Read MAASAI REVISED PROTESTANT Iroma 10 Bible Online

Iroma 10 - MAASAI REVISED PROTESTANT bible

Iroma 10

¹Ilalashera laainei, ore enayieu oleng oltau lai o enkomono ai te Nkai te ninche naa pee eitajeuni.

²Kara nanu shakeni te ninche nchere keeta Siraeli olokiyo kitok te Nkai, kake mewang eyiolounoto.

³Amu ore te nkaraki nemeyiolo esupatisho naa Enkai eing'uaa, nejo ninche maing'oru enenye naitasheyie, neaku eitu eisho meitoria esupatisho naing'uaa Enkai.

⁴Amu eitabayie Kristo enajo nkitanapat, peyie aa ore pooki ng'ae oata enkirukoto neisho Enkai ninye esipata.

⁵Eigero Musa ajo, “Ore oltung'ani oitabaya esupatisho naibalieki too nkitanapat, neishuyie ina supatisho.”

⁶Kake inji ejo esupatisho naa enkirukoto eimu, “Nimijo to ltau lino, ae ng'ae oilep alo keper?” Eji, alo aitadou Kristo enkop,

⁷aashu “Ae ng'ae odoyio alo olodo le nkop?” Eji, ailepunye Kristo too lootuata.

⁸Kake kejo aa? “Kinyikita ilo rorei, enkutuk ino etii, netii oltau lino,” eji, ilo rorei le nkirukoto likilikioo;

⁹amu ti nimbalunye iyie te nkutuk ino nchere Yesu Olaitoriani, niruk sii to ltau nchere eitopiwuo Enkai ninye aitung'uaa ilootuata, nikintajeuni.

¹⁰Amu to ltau eiruk oltung'ani neaku teina eishori sipat, nelimu te nkutuk enye neitajeuni teina.

¹¹Ejo Lkigerot, “Meetae hoo oloiruk ninye oitukurruni.”

¹²Amu meeta enepaashare Ilyahudi o Lgiriki; ilo Aitoriani obo Olaitoriani le pooki naa ninye oitadoiki enkarsisisho enye lelo pooki ooipot ninye.

¹³Amu, “Ore pooki ng'ae oipot enkarna o Laitoriani naa keitajeuni.”

¹⁴Kake amaa, kaji eiko iltung'ana te neipot ilo leitu eiruk? Naa kaji eiko te neiruk ninye oleitu aekata elikini metoning'o? Naa kaji eiko te nening meeta olalikioroni?

¹⁵Naa kaji eiko tenelikioo eitu eirriwari, “Kebaa esidano oo nkejek e lelo ooyau lomon supati.”

¹⁶Kake mme pooki ootishilaitie lelo omon supati; amu ejo Isaya, “Olaitoriani, aing'ae oiruko inaatoning'o te iyiook?”

¹⁷Neaku nena naaning'i eimu enkirukoto, ore ina naning'i naa elikioroto e Kristo.

¹⁸Kake kaikilikuanu nanu ajo, keitu doi ening ninche? Keibala ajo etoning'o; amu, “Eshomo oltoilo lenye enkop pooki, nepuo irorei lenye ineeiting'ie enkop.”

¹⁹Naitoki ake nanu aikilikuanu ajo, keitu pasa ening'u Siraeli? Musa oitera ajo, “Kapik intae olom too ltung'ana leme olosho; naitagor intae to olosho omoda.”

²⁰Nenyaaka Isaya ajo te mpijan, “Aanotito lelo leitu aaing'oru nanu, naitoduaayie kewan te lelo leitu aaikilikuanu nanu.”

²¹Kake etejo ninye tialo Siraeli, “Aitorioko inkaik aainei endama pooki ailejileju ltung'ana lemening'isho naatanyaita nanu.”