Read MAASAI REVISED PROTESTANT Iroma 3 Bible Online

Iroma 3 - MAASAI REVISED PROTESTANT bible

Iroma 3

¹Amaa naa, kaa dupoto eeta Olyahudi? Amaa kainyoo tipat e murata?

²Keeta tipat naleng too rrekiei pooki, neituruk nchere, Ilyahudi eitanapa Enkai ilkiliku lenyena.

³O etaa meisiligayu kulikae lenye? Keidim ina aibelekenya metaa meisilgayu Enkai?

⁴Mme nejia etiu ina katukul! Nchoo eaku Enkai asipani hoo naa aimonkoni pooki tung'ani, anaa enatisiraki nchere, “Kintadedeyieki iyie Enkai too rorei linono, nimirisho ake te nikinguanareki.”

⁵Kake amaa te naa kenkarruoisho ang naibalie esipata e Nkai, te nkiguana, eikijo aa naa? Eikijo mme asipani Enkai te neyau engoro enye (Kairorita taa doi anaa naajo ltung'ana.)

⁶Mme nejia! Amu te neaku nejia etiu, kaji naa eitoki Enkai aiko te neaku ninye olaiguanani le nkop?

⁷Naa amaa te naa kelejare ai naibalie oleng isipat e Nkai, neyaki ninye enchunet nalusoo oleng, oo naa pee aaitokini aaiguanare eji ataasa ing'ok?

⁸Oo naa pee mikiaas ntorrok pee epuonu isupati? Amu ina doi eiteenikitia kulikae iyiook aajo nejia kijo. Ore endung'okinoto e nkiguana natum ninche lelo naa keishiaakino.

⁹Kanyioo naa kitalang'ie iyiook Ilyahudi ilkulikae? Meeta katukul, amu kindipa iyiook aatejo nchere etii Ilyahudi abori engolon oo ng'ok, naa nejia etiu Ilyunani.

¹⁰Anaa enatisiraki nchere: “Meetae hoo oloata esipata, meetae hoo obo.

¹¹Nemeetae hoo olng'en, nemeetae hoo obo oing'oru Enkai.

¹²Etapong'ori pooki, netaa te nebo: nemeetae obo oas isupati, meetae hoo obo.”

¹³“Enkurare nang'a ilgoso lenye, neasishore ilng'ejepa lenye aalejishore.” “Esayiet oo lasuriaa nanuka too nkutukie enye.”

¹⁴“Nebore nkutukie enye ildeketa o enduaran.”

¹⁵“Neten inkejek enye epuo aaibukoo osarge,

¹⁶ore irrekiei lenye naa enkidaaroto o sinaitin,

¹⁷nemeyiolo ninche inkoitoi e seriani.”

¹⁸“Nemetii olturiaki le Nkai dukuya nkonyek enye.”

¹⁹Neaku kiyiolo iyiook aajo ore pooki najo nkitanapat naa lelo ejoki ootii abori nena kitanapat, pee eitigiri ake pooki kutuk, neaku Enkai eikenaki enkop pooki imbaa enye.

²⁰Amu meetae oltung'ani hoo obo oikenakini esupatisho tialo ninye to mbaa oo nkiasin oo nkitanapat, amu nkitanapat eimu eyiolounoto oo ng'ok.

²¹Kake eibalunyeki taata esupatisho e Nkai neitu eimu nena kitanapat, hoo neishakenokito inkitanapat oo loibonok le Nkai o

²²esupatisho e Nkai to rrekie le nkirukoto tiatua Yesu Kristo, te lelo pooki ooiruk. Amu meeta enepaashare;

²³etaasa pooki ng'ok neitong'oro enkitoo e Nkai,

²⁴neikenakini esupatisho te mpiris enye metaa enkishorunoto e pesho, te lakunoto natii atua Kristo Yesu,

²⁵ilo oishorua Enkai metaa olkipoket to sarge lenye, ong'amaroyu te nkoitoi e nkirukoto. Ore apa ena naa keitodolu esupatisho e Nkai, amu ore te ng'iriata enye, neitaa Enkai parmetii ing'ok naatulusoitie;

²⁶pee etum aitadedeyie makewan neitusupat sii ilo oata enkirukoto tiatua Yesu.

²⁷Kaji naa etii olwuasa lang? Eiwuang'ieki. Ti aa kitanapata? Ai te nkitanapata oo nkiasin? Mme nejia, kake te nkitanapata e nkirukoto.

²⁸Amu kimbung'a iyiook nchere te nkirukoto eitaae oltung'ani supat, metii easata oo nkitanapat.

²⁹Ana ketaa Enkai ke Nkai oo Lyahudi ake? Aimme Enkai ninye oo Loreren sii ninche leme Ilyahudi? Ee pae, enoo Loreren sii ninche.

³⁰Amu nabo Enkai, naa ninye oitusupat iloomurata te nkitanapata e nkirukoto enye o lelo lememurata te nkirukoto enye.

³¹Ketaa naa iyiook ooibelekeny nena kitanapat te na kirukoto? Mme nejia! Ore enatii, nkitanapat kintudupaa.