Read MAASAI REVISED PROTESTANT Iroma 12 Bible Online

Iroma 12 - MAASAI REVISED PROTESTANT bible

Iroma 12

¹Aishiraki naa intae, ilalashera laainei, te ilo ng'ur le Nkai, enchoru iseseni linyi metaa olasar oishu, osinya neng'amunoyu te Nkai, amu ina eseremata inyi e nkiyang'et.

²Eminturubare ate mbaa ena kop kake embelekenyata, enchoo eitang'ejuki intae indamunot pee itumutumu aaitadedeyie eyieunoto e Nkai too mbaa naasipa neng'amunoyu naa bayarot.

³Amu ore te nkaraki empiris naaishooki nanu, ajoki pooki ng'ae linyi pee medamu ajo ailepie kewan alang enairirikino kake pee etem aiguanare kewan too naatiu, aitorisioki kewan entemet e nkirukoto naishoo Enkai ninye.

⁴Amu ore anaa enikiaata irubat kumok to sesen obo, neme nabo esiaai oo rubat pooki,

⁵nejia sii kitiu iyiook, ore hoo nikira kumok, kira osesen obo tiatua Kristo, nikira erubata nabo olikae o likae.

⁶Ore kiaata nkishoorot naapaasha anaa eneba empiris naishooki iyiook, mataasishore nena: ore paa enaibon e Nkai, neiririkino enkirukoto ang;

⁷ore paa ene nkisiaayiare nikisiaaishore, ore paa ene nkiteng'enare, nikinteng'enishore;

⁸ore paa ene nkikoo nikinkokishore; ore paa ekinchooyo nikinchooyo te leng'on; ore paa eretore, neaku te nkisosion; ore paa eno lng'ur, niking'urrie te nchipai.

⁹Emincho enyorrata ejing esunkuroisho; embai intae intorrok, entirrisha isupati;

¹⁰entonyorrata intae maate to sotua loo lalashera o nkanashera; entukujata te nkanyit.

¹¹Emincho enkisosion inyi edukenya, entaa lkirowua te Nkiyang'et, esiayia Olaitoriani.

¹²Enting'idata to siligi linyi, enting'iria to sina, entasheikinoto enkomono.

¹³Enchooi te nkaraki lelo sinyat ooata ngolikinot, entaa iloonyor enkitoomono oo lomon.

¹⁴Entamayian lelo ooisilisil intae; entamayian emidek ninche.

¹⁵Enting'idata o lelo oong'ida ninchirishiri o lelo ooishir.

¹⁶Entotoni ining'ong'o olikae o likae, emiika, entushulare lelo oomeni; emitiira[1].

¹⁷Emilakie entorroni enkae torroni, kake ore enaishiaakino te pooki ng'ae entipik intae indamunot.

¹⁸Te naa keidimayu, paa intae etioorie, entotoni te seriani o pooki ng'ae.

¹⁹Ilanyor laainei, emintalaku ilapi, kake entung'ueiki mbaa inyi engoro e Nkai; amu etisiraki aajo, “Enaai elap, nanu oitalaku lapi, Olaitoriani ojo.”

²⁰Aa, “Ore pee eeta olmang'atinta lino esumash, intotio; ore pee eeta enkure nchoo entoki naok; amu ore pee inko nejia, inkuk naayupuyup inteleikia elukunya enye.”

²¹Emincho entorroni emir intae, kake entimir entorroni too supati.