Read MAASAI REVISED PROTESTANT Iroma 1 Bible Online

Iroma 1 - MAASAI REVISED PROTESTANT bible

Iroma 1

¹Paulo osinka le Yesu Kristo, oipotoki metaa olkipaaret, negeluni te nkaraki ororei supat le Nkai

²otolimuo apake te dukuya too loibonok le Nkai lenyena tiatua ilkigerot.

³Naa ilo rorei supat oipirta ilo Inoti lenye, le ntalipa e Daudi tialo osesen.

⁴Netolimuoki neitadedeyieki ninye te ngolon inchere Enkerai e Nkai to rrekie le Nkiyang'et Sinyati pee eitopiuni too lootuata, naa Yesu Kristo Olaitoriani lang,

⁵laa ninye kinotie iyiook empiris e kipaaretisho nikiyaunye enkirukoto bayaroti too loreren pooki te nkaraki enkarna enye.

⁶Nitii sii intae ilooipotoki te nebo ninche entaa ile Yesu Kristo.

⁷Airoroki intae lelo pooki oonyor Enkai tiatua Roma, ooipotoki entaa sinyat. Meeu empiris o eseriani atua intae eing'uaa Enkai Papa lang o Laitoriani lang Yesu Kristo.

⁸Ore enaituruk, ang'as aisho Enkai ai enashe tiatua Yesu Kristo te nkaraki intae pooki, te nkaraki netaa kelikiori enkirukoto inyi te nkop pooki.

⁹Amu Enkai shakeni ai, naa ninye aisiaai te nkishui ai tialo ilo rorei supat lo Inoti lenye nchere eitu apal maimaki intae anaa ake te nkomono ai,

¹⁰ajo oi kenya eishoru Enkai te yieunoto enye manoto erishata nabaikinye intae.

¹¹Amu kayieu naleng nadol intae, pee atum atang'arie intae enkishorunoto e nkiyang'et, natum aitagolo intae;

¹²ajo pee kiretutu intae te nkirukoto inyi naretu sii nanu intae te naai.

¹³Kayieu niyiolouu ilalashera laainei inchere kumok inkatitin nayieu oshi nalotu abaiki intae, (kake eitu aaishori ebaiki taata,) peyie atum embata e nkikesare tiatua intae o too loreren.

¹⁴Kaata nanu esile too Lyunani o too leme Lyunani, too looiteng'enaki o leitu.

¹⁵Ina pee ayieu oleng naliki sii ninche intae Ilomon Supati tiatua Roma.

¹⁶Makurru nanu te lelo Omon Supati; amu ninche engolon e Nkai nayau enjeunoto te pooki ng'ae oiruk, neiteru too Lyahudi neitoki too Lyunani.

¹⁷Amu te ninche eibalunyeki esupatisho e Nkai nchere ore enkiterunoto o enkiting'oto e nkoitoi naitopokie Enkai oltung'ani naa enkirukoto. Anaa enajo ilkigerot, “Ore oltung'ani oisho Enkai esipata te nkoitoi e nkirukoto nepok.”

¹⁸Keibalunyeki taata engoro e Nkai eing'uaa Keper eiba entorroni pooki o enkarruoisho oo ltung'ana ooibooyo esipata.

¹⁹Amu ore mbaa naayiolounoyu tialo Enkai keibala te ninche, amu Enkai naitoduaa ninche.

²⁰Ore anaa apa pee eitaini enkop, netayioloki ake ina pukunoto enye nemelioo, aa taa enkidimata enye oo ntarasi o ina nara ninye Enkai, netaliee te nena tokitin naaitayioki. Metaa meeta hoo ninche eneitolonyaki;

²¹amu ore hoo neyiolo Enkai, eitu eyanyit aaitaa ninye Enkai aashu eisho ninye enashe, kake eirriirrana too ndamunot enye, neirriirrana nkorroki enye nemisimisu.

²²Ore ejo ninche ai ng'eni neaku ilmoda,

²³neitawal enkitoo e Nkai nemeye ninye ntarasi newalunye inkitanyaanyukot naaijo oltung'ani oye ake, aashu imotonyi aashu ng'uesi, aashu ng'uesi naaikurtutari.

²⁴Ore te nkaraki ina etung'uayie Enkai ninche neisho ing'uarrat oo ltauja lenye oonyor iloirerioni, o metaa kelaiki enkanyit iseseni lenye maate,

²⁵amu etawalunye emonkoi isipat e Nkai nesai neisiaai entoki naitobiruaki nepal Ilo Oitobira, omayiana ninye intarasi. Eesai.

²⁶Ore te nkaraki ina etung'uayie Enkai ninche metang'uarra mbaa e sulare. Eibelekenyate ng'oruo enye aaing'uaa orrekie oishiaakino nepuo ilo lemeishiaakino,

²⁷nepal sii ninche ilewa aaku meing'oru nkituaak neinuaakino ng'uarrat maate, neas ilewa o lewa mbaa e nkurruna neng'amu too seseni lenye maate nena naaiu ina torroni nataasa.

²⁸Naa ore amu eitu edol ninche aajo keishiaakino neyanyit Enkai, neing'uaa Enkai ninche metaa keriata indamunot enye netum olkuaak torrono.

²⁹Kebore ninche empukunoto ake pooki e nkarruoisho o entorroni, o ing'uarrat laa intorrok ake edol, iloobore olom o looitayu iloikop o enchankar o losek torrono, esayiet e nkurrare,

³⁰o enkisuro, ilooiba Enkai, ilooilash, iloonya kutukie, ilooipiru ntorrok, iloogolong'aki intoiwuo,

³¹ilmoda lemedamisho, ilemeisiligayu, ilooiba ilkulenye, ilemeeta olng'ur.

³²Ore hoo neyiolo enatundung'o Enkai ajo ore lelo ooas nena neiririkino keeya, neme ake duoo keas ninche kake kening'okino o lelo ooas.