Read MAASAI REVISED PROTESTANT Iroma 6 Bible Online

Iroma 6 - MAASAI REVISED PROTESTANT bible

Iroma 6

¹Aikijo aa naa? Aikienikino atua ing'ok pee eponari empiris?

²Mme nejia pae! Kaji iyiook kinko ilootuata tialo ing'ok ti nikintoki aaenikino atua?

³Aimiyiololo aajo ore iyiook pooki ooibung'are Yesu Kristo tiatua enkibatisa ang, nikitaa nabo o ninye te nkaraki keeya enye?

⁴Naa ore anaa ina nikitaa nabo o ninye te keeya enye te nkibatisa ang, netaa ina ketunukayioki iyiook te nebo ninye, neaku ina naitopiwuo Papa ninye too lootuata te nkias e nkitoo, neaku ina enkishui ng'ejuk te iyiook.

⁵Amu te neitaaki iyiook nabo o ninye te keeya naaijo enenye, nesipa pae keyookini aaitaa iyiook nabo o ninye te mpiunoto naaijo enenye.

⁶Nikiyiolo aajo etashoki enkorrok ang musana te nebo o Kristo peyie eitarruorri osesen loo ng'ok pee mikintoki aaku rrindiki loo ng'ok.

⁷Amu ore olotua netalakuaki too ng'ok.

⁸Kake te naa eikituata iyiook te nebo Kristo, nikiruko aajo eikinchu sii te nebo ninye.

⁹Amu eikiyiolo aajo ore Kristo eitopiwuoki too lootuata nemeitoki aekata aigil keeya. Meekure eitore keeya ninye.

¹⁰Ore keeya natua ninye naa ng'ok etanang'a, nabo kata ake. Kake ore enkishui naishu ninye naa te Nkai eishu.

¹¹Enkenai sii intae ate nchere ituata tialo ing'ok ninchushu tialo Enkai tiatua Kristo Yesu.

¹²Emincho naa ng'ok eitoreisho tiatua iseseni linyi ooyooki aaye, metaa kearaki intae entoning ing'uarrat enye.

¹³Emincho rubat oo seseni linyi eaku entoki naasishoreki te nkarruoisho, kake enchoo ate Enkai anaa iltung'ana ooitopiwuoki aaitung'uaa keeya meetu puaan, ninchosho Enkai irubat oo seseni linyi metaa ntokitin naaisiaaishore esupatisho.

¹⁴Amu meitoki eng'oki aitore intae, amu meekure itii abori inkitanapat kake tiabori empiris itii.

¹⁵Kaa ae naa? Eikias ing'ok amu meekure kitii abori nkitanapat kake abori empiris kitii? Mme nejia pae!

¹⁶Aimiyiololo aajo ore ake olinchosho meitoria intae niakuku rrindiki lenyena, nitaa irrindiki le ilo lining'ining'i, aa too ng'ok naa ore pee aa ng'ok isiayiayia neiting'oki keeya; ore pee aa Enkai ining'ining'i, neiting'oki esupatisho.

¹⁷Kake ashe te Nkai amu ore intae oora apa rrindiki loo ng'ok nitaa ilooning'isho too ltauja, aaning ina kiteng'enare naishooki intae.

¹⁸Naa ore pee elakuni intae too ng'ok niakuku irrindiki le supatisho.

¹⁹(Kairo anaa naajo ltung'ana te nkaraki e nchalan inyi e tung'anisho.) Amu ore anaa ina apa ninchooitie ate aaku irrindiki loo loirerioni o enkarruoisho, etaa taata inchooitie ate aaku rrindiki le supatisho pee itumutumu aatubulu te sinyatisho.

²⁰Ore apa irara irrindiki loo ng'ok, nemeeta enabaikinore intae esupatisho.

²¹Naa kainyoo ilng'anayio linoto teina? Inoto imbaa naaitukurru taata intae amu keeya eiting'oki.

²²Kake eidipaki aatalaku intae entaa irrindiki le Nkai, niaatata ilng'anayio lenyena laa embolunoto te sinyatisho, neiting'oki ina enkishui oo ntarasi.

²³Amu ore olekoisiaayio loo ng'ok naa keeya; kake ore enkishorunoto e Nkai e pesho naa enkishui oo ntarasi tiatua Kristo Yesu Olaitoriani lang.