Read MAASAI REVISED PROTESTANT Iasat 24 Bible Online

Iasat 24 - MAASAI REVISED PROTESTANT bible

Iasat 24

¹Ore etulusoitie nkolong'i miet nedou Anania olapolosani kitok o kulikae payiani o ltung'ani olotu airo te rishata enye, oji Tertulo. Nepuonu aainosaki olgafanai nena baa naaitang'orie Paulo;

²ore pee eipoti Paulo neiteru Tertulo aitang'or Paulo ejo: “Ore amu iyie pee king'idare ena seriani kitok, naa te leng'on ino, Oloyanyiti Feliks, pee eibelekenyitai mbaa aaitang'ejuk tele orere,

³niking'amaa nena te nashe too nkoitoi pooki o te pooki wueji.

⁴Kake ore pee mikintoki aaibok iyie, naaomon to lng'ur lino toning'o iyiook too ndorropu.

⁵Amu kinoto aajo serseri ele tung'ani naa oltang'oroi too Lyahudi pooki te nkop pooki, naa ninye obo loo larikok le na kiteng'enare kilaut naji eno Lnasarayoi.

⁶Ketetema doi ninye ajo aisarkionie enkaji e Nkai paa iyiook ooibung'a.

⁷[Eikijo apa iyiook pee kinguanare too nkitanapat ang, kake Lisia olkitok loo sikarini oewuo newuapaa aoru iyiook te ngolon oleng.

⁸Neitoki ake Lisia aitoreisho nejo meetu lelo ooitang'or dukuya iyie.] Te nijur ele tung'ani, naa iyiolou iyie openy esipata e nena nikintang'orie.”

⁹Neirukoki Ilyahudi ina kitang'oro, neitisip aajo nejia etiu.

¹⁰Ore pee eisho olgafanai Paulo meiroro, newal Paulo nejo: “Ore amu kayiolo ajo kumok ilarin intore ele orere, kashipa amitu kewan.

¹¹Te niyieu naa indim aitadedeyie nchere, eitu egiroo tomon o aare nkolong'i anaa nailep alo aserem Enkai te Yerusalem;

¹²neitu aainepu ninche aishankarrarre likae tung'ani aashu aing'oling'ol iltung'ana, te nkaji e Nkai, aashu too nkajijik e ntumo aashu teina anasa.

¹³Nemeidim doi ninche aaitadedeyie kuna naapuonu aaitang'orie.

¹⁴Kake kanyorraa ena nabo te dukuya iyie, nchere tena Oitoi, najo ninche enkiteng'enare kilaut[7] aserem nanu Enkai oo loo papa, airukito mbaa pooki naalimuno too nkitanapat anaa too naaigero too mbukui oo loibonok le Nkai.

¹⁵Kaata osiligi te Nkai naa kenyorraa sii ninche kulo nchere kelotu empiunoto e lelo ooata esipata o lemeeta.

¹⁶Metaa anyokita oshi ake pee aata oltau sidai tialo Enkai o tialo ltung'ana.

¹⁷Ore det etulusoitie lkuti arin nalotu ayaki olorere lang nkishorunot naaretieki laisinak nkishorunot e nashe.

¹⁸Ore aa ina aasita, naainepu aadipaki aaitisinya te nkaji e Nkai, nemetii olorere aashu eliman. Kake eetae Lyahudi le Asia

¹⁹laa keishiaakino naaji netii ene pee aapuonu aaitang'or, te naa keeta enaatakinore.

²⁰Aashu doi elimu ninche kulo maate aajo kaa torroni apa aanotie pee aitashe te dukuya olkiaama,

²¹neme ena nabo ake natabuakua aitashe te dukuya ninche ajo, ‘Te nkaraki e mpiunoto oo lootuata pee aitashe te dukuya intae maaiguanareki tele kekun.’ ”

²²Kake ore ninye Feliks, amu ketiu anaa ketabaraka ayiolou ena Oitoi, neilitilit, nejoki, “Ore pee edou Lisia, olkitok loo sikarini naadung'oki enkiguana.”

²³Neitanap osajini metorripi kake meitirrishi sii, nememitikini lchoreta lenyena epuonu aaret anaa enayieu.

²⁴Ore eshomo nkuti olong'i nelotu Feliks o enkitok enye naji Drusila, naa Eyahudi ninye; nejo meipoti Paulo meinining'o eimaki enkirukoto nairuki Yesu Kristo.

²⁵Ore pee elimu mbaa naaipirta enkiguana oo sipat o enkibooroto naaibooyo oltung'ani e kewan arishie ntorrok, o enkiguana kenya nalotu, neureishoyu Feliks nejo, “Shomo taata; ore pee atum erishata naaipot.”

²⁶Ore eyia nejia naa kejo apa kebaiki neisho Paulo mpisai. Neaku keirriwaa lkiliku nkatitin kumok neinosie lomon.

²⁷Kake ore pee elusoo larin aare, neirriuni Porkio Festo meetijinga erishata e Feliks; ore ninye Feliks ejo pee eitiship Ilyahudi, neing'uaa Paulo te jila.