Read MAASAI REVISED PROTESTANT Iroma 15 Bible Online

Iroma 15 - MAASAI REVISED PROTESTANT bible

Iroma 15

¹Ore iyiook iloogol keishiaakino nikinap enchalan oo looshal, pee me ate kintiship.

²Enchoo pooki ng'ae eitiship ole latia enye too supati enyena, neitagol ninye.

³Amu eitu eitiship Kristo kewan; kake ore anaa enatisiraki aajo, “Ore imorot e lelo likimor iyie, nanu etuurokinote.”

⁴Amu ore nena apa pooki naaigeroki te nena olong'i naaishari naa iyiook eigerokoki pee eutarieki, paa ore enkitashoto o enkikoo oo lkigerot nikitumie iyiook osiligi.

⁵Meishoo intae Enkai enkitashoto nauno o ene nkilejilej entobik to lning'o olikae o likae, olaaijo ole Yesu Kristo,

⁶pee itumutumu to ltau obo aaisisa Enkai nara menye lo Laitoriani lang Yesu Kristo.

⁷Entang'amu olikae olikae, naa enkuna anaa ina natang'amua intae Kristo, te nkaraki enkitoo e Nkai.

⁸Amu ajoki nanu intae etaa Kristo osinka le lelo oomurata pee eitoduaaya esipata e Nkai, netum aitabai enkisiligata naishoo apa iloo papa,

⁹o pee etum sii ninche Iloreren aaisisa Enkai te nkaraki olng'ur lenye. Anaa enatisiraki aajo; “Ore te nkaraki ina kaaisis iyie tiatua Loreren, naranyaki enkarna ino;”

¹⁰nenyaakaki sii ajo, “Enting'idata Iloreren, te nebo o ltung'ana le Nkai;”

¹¹o sii, “Esisa Olaitoriani, Iloreren pooki;”

¹²nenyaaka sii Isaya ajo, “Kelotu entonai e Yese, ninye ilo oinyototo aitore Iloreren; naa ninye eyooki Iloreren aaisilig.”

¹³Meiputaki intae Enkai osiligi o enchipai pooki o eseriani tiatua enkirukoto, paa ore te ngolon e Nkiyang'et Sinyati nebul nedooyo osiligi linyi.

¹⁴Atonyorrayie nanu openy intae, ilalashera o nkanashera aainei, nchere kebore intae esupatisho, nebore intae eng'eno pooki naa indimidimi aatuutai olikae o likae.

¹⁵Kake etii nkuti baa naigeroko intae te mpijan pee aitadamu intae te nkaraki empiris naaishoo Enkai

¹⁶mataa olaisiaayiani le Kristo Yesu too Loreren naas esiaai o lapolosani lo rorei supat le Nkai, pee eaku Iloreren olasar ong'amunoyu, oitukuoki te Nkiyang'et Sinyati.

¹⁷Ore naa tiatua Kristo Yesu, kaata esipata nawuasare esiaai ai te Nkai.

¹⁸Amu maitieu aimaki ae toki neme ina nataasa Kristo te nanu pee etum Iloreren aatoning ninye, to rorei o too nkiaasin,

¹⁹te ngolon oo nkitoduaat o too ne nking'asia e ngolon e Nkiyang'et Sinyati, metaa ore ebaiki Yerusalem o metamanai alo Ilirikum, atolikioyie tukul ororei supat le Kristo.

²⁰Naitaa eyieunoto natii oltau elikioroto o rorei supat, neme te nene wuejitin neeidipaki aaipoto Kristo, pee meaku olkitamanyunoto le likae tung'ani alotu ashet.

²¹Kake ore anaa enatisiraki; “Keyooki aadol lelo leitu ae kata elikini ninye, neyooki ajing'aa lelo leitu ae kata ening ninye.”

²²Te nkaraki ena pee aaibooyioki nkatitin kumok eitu alotu abaiki intae.

²³Kake ore taata, amu meekure aata dikae wueji naisiaaishore te kulo kirinen, naa larin kumok ayieu ake nalotu abaiki intae,

²⁴kaisilig ajo kalotu adol intae agiroo alo Spein, nikintobiraa sii intae teina lototo ai, atang'asa ashipakino aparanare intae te nkiti rishata.

²⁵Ore te na kata ake, etiu nejia, kalo Yerusalem ayaki lelo sinyat eretoto.

²⁶Amu etishipakinote Makedonia o Akaia esotore te nkaraki lelo sinyat aisinak ootii Yerusalem;

²⁷netishipate ninche eas ina, neibala ajo keetayie ninche esile, amu amaa te naa keetuo Loreren aang'arie ninche enkirukoto e nkiyang'et, neishiaakino sii ninche neret aaisiaai lelo too masaa e mayianata.

²⁸Ore naa pee aidip ena, naitabaiki ninche kuna naatasotuoki, nalotu aimaa intae aloito Spein;

²⁹nayiolo ajo ore pee alotu enitii intae naa kalotu te mborei e mayianata e Kristo.

³⁰Asai naa intae ilalashera o nkanashera aainei, to Laitoriani lang Yesu Kristo o te nyorrata e Nkiyang'et, entonyok te nebo nanu te nkomono niomonono Enkai kiomonokiki nanu,

³¹pee aarishieki lelo lemeiruk ootii atua Yudea, neaku sii esiaai ai naisiaai lelo sinyat te Yerusalem enang'amu te lelo sinyat

³²pee te neyieu Enkai nayooki alotu enitii te ng'ida naitumurru aparan intae.

³³Metaa Enkai e seriani te nebo intae pooki. Eesai.