Read MAASAI REVISED PROTESTANT Iasat 4 Bible Online

Iasat 4 - MAASAI REVISED PROTESTANT bible

Iasat 4

¹Ore eirorie Petero o Yohana olorere nepuonu ilapolosak o lkitok loo larripok le nkaji e Nkai o Sadukayo enetii ninche.

²Netagorote te nkaraki naiteng'enita ilkipaareta olorere aaliki aajoki te Yesu etumi empiunoto o lootuata.

³Neibung ninche aapik jila o mekenyu, amu emuto ina kata.

⁴Kake eiruko ilkumok le lelo ootoning'o ilo rorei; naa kejo esiana oo lewa matabai nkalifuni miet.

⁵Ore te nkolong natusujua ina neiturrurro ilarikok o lpayiani loo Lyahudi, o laiteng'enak loo nkitanapat te nebo te Yerusalem.

⁶Netii Olapolosani Kitok oji Ananias, netii Kaiafas, o Yohana o Aleksanta o kulikae ake lo lmarei lo Lapolosani Kitok.

⁷Neitasheyie lelo kipaareta te dukuya ninche neikilikuan aajoki, “Kaji intae nkuna pee itaasa ena? Kaa golon ena niatata, naa keneng'ae enkarna nitaasishore?”

⁸Ore eiganya Petero Enkiyang'et Sinyati, newaliki ajoki, “Lo kituaak lo lorere, o lpayiani,

⁹te naa taa keikilikuanishoreki iyiook tele kekun te mbae supat naitaasaki oltung'ani maima o eneikuna pee eishiunyeki ele tung'ani,

¹⁰neishiaakino te niyiolouu intae pooki, neishiaakino neyiolou olorere pooki loo Siraeli nchere, ore pee eitashe ele tung'ani te dukuya intae aa biyoto katukul, naa te nkaraki engolon e nkarna e Yesu Kristo le Nasaret lishomo intae aashe neitopiwuo Enkai ninye aitung'uaa ilootuata.

¹¹Yesu eimakita lkigerot pee ejo, ‘Ilo soit litemenaitie intae ilashetak otaa osoit kitok lo lmairroto.’

¹²Meetae tukul likae otumieki enjeunoto, nemeetae ai arna naishoruno te nkop pooki, naishooki ltung'ana pee kijeunye.”

¹³Ore pee edol Enkiguana ina natishirrakita Petero o Yohana, nemusu aajo ltung'ana ake ninche lemeeta enkisuma nashomo, neme ng'eni sii, neing'asia pee eyiolou[3] aajo ninche lapa ooisiritore Yesu.

¹⁴Ore te nkaraki nadolita ilo tung'ani oishiunyeki eitashe te nebo ninche, nelau enawaliki.

¹⁵Kake ore pee eitanap ninche meipung'o te nkaji e nkiguana, neiteru lpayiani aaiguana oopeny.

¹⁶Nejo kuna: “Kaa kintaas kulo tung'ana? Amu eibale ake ninye too ltung'ana pooki oomanya Yerusalem nchere ninche etaasishoreki te na bae naba nji e nking'asia, nimikiindim sii aatomiki.

¹⁷Kake ore naa pee meitadarari ena bae tiatua olorere, maing'odia, nikirishie kulo tung'ana pee meigil aairorie likae tung'ani te na arna.”

¹⁸Neipotu ninche neitanap nereiki aajoki pee meigil ake aairorie aashu eiteng'en likae tung'ani te nkarna e Yesu.

¹⁹Kake etawalikitia Petero o Yohana aajoki ninche, “Entirish intae oopeny maate enaishiaakino te Nkai, te naa ai intae kining ana ke Nkai.

²⁰Amu mikiindim ake iyiook aatapal mikilimu inikitoduaa o nikitoning'o.”

²¹Neitoki ake ina kiguana aaing'ode ninche neitirrishaki oleng, neitoki aaisho epuo. Etalaita taa katukul enaitameyie ninche amu errepita ltung'ana pooki Enkai teina nataasaki.

²²Amu ore ilo tung'ani oitaasaki ina e nking'asia aaishiunye neitogiroyie larin artam.

²³Ore pee eing'ueikini Petero o Yohana, nepuonu enetii ilchoreta lenye, nelikioo nena pooki naatiaakita ninche ilapolosak kituaak o lpayiani.

²⁴Neisho ninche pee ening nena, neilepie tenebo iltoiloishi lenye aailepakinye Enkai ejo: “Olaitoriani, oitobira Keper o enkop o enaiposha, o nena pooki naatii,

²⁵naa iyie oirorie Papa lang Daudi ilo sinka lino, te Nkiyang'et Sinyati, pee ejo, ‘Kainyoo pee epush Iloreren leme Lyahudi, neipiru ltung'ana enkiguana nemeaku?

²⁶Etanapate laiguanak kituaak le nkop, nesoto laitoriak te nebo, aa Olaitoriani Enkai earare, o ilo lenye otubukokoki eilata aaput.’

²⁷Amu kesipa nchere tiatua ena anasa apa esotokinoi Osinka lino Yesu, osinka lino sinyati laa ninye itubukoko eilata aput, ninye etasotokinote Herode o Pontio Pilato o Loreren leme Lyahudi o ltung'ana loo Siraeli,

²⁸pee eitaas enapake naidipa magilanisho ino o enkiguana ino makewan atejo keaku.

²⁹Ore naa taata, Olaitoriani, toduaa iyie ina king'odia[4] enye, nincho isinkan linono meiroro ororei lino te mpijan pooki.

³⁰Nintorioo iyie enkaina ino aishiunye olorere; ninchoru metaasi ilmonek o mbaa e nking'asia te nkarna e Yesu, Osinka lino sinyati.”

³¹Ore pee eomon neigirigiro ine netumore, neiput ninche pooki Enkiyang'et Sinyati neshirraki aairo ororei le Nkai.

³²Neaku lelo pooki ooiruko ilo ltau obo o le yieunoto nabo, nemeetae olojo inenyenak imasaa naata, amu etang'ara ninche ntokitin pooki naata.

³³Nelimu ilkipaareta te ngolon shakenisho e mpiunoto o Laitoriani Yesu; nelotu empiris e Nkai shumata ninche pooki.

³⁴Nemeetae hoo obo te ninche olau toki, amu ore lelo apa ooata masaa oo nkurman aashu inoo nkajijik, nemir neyau mpisai naainosieki nena masaa,

³⁵neyaki ilkipaareta pee eoriki pooki tung'ani, too nkiririkinot oo yieunot enye.

³⁶Neetae Yosef, oishoo lkipaareta enkarna aajo Barnaba (kejo ina oloitagol ilkulikae oishuaa) naa oloo Lawi, laa ole nkop e Kupro,

³⁷neeta ninye enkurma, nemir, neyau iropiyiani naainosie, neyaki lkipaareta.