Read MAASAI REVISED PROTESTANT Iroma 13 Bible Online

Iroma 13 - MAASAI REVISED PROTESTANT bible

Iroma 13

¹Entoning pooki tung'ani oitoreisho. Amu meetae enkitoria neme Enkai eing'uaa, ore lelo ootae naa Enkai naitasheyie.

²Neaku ore ake oloibooyo enkitoria te ngogong'i, ina naa Enkai naitasheyie, ore lelo ooibooyo te ngogong'i naa ate eyaki enkiguana.

³Amu ore oltung'ani oata olkuaak sidai nemeure ilaitoriak lenyena kake ore oloata olkuaak torrono naa keure ilaitoriak. Iyieu iyie nimiaata enkuretisho te ilo oitoreisho? Taasa naa isupati, naa itum errepet te ninye.

⁴Amu ore ninye naa osinka le Nkai likiyaki isupati. Kake ore ake pee ias intorrok, tureisho, amu menapita ninye olalem pesho; osinka le Nkai ninye oitabaiki engoro enye ilo oas intorrok.

⁵Ore te nkaraki ina entoning naa laitoriak, neme te nkaraki ake naa iurere engoro e Nkai kake te nkaraki oltoilo lo ltau.

⁶Naa te nkaraki ake ina sii pee ilakilaka kodi, amu ore lelo ooitoreisho naa laisiaayiak le Nkai ooirrita ina bae.

⁷Enchoo lelo pooki nena naairirikino ninche, enchoo kodi ilo oishori kodi, ninchosho esotore lelo le sotore, entureita ninchosho enkanyit lelo ooiririkino enkanyit.

⁸Emiaatayie esile oltung'ani hoo obo, ae neme ene nyorrata inyi maate; amu ore ilo onyor ole latia enye neitabayie inkitanapat.

⁹Ore nena kitanapat naajo, “Miloloito, miaar metua, mipurrisho, ming'uar” o kulie ake kitanapat, naa kulo rorei ooitululung. “Tonyorra ole latia ino anaa eninyor kewan.”

¹⁰Meitaas enyorrata ole latia entorrono; ina paa enyorrata enkitabaroto oo nkitanapat.

¹¹Ore etii nena niyiololo sii aajo kaa saa ena, nchere etabawua tukul enkata pee iputunyenye aaing'uaa injo. Amu taata etataanikia iyiook enjeunoto alang enapa kata pee kinteru aairuk;

¹²etinyikayie enkewarie, etaa kekenyu. Ematuburukushu[2] naa isiaaitin e naimin emaishopo imasaa e wang'an;

¹³emaitobirai ate anaa loopuo dama, neme te sikar o te merai, neme te malmalisho oo ng'uarrat torrok, neme too nkitarrikinot o to lom.

¹⁴Kake enchopo Olaitoriani Yesu Kristo, naa emintoki ake aaisho osesen erishata, metaa nena ake naayieu intabayaya.