Read MAASAI REVISED PROTESTANT Iroma 4 Bible Online

Iroma 4 - MAASAI REVISED PROTESTANT bible

Iroma 4

¹Kaa naa kijo tialo Abraham, papa lang to rrekie lo sesen?

²Amu te naa naaji ei te nyuaata enye enotoko Abraham kewan esipata naa enaata eeta enawuasare. Kake mme te dukuya Enkai.

³Amu kejo aa ilkigerot? “Eiruko Abraham Enkai ore te nkaraki ina neikenaki Enkai ninye esupatisho.”

⁴Ore naa oloisiaaisho nemeikenakini olekoisiaayio lenye anaa ke nkishooroto kake anaa enenye naisiayua.

⁵Ore naa ilo leitu eisiaayu toki kake neiruk ilo oikenaki isipat oleme supat, neikenaki Enkai enkirukoto enye nchere esupatisho.

⁶Nejia sii eikuna Daudi aimaki emayianata o ltung'ani oikenaki Enkai esupatisho neme te nkaraki isiaaitin ejo:

⁷“Emayiana lelo ootapalakaki enkarruoisho neitoipori ing'ok enye;

⁸nemayiana ilo tung'ani lemeikenaki Olaitoriani eng'oki enye.”

⁹Amaa ena mayianata ei loo murata ake ootum, anaa ketum sii ninche ilememurata? Kijo iyiook, eikenakaki Abraham esupatisho te nkirukoto.

¹⁰Kaji naa eikuna pee eikenakaki ninye? Eidipaki aatumurat anaa eitu. Mme eidipaki aatumurat, kake eton eitu.

¹¹Ketumurataki pee eaku ilo olponoto anaa olmishire le supatisho naata apa te nkirukoto eton memurata. Eikunaki nejia pee eaku ninye menye le lelo pooki ooiruk memurata laa teina eikenakini esupatisho,

¹²neaku sii menye le lelo oomurata leme kemurata ake, kake esuj ina kirukoto naata apa papa lang Abraham eton memurata.

¹³Ore ina kisiligata naishooki Abraham o eishoi enye, nchere keyooki aajung enkop eitu eishori te nkaraki nkitanapat kake te nkaraki esupatisho e nkirukoto.

¹⁴Tenaa naaji ilasujak loo nkitanapat oaku ilajung'ok, pesho naa enkirukoto naa pesho ina kisiligata.

¹⁵Amu eyau nkitanapat engoro kake ore enemetii nkitanapat nemetii engilata oo nkitanapat.

¹⁶Te nkaraki e ina paa enkirukoto eitasheyie peyie aa empiris eigarakino ina kisiligata, neitadedeyieki te ishoi enye pooki, neme te lelo asujak loo nkitanapat aa ninche ake, kake o te lelo oong'arie Abraham enkirukoto, amu ninye menye iyiook pooki.

¹⁷Anaa enatisiraki aajo, “Aaitaa nanu iyie menye loo loreren kumok.” Te dukuya Enkai etang'amua ninye ina kisiligata, ina Ai nairuko ninye, naa ninye naisho ilootuata enkishui, neipotu intokin nemeetae neaku.

¹⁸To siligi eiruko Abraham neisilig melioo entoki naisiligu pee etum ataa menye loo loreren kumok; anaa enapa natiaakaki eji, “Inji ebayu eishoi ino.”

¹⁹Eitu eshalu enkirukoto enye pee eing'or osesen lenye makewan, ototiwuo anaa olotua amu etinyikaka ilarin iip te moruao enye, aashu pee eing'or enguset e Sara ajo olupi.

²⁰Meetae olng'ash oidima aigusugusie enkisiligata naisiliga Enkai kake etagolo ninye teina kirukoto anaa pee eishoo Enkai enkitoo.

²¹Etonyorrayie tukul nchere keidim Enkai aitabai ina naisiligie.

²²Ina pee eikenakaki enkirukoto enye nchere esupatisho.

²³Kake ore ilo rorei ojo “Eikenakaki”, mme te nkaraki ninye ake pee etisiraki;

²⁴kake te nkaraki sii ninche iyiook ilo oiruk ilo oitopiwuo Yesu Kristo Olaitoriani lang too lootuata,

²⁵olotaraki te nkaraki ing'ok ang, neitopiuni pee eikenakini iyiook esupatisho.