Read MAASAI REVISED PROTESTANT Iroma 8 Bible Online

Iroma 8 - MAASAI REVISED PROTESTANT bible

Iroma 8

¹Metii naa taata enkiguana te lelo ootii atua Kristo Yesu.

²Amu aatalakutua nanu nkitanapat e Nkiyang'et e nkishui natii atua Kristo Yesu aaitung'uaa nkitanapat oo ng'ok o keeya.

³Amu Enkai nataasa ina natalaikinote nkitanapat, to lbae le nchalan o sesen aataas. Eirriwua Enkai Oinoti lenye te mpukunoto o sesen loo ng'ok tiatua osesen,

⁴pee etumi aaitabai nena sipat naajo nkitanapat tiatua iyiook; ilemerubare mbaa o sesen kake kirubare Enkiyang'et.

⁵Amu ore lelo oopuo erubare osesen naa mbaa o sesen naaitore ltauja lenye, kake ore lelo oopuo erubare Enkiyang'et naa mbaa e Nkiyang'et naaitore ltauja lenye.

⁶Ore paa osesen oitore mbaa o ltau, neaku ina keeya, ore paa Enkiyang'et naitore oltau, neaku ina enkishui o eseriani.

⁷Amu ore oltau oitore osesen naa olmang'atinta te Nkai; amu meishoru meitoria nkitanapat e Nkai, nemeidim;

⁸naa ore lelo laa osesen oitore nemeidim aaitishipa Enkai.

⁹Kake mme osesen oitore intae, Enkiyang'et naitore intae, te nesipa nchere etamanya atua intae Enkiyang'et e Nkai. Ore pooki ng'ae ake lemeeta Enkiyang'et e Kristo neme olenye ilo.

¹⁰Kake ore ake pee etii Kristo atua intae, te neye ninye iseseni linyi te nkaraki ng'ok neishu enkiyanget inyi te nkaraki esupatisho.

¹¹Teneishu enkiyang'et e ilo oitopiwuo Yesu, ore ilo oitopiwuo Kristo Yesu too lootuata neisho sii lelo seseni linyi ooye enkishui teina kiyang'et enye namany atua intae.

¹²Ore te nkaraki ina, lalashera laainei, eikiaata esile, kake mme eno sesen, metaa osesen oitore iyiook kinchu,

¹³amu ore ake pee eaku osesen irubarere inchushu niyeye, kake ti niaariara intae te nkiyang'et inkiaasin o sesen metuata ninchushu.

¹⁴Amu ore lelo pooki laa Enkiyang'et e Nkai narikito, ninche inkera e Nkai.

¹⁵Amu mme enkiyang'et e rrindikisho eishooki intae entushukokinoto enkuretisho, kake eishooki intae enkiyang'et oo nkera inot. Ore te nikijo “Abba! Papa!”

¹⁶Enkiyang'et e Nkai kewan naishakenu te nebo enkiyang'et ang nchere kira nkera e Nkai,

¹⁷naa ti nikira nkera, nikira ilajung'ok, kira lajung'ok le Nkai te nebo Kristo, naa keisilisili iyiook te nebo ninye pee eyookini sii aaisho iyiook enkitoo te nebo ninye.

¹⁸Kayiolo nanu ajo ore nkisilisilot ena kata meitorisiokini ina kitoo nayookini aaboloki iyiook.

¹⁹Keanyita pooki toki naitayioki te yieunoto kitok metaboluni inkera e Nkai.

²⁰Amu etipikaki seuseu erruorroto, neme te nkaraki naa enkop nayieu, kake te nkaraki yieuna e Nkai to siligi,

²¹amu keyookini aalaku seuseu pooki aaitung'uaa rrindikisho enye e nkidaaroto, neng'amu elakunoto e nkitoo oo nkera e Nkai.

²²Amu kiyiolo aajo ore o tena kata, eigorito te mion seuseu pooki naitayioki to losilisili le mion o metabaiki ena olong.

²³Neme seuseu ake naishir, kake ore sii ninche iyiook, ooidipa aanoto enkishorunoto e Nkiyang'et naiturukuo te kulie naapuonu, nikinchirita sii iyiook tiatua ate kiaanyu meitaa Enkai iyiook inkera enyena, neitabaya elakunoto ang.

²⁴Amu tele siligi apa eitajewuoki eiyiook. Te naa eikidolita entoki nikisiligu, nemeitoki ilo siligi aata tipat. Keisiligu pasa oltung'ani entoki nadolita?

²⁵Kake ti nikisiligu entoki nemelioo, naa eikiaanyu te ng'iriata.

²⁶Nejia eiko Enkiyang'et pee elotu aretu iyiook te nchalan ang; amu mikiyiolo iyiook aajo kainyoo kiomonu nimikiyiolo enikijo ti nikiomonu, kake Enkiyang'et makewan naomonoki iyiook te mion nagut nemeinosunoyu.

²⁷Ore ilo laa ninye ojur iltauja neyiolo ninye enajo Enkiyang'et, amu Enkai nayieu neaku enkiyang'et nanyikaki ninye too mbaa oo ltung'ana lenyena.

²⁸Nikiyiolo aajo ore te pooki toki neasisho Enkai too mbaa supati te lelo oonyor ninye, te lelo oipotoki te risioroto e yieuna enye.

²⁹Amu etayiolo apake Enkai ilenyena negelu metotiutu anaa ilo Inoti lenye, pee eaku ilo Inoti olkikau loo lalashera kumok.

³⁰Ore lelo ooidipa ninye ategelu, neiteng'el; ore lelo ooiteng'ela ninye neipot, ore lelo ooipoto neikenaki esipata, ore lelo ooikenaka esipata neisho ake sii enkitoo.

³¹Kaa naa kijo tena? Amaa te netii Enkai enkalo ang, kalo oidim atigilunore iyiook?

³²Eitu eibooyo ninye ilo Inoti lenye kake eishorua ninye te nkaraki iyiook pooki. Amaa etaasa ina, kainyoo ae naitoki amitiki ninye eisho iyiook pooki toki pesho?

³³Ae ng'ae oitoki aitang'or ilgelunot le Nkai? Mme Enkai, amu ninye makewan naishoo ninche isipat.

³⁴Ae ng'ae naa odung'oki ninche enkiguana? Ae Kristo Yesu otua, oonyaaka apiu aing'uaa keeya, netii taata, enkaina e tatene e Nkai, nesipa nchere ninye oomonoki iyiook.

³⁵Kainyoo naidim atorishie iyiook enyorrata e Kristo? Keidim ingolikinot, anaa emion, anaa enkisilisiloto? Anaa olameyu, anaa tenikipuo mikinchopo, anaa batisho, anaa keeya, anaa olalem?

³⁶Ore anaa enajo Ilkigerot: “Ore te nkaraki iyie, earitai iyiook dama o kewarie matuata; kitotiutuo anaa noshi tare naapuoi aayieng.”

³⁷A'a, ore te kuna pooki kisula kimirisho te nkaraki ilo otonyorra iyiook.

³⁸Amu aitisipa nanu nchere mme keeya, neme enkishui, neme ilmalaika, neme engolon e naimin, neme ntokitin naatii, neme ntokitin naapuonu neme nkitoriat neme enguton, neme ae toki te seuseu pooki, naidim atorishie iyiook enyorrata e Nkai natii Kristo Yesu Olaitoriani lang.

³⁹Neme kulie kiyang'eta o loing'ang'e, aashu naatii olodo le nkop, neme hoo ae toki pooki natii enkop o loing'ang'e naidim atorishie iyiook enyorrata e Nkai natii Kristo Yesu Olaitoriani lang.