing'or Paulo olkiaama akurraki nkonyek, nejo, “Ilalashera laainei, aitasho te dukuya Enkai o metabau ele kekun aata oltau sidai.”

²Nejoki olapolosani kitok oji Ananias lelo ooitashe aatashare Paulo metooshi enkutuk.

³Nejoki Paulo, “Enkai nikiyiooki aosh iyie, olaaijo esuntai naiborrieki! Aiton pee kinguanare too nkitanapat e Nkai nintoki apaash enajo nena kitanapat ajo maatooshi?”

⁴Nejoki lelo ooitashe teine, “Kolapolosani kitok le Nkai imor?”

⁵Nejo Paulo, “Te nkaraki naa aimayiolo lalashera laainei, ajo ninye olapolosani kitok, amu etisiraki aajo, ‘Mijo ake ine nkarruoisho tialo oloitore olorere linyi.’ ”

⁶Kake ore pee edol Paulo ajo Isadukayo enchoto nabo naa Ilfarisayo enkae, nebuaku ajo to lkiama, “Ilalashera laainei, kara nanu Olfarisayoi naa Ilfarisayo laaiu; olapa siligi o empiunoto oo lootuata doi pee aaiguanareki.”

⁷Ore pee ejo nejia, nepuku empong'o too Sadukayo o Lfarisayo, neoro olkiooma.

⁸Amu kejo Ilsadukayo meetae empiunoto, nemeetae ilmalaika, nemeetae enkiyang'et; kake kenyorraa ninche Ilfarisayo nena pooki.

⁹Nepuku olong'oling'oli kitok; neinyiototo kulikae aiteng'enak loo nkitanapat Farisayo neiguana nejo, “Eitu hoo kitum iyiook entioto tele tung'ani. Oo doi te naa ke nkiyang'et aashu olmalaika oirorie?”

¹⁰Ore pee eaku keibelekenya empong'o aaku olarrabal, nedol ilo kitok loo sikarini, neureyu ajo kepolosi Paulo aaitaa ng'urrot, neirriwaa sikarini metadoi aayau ninye te ngolon aaitung'uaa ninche neyau emanyata.

¹¹Ore te nkae kewarie natusujua ina, neitashe Olaitoriani tialo Paulo nejo, “Intagoluoyu, amu ore anaa ina nikinchakenoko nanu te Yerusalem, nejia kiyiooki aiko aishakenoki te Roma.”

¹²Ore pee ekenyu neiguana Lyahudi nenya olmumai pee menya endaa nemeok ae toki o metaba anaa near Paulo metua.

¹³Negiroo artam ilooinosa ina kiguana enkarruoisho.

¹⁴Nepuo lelo enetii ilapolosak kituaak o lpayiani; nejo, “Kiteena ate katukul to lmumai nchere mikinchamisham endaa o metaba anaa nikiaar Paulo metua.

¹⁵Enyoito intae, o lkiama, entiaaki taata olkitok loo sikarini meitadou Paulo, entaakunoto keeta eniyieuu nisipunyenye aabaraki. Amu kitanapate iyiook pee kiar metua eton eitu enyikaki intae.”

¹⁶Nening olayioni le nkanashe Paulo ina rreshoto enye nelo ajing emanyata neliki Paulo.

¹⁷Neipot Paulo obo le lelo sajinini nejo, “Toriko ele barnoti enetii olkitok loo sikarini, amu keeta enayieu nejoki.”

¹⁸Nerikoki olkitok loo sajinini nejo, “Paulo oloshi oena laaipoto naajoki maatorikoki ele barnoti, amu keeta enikijoki.”

¹⁹Neibung ilo kitok enkaina nerik enkilepata neikilikuan too nkurrat ajoki, “Kaa kiyieu nikijoki?”

²⁰Nejoki, “Eiguanate Ilyahudi pee kipuonu aaikilikuan tayooki taaisere intadoi Paulo meshomo enetii olkiaama, anaa keeta enayieunye pee epuo aajur oleng.

²¹Kake minyorraa ina nayieu ninche; amu artam nadooyo iltung'ana lenye ootii olnukata aaresh ninye, eteena ate to lmumai aajo menya endaa nemeok toki mme keidipa aatar Paulo metua; neidipa taata aatanapata, iyie eanyita tonyorrai ina.”

²²Neisho ilo kitok loo sikarini olbarnoti elo neitirrishaki ajoki, “Nimiliki ake likae tung'ani ajo kitolikio ena bae.”

²³Neitoki ilo kitok loo sikarini aipot isajinini aare nejoki, “Ore te saa uni e nkewarie enchoo enapa sikarini iip are te nebo intomoni naapishana loo mbartan o loo remeta iip are oopuo aabaya Kaisaria.

²⁴Naa erotoki sii Paulo embarta naked, entorikoki olgafanai Feliks.”

²⁵Neiger empalai ajo nji:

²⁶“Nanu Klaudio Lisia laairoroki, Oloyanyiti Olbalusui Feliks.

²⁷Ele tung'ani eibung'a Lyahudi, naa anaata etara metua, neaku ainepua aata sikarini nasaru, atayiolo ajo oloo Roma.

²⁸Ore ajo pee ayiolou embae naisitaarieki nariku aitadoiki olkiaama lenye.

²⁹Nayiolou ajo mbaa oo nkitanapat enye eisitaarie, kake meeta enataasa nairirikino keeya anaa eenata.

³⁰Ore pee aarojakini nchere einosaki enkiguana pee eari ele tung'ani metua, nairriu nabo kata enitii iyie, naitanap lelo ooisitaaya meetu aalimu te dukuya iyie enaatakinore ninye.”

³¹Neaku etoriko isikarini Paulo anaa enaitanapaki nerik kewarie o meitabaiki Antipatri.

³²Neyooki enkolong natusujua ina aashukunye emanyata, neing'ueikini iloo mbartan metoriko aapuo.

³³Ore pee epuonu Kaisaria neitarasaki olgafanai empalai, neitarasaki sii Paulo ninye.

³⁴Ore pee eisum olgafanai empalai, neikilikuan ajoki kalo osho ing'uaa?. Ore pee eyiolou ajo ole Kilikia

³⁵nejo, “Kaayooki ainining te nebau lelo likintang'or.” Neitanapisho metorripi te nkaji e Herode e nkitoo.