Read MAASAI REVISED PROTESTANT Iasat 8 Bible Online

Iasat 8 - MAASAI REVISED PROTESTANT bible

Iasat 8

¹Netonyorrayie sii ninye Saulo ina keeya, nataaraki Stefano. Nedumakino ina olong ake osina kitok ina sirit oo looiruko Kristo natii Yerusalem, neidapashakino pooki lkirinen le Yudea o le Samaria, ilkipaareta ake ootelekutua.

²Nedumunye ltung'ana aseremak le Enkai aapuo aanukaa Stefano, eishiraki to ltoiloishi sapuki.

³Kake etetema ninye Saulo ajo amut ina sirit pooki, aa lewa aashu nkituaak, nejing'aki too nkajijik, neikurtutaa anang'aki jila.

⁴Neaku ore lelo airukok ooidapashakinote nena kuapi nepuo ninche aalikioo ilo rorei.

⁵Nelo Filipo enkanasa oo Samaria neinosaki ninche Kristo.

⁶Ore ina siamo pooki neinining oleng, neng'amu pooki te nebo ilo rorei oinosaka Filipo, etoning'o nedol ninche nkitoduaat naataasa.

⁷Ore lkumok lenye ooata loiriruani torrok, nepuku aaing'uaa eishir to ltoilo sapuk: ore lkumok oikaolote o lmaiman, neishiunyeki.

⁸Nejing eng'ida sapuk ina anasa.

⁹Kake eetae apa oltung'ani obo teine oji Simon oosh enkidong teina anasa, neing'asiayie ilo orere le Samaria, eitaa kewan likae tung'ani kitok,

¹⁰nening pooki ninye oloti o lbotor, ejo, “Ore ele tung'ani, ele taa oshi enoshi naji ‘Engolon Kitok Enkai.’ ”

¹¹Neinining ninche ninye amu keing'asiayie ninche te nkata naado, eing'asiayie nena kidong'i enyena.

¹²Kake ore pee epuonu aairuk ilomon supati le nkitoria e Nkai ooinosu Filipo, neimaka enkarna e Yesu Kristo, neibatisae ninche ndung'ot pokira, ilewa o nkituaak.

¹³O meiruko sii ninye Simon; ore pee eibatisae, neaku Filipo eisiritore. Ore pee edol nkitoduaat o mbaa sapuki e ngolon naas Filipo neitoki ninye aing'asia.

¹⁴Ore pee ening lelo kipaareta ootii Yerusalem nchere etang'amutua iltung'ana loo Samaria ororei le Enkai, neirriwaki Petero o Yohana.

¹⁵Ore pee ebaya ninche, neomonoki lelo ooiruko pee eng'amu Enkiyang'et Sinyati;

¹⁶amu eton apa meetae olenye otadoikio Enkiyang'et Sinyati, keidipaki ake aaibatisa te nkarna o Laitoriani Yesu.

¹⁷Neiteleiki Petero o Yohana ninche nkaik neng'amu Enkiyang'et Sinyati.

¹⁸Ore taa pee edol Simon ajo te neiteleiki lkipaareta oltung'ani nkaik neishori ilo Enkiyang'et Sinyati, neisho Petero o Yohana mpisai,

¹⁹nejoki, “Enchooki sii ninye nanu ena kidimata paa ore ake oltung'ani laiteleiki nkaik neng'amu Enkiyang'et Sinyati.”

²⁰Kake etiaaka Petero ninye, “Indaai o nena pisai inono! Amu itejo ainosie enkishorunoto e Enkai mpisai!

²¹Miata iyie ematua aashu erubata te na bae. Amu meisiriri oltau lino tialo Enkai.

²²Irridu naa enkarruoisho ino niomon Olaitoriani pee idol te naa eikipalakini ina yieunoto o ltau lino.

²³Amu adol ajo kibore enduaran o lodua, niteenikine atua ng'ok.”

²⁴Newaliki Simon ajoki, “Entoomonokoki intae to Laitoriani pee maatum ake nena baa pooki nitejo.”

²⁵Neaku ore pee eidip aaitadedeyie neinosaa ororei lo Laitoriani, nerrinyori Petero o Yohana aapuo Yerusalem, neimaa nkang'itie kumok oo Samaria, einosaa ilo rorei supat.

²⁶Kake eirorie olmalaika lo Laitoriani Filipo nejoki, “Inyo tanapayu shomo enkalo e kopikop, enkalo e idia oitoi oshi naing'uaa Yerusalem elo Gasa, (enoshi e mpusel).”

²⁷Neinyototo alo. Naa ng'ura! Nedol oltung'ani kitok le Etiopia. Naa osunash ele tung'ani naa kitok te nkitoria e Kandake, aa taa, enkaiguanani kitok e Etiopia. Naa ilo tung'ani oitore masaa enyena pooki. Neewuo ilo Yerusalem aseremisho

²⁸paa enkop enye egira arrinyo alo, neton te ngarri enye oo mbartan aisum embuku o loiboni le Nkai oji Isaya.

²⁹Nejoki Enkiyang'et Sinyati Filipo, “Shomo tinyikaki, turubare ina garri.”

³⁰Nekuet Filipo alo enetii, nening ajo embuku e Isaya eisumita, neikilikuan ajoki, “Ining'u sa nena baa nisumita?”

³¹Nejoki ilo kitok, “Kaji aiko te naning'u eitu atum oltung'ani laautaa?” Nejoki Filipo meilepaki ina garri enye aton atashare.

³²Ore ine wueji neisuma ilo tung'ani too lkigerot naa ewueji nejo, “Etorikoki anaa olkuoo le ker opuoi aayieng; anaa enoshi ker nemebol enkutuk edung'i ilpapit, eitu sii ninye ebol enkutuk enye.

³³Ore te nborron enye, neoruni ninye esipata: naa ae ng'ae naa olimu eishoi enye? Amu eisha enkishui enye te nkop.”

³⁴Newaliki ilo kitok sunash Filipo nejoki, “Aatasayia tolikioki, ae ng'ae doi eimaki ele oiboni le Nkai, ai kewan eimaki anaa ai likae?”

³⁵Nebol taa Filipo enkutuk neiteru te ilo kigeroto, neinosaki ninye ilomon supati le Yesu.

³⁶Ore epuoito, nebaiki ewueji netii enkare. Nejo ilo sunash, “Nena enkare kainyoo namit aaibatisai?”

³⁷[Nejoki Filipo ninye, “Kindimi pae aaibatisa te naa iruko iyie to ltau lino pooki.” Nejo, “Airuko nchere Yesu Kristo oinoti le Nkai.”]

³⁸Neitanapisho meitasheyieki engarri; nedoyio pokira aare aapuo enkare, Filipo o ilo sunash, neibatisae ninye.

³⁹Ore pee eilepu ninche te nkare, newuapaa Enkiyang'et o Laitoriani Filipo teine. Neitu eitoki ilo sunash adol, nelo ninye enkop enye te ng'ida.

⁴⁰Nelo Filipo amaniki kewan etii Asotos. Ore eim ine, neinosaa ilo rorei supat te nena ang'itie pooki o metabai Kaisaria.