Read MAASAI REVISED PROTESTANT Iasat 9 Bible Online

Iasat 9 - MAASAI REVISED PROTESTANT bible

Iasat 9

¹Kake ore ake eng'uyana Saulo eiture lkipaareta lo Laitoriani ajo kear metuata nelo enetii Olapolosani Kitok

²aomon impala lelo ooitore nkajijik e ntumo te Dameski, paa te netum iloosujita ina Oitoi teine, neidim atipika nkaik, aa lewa o aa nkituaak, neriku Yerusalem eena.

³Neaku ore etii Saulo enkoitoi eloito netinyikaka Dameski, neimerlelu nabo kata ewang'an naing'uaa Keper neman ninye.

⁴Nebatata aosh enkop nening oltoilo ojoki, “Saulo, Saulo, kainyoo pee kisilisil?”

⁵Neikilikuan ajoki, “Eira ng'ae, Olaitoriani.” Nejoki, “Kara Yesu ilo ligira ainosie osina;

⁶kake inyo tijing'a ena anasa paa teine kilikini eniaas.”

⁷Neisirng'ang'a lelo ooisiritore ninye negira aaitashe, naa oltoilo ake etoning'o neitu edol oltung'ani.

⁸Neinyototo Saulo nebol inkonyek, nemedol toki. Neaku enkaina eibung'aki aarik atua Dameski.

⁹Neya nkolong'i uni aa modooni nemenya endaa nemeok toki.

¹⁰Neetae oloiteng'eni te Dameski oji Ananias. Nejoki Olaitoriani ninye te nduaata, “Ananias,” nejo ninye, “nele nanu, Olaitoriani.”

¹¹Nejoki Olaitoriani ninye, “Inyo shomo enoshi oitoi naji Naisiriri, nkilikuanu te nkaji e Yudas oltung'ani le Tarso oji Saulo; amu eomonito ninye,

¹²netoduaa oltung'ani te nduaata oji Ananias elotu enetii aiteleiki nkaik pee eitoki adolishoyu.”

¹³Kake etawalikia Ananias nejoki, “Olaitoriani, atoning'oyie ele tung'ani too ltung'ana kumok, eneba entorroni naitaasa isinyat linono te Yerusalem;

¹⁴naa ore tene keeta enkidimata naishoo lapolosak kituaak naenie lelo pooki ooipot enkarna ino.”

¹⁵Kake etiaaka Olaitoriani, “Shomo amu, emasaai ai nageluno ninye pee eya enkarna ai aitayiolo iloreren, o laiguanak o nkera oo Siraeli;

¹⁶amu kaliki nanu eneba enkitamioto naitamei ninye te nkaraki enkarna ai.”

¹⁷Nelo Ananias nejing ina aji, neiteleiki Saulo nkaik nejoki, “Olalashe lai Saulo, ilo likimpang'aka te nkoitoi niimua, Yesu kewan laairriwua pee ingil adolishoyu, nikingany Enkiyang'et Sinyati.”

¹⁸Ore ina kata ake neing'abobunye entoki naaijo ilpala too nkonyek enyena neitoki adolishoyu. Neinyototo neibatisae.

¹⁹Ore pee enya endaa netum engolon. Nebik Saulo te nebo o lelo ooiteng'eni otii Dameski nkuti olong'i.

²⁰Ore teina kata ake too nkajijik e ntumo nelikioo ninye Yesu, nejo, “Enkerai e Enkai ninye.”

²¹Neing'asia lelo pooki ootoning'o ninye nejo, “Aimme olapa tung'ani ele oitayio ntabo te Yerusalem ear lelo ooipot ena arna? Naa ina pee eewuo ene, pee etum ateena kulo neyaki lapolosak kituaak?”

²²Kake etoponari elikioroto e Saulo atum engolon, neitala enkalo Ilyahudi ootii Dameski eitadedeyie nchere ore Yesu ninye Kristo.

²³Ore etulusoitie nkolong'i kumok, netumo Lyahudi aaiguana peyie ear Saulo metua;

²⁴Kake etayiolo Saulo ina kiguana enye. Neaku kerrip ninche nchomito e ina anasa dama o kewarie, ejo pee ear ninye metua;

²⁵kake neaku etoriko lkipaareta lenyena ninye kewarie, neitadooyo te suntai e ina anasa, neililioo te nkikapu o metadoi.

²⁶Ore pee elo Saulo Yerusalem netem ajo ashulare lelo ooiteng'eni le ine, kake etureita ninche pooki, amu meiruk ninche aajo etaa ninye oloiteng'eni.

²⁷Kake etudumua Barnaba ninye, nerikoki lkipaareta, neinosaki ninche eneikuna Saulo pee edol Olaitoriani te nkoitoi, neliki ninche inaataasa Saulo te Dameski elikioo enkarna e Yesu te mpijan.

²⁸Neparana o lelo neibulu Yerusalem pooki,

²⁹nelikioo lomon te mpijan te nkarna o Laitoriani. Neiro aishankarrarre lelo ooiro enkutuk oo Lyunani; neaku kejo maing'oru aasesekuan.

³⁰Ore pee eyiolou ilalashera, neitadou Saulo aariku Kaisaria, neirriwaa meshomo Tarso.

³¹Netum esirit eseriani te Yudea pooki o te Galilaya o te Samaria neitubuluni; nelotie enkuretisho o Laitoriani neitagol Enkiyang'et Sinyati, neponari.

³²Neaku kelo Petero idie o idie abaiki ninche pooki o meeu enetii isinyat oomanya Luda.

³³Netum oltung'ani otii ine oji Aeneas oirraga te rruat larin isiet naa keikaole

³⁴Nejoki Petero ninye, “Aeneas, kinchiunye Yesu; inyo ntobira erruat ino.” Neinyototo nabo kata.

³⁵Nedol iltung'ana pooki oomanya Luda o Sharon ninye neibelekenyakino Olaitoriani.

³⁶Neetae teine te Yopa enaiteng'eni naji Tabita, (eji Dorkas aashu Enkolii). Naa kumok isiaaitin sidain o nkiaasin o lng'ur naataasa ninye.

³⁷Ore te nena olong'i nemuoyu neye. Ore pee eidip ninche aaisuja, nepuo aairragie to lgilata le shumata.

³⁸Ore amu kenyikita Luda Yopa, ore pee ening lkipaareta nchere etii Petero ine, neirriwaki ilewa aare nesai aajoki, “Wou sii ake ene nikitii nimimutie.”

³⁹Neinyototo Petero airiamariyie ninche. Ore pee ebau, nerik ninche ninye ilo gilata le shumata. Neitashoo nkolia pooki teine aatashare ninye eishirita, neitodol lngotin o nkilani naatiripaka apa Dorkas eton eboitare ninche.

⁴⁰Kake eipang'ie Petero ninche pooki boo negil kung aomon: neitoki aibelekenyakino ilo sesen nejoki, “Tabita, topiu!” Nebol ninye nkonyek enyena, ore pee edol Petero, neinyototo aton.

⁴¹Neitarasaki Petero enkaina neitasheyie. Neitoki taa aipot lelo sinyat o nena olia neitarasaki ninche eishu.

⁴²Neyiolouni ina bae te Yopa pooki, neiruk ilkumok Olaitoriani.

⁴³Nebik Petero inkolong'i kumok te Yopa te nkaji e Simon, olaitobirani loo lonito.