Read MAASAI REVISED PROTESTANT 1 Ilkorinto 10 Bible Online

1 Ilkorinto 10 - MAASAI REVISED PROTESTANT bible

1 Ilkorinto 10

¹Lalashera laainei o nkanashera aainei, keyieu niyiolouu nena baa naanoto iloo papa. Etoriko lelo pooki enapa atampoi, neima pooki ina Aiposha Nanyokie eserian,

²neibatisaki pooki teina atampoi o teina aiposha metaa ilasujak le Musa.

³Einosa pooki ina daa apa naishoo Enkai,

⁴netooko pooki ina are naishoo Enkai; amu etookishote te ilo soit oishoo Enkai metusuja ninche. Ore ilo soit naa Kristo kewan.

⁵Kake ore ake eyia eitu eshipakino Enkai ilkumok lenye neidapashaki impopoki enye ilo purkel.

⁶Netaa kuna pooki enkikoo te iyiook, pee miking'uar enkarruoisho anaa enataasa Isiraeli.

⁷Emiaaku intae iloomon nkitanyaanyukot anaa enaikuna kulikae lenye; anaa enajo Lkigerot, “Etotona Itung'ana aadaa neokisho neinyototo aaranyisho.”

⁸Mikirubare iyiook mbaa torrok e nkiborra oo nkonyek, anaa enaikuna ilkulikae lenye, ore te nkolong nabo neye nkalifuni tikitam ookuni.

⁹Nimikitem iyiook Olaitoriani, anaa enaikuna apa kulikae lenye, nemut ilasuriaa lelo.

¹⁰Eming'unyung'uny anaa enaikuna kulikae lenye, lelo apa ooidaikie Olmalaika Omutisho.

¹¹Eineputua ninche nena pooki pee eaku enkikoo, netisiraki pee eikoki iyiook aarishie, ilaa te nkata ang eitabayioki nkatitin.

¹²Neaku ore ilo ojo kenotoko enkitashoto neing'or kewan pee mebatata.

¹³Eitu einepu intae ae temata nemetiu anaa noshi ake naatum ilkulikae tung'ana. Keisiligayu Enkai, nemeisho ninye metetemi intae enalang ina nimindimidimi aairisha, kake ore ake entemata nalotu neisho ake intae enkoitoi nipaashieshie pee itumutumu aairisha.

¹⁴Ore te nkaraki ina, lchoreta laainei, entalam eseremare oo nkitanyaanyukot.

¹⁵Airorie intae anaa ltung'ana ooning'u mbaa; enguanare intae kuna najo.

¹⁶Amaa oshi kinchooyo enashe teina kikompe e mayianata, ai mme osarge le Kristo oshi ilo liking'ar? Naa amaa oshi kibel emukate, aimme osesen le Kristo ilo liking'ar?

¹⁷Ore amu nabo emukate, ore iyiook hoo nikira kumok nikira osesen obo; amu keng'amu ake oltung'ani embelati e ina mukate nabo.

¹⁸Eng'ura sii intae enkirukoto oo lkerreti loo Lyahudi: keitu eaku lelo oonya nena tokitin naapolosi ile nchula e ina Ai natopolosakita lelo asarri?

¹⁹Kaa doi ajoito? Katejo doi eji ore endaa natopolosakaki nena kitanyaanyukot naaitaae inkaitin netubula ninye aaku ae toki? Aashu ajo kaae toki ninye ina kitanyaanyukoto?

²⁰A'a, Kajoito ore lelo asarri oopolos lelo lemeyiolo Enkai iloiriruani epolosaki mme Enkai. Neaku, mayieu niatata enchula o loiriruani

²¹Nimindim iyie atooko ina kikompe o Laitoriani nintoki enoo loiriruani: nimindim ataa olong'ar emisa o Laitoriani ning'arie sii enoo loiriruani.

²²Aikiyieu sa iyiook nikintagor aapik Olaitoriani olom? Aiyiook oogol te ninye?

²³Ijojo, “Keishoruno ntokitin pooki,” ee, kake mme pooki toki naretisho. Nijojo, “Keishoruno ntokitin pooki,” kake mme pooki toki nashetisho.

²⁴Emincho eaku enaret kewan ake eing'oru oltung'ani, kake enchoo eing'oru oltung'ani enaret olikae.

²⁵Enosa pooki toki namiri teine nemirieki inkiri, niminkilikuanunu nena baa o ltoilo lo ltau;

²⁶ore enkop o ntokitin pooki naatii naa ino Laitoriani.

²⁷Ti nikintoomon iyie oleitu eiruk niyieu nilo, nosa nena pooki naatii dukuya iyie, niminkilikuanu nena naajo oltoilo lo ltau.

²⁸Kake ti nikijoki oltung'ani ake pooki “Olasar ele le nkaji oo ntaleng'o.” Minya te nkaraki ilo likitolikio o te nkaraki oltoilo lo ltau;

²⁹neme taa olo ltau lino makewan ajo, kake olo ltau le ilo tung'ani. Ijojo intae, “Oo paa ore elakunoto ai naa to ltoilo lo ltau le likae eiguanareki?”

³⁰Amaa te nang'arie likae endaa etii enashe, oo pee aaitokini aapik esulare te ntoki naishoorie enashe?

³¹Naawaliki ajoki, ti nidaa aashu ti niokisho aashu ti nias ai ake bae pooki, taasa nena pooki te nkaraki enkitoo e Nkai.

³²Nimiaaku iyie olkob too Lyahudi aashu to Lyunani aashu te sirit e Nkai,

³³anaa sii enatiu nanu oloitiship iltung'ana pooki te pooki oitoi, nemaing'oru dupoto ai makewan, kake ene pooki, pee eitajeuni.