Read MAASAI REVISED PROTESTANT 1 Ilkorinto 12 Bible Online

1 Ilkorinto 12 - MAASAI REVISED PROTESTANT bible

1 Ilkorinto 12

¹Ore too mbaa naaipirta nkishoorot e nkiyang'et, lalashera o nkanashera aainei, nayieu niyiolouu isipat.

²Iyiololo aajo, ore apa miyiololo Enkai, inkitanyaanyukot nemeiro erikokini intae, te na oitoi o ti ae.

³Ina pee aitayiolo intae nchere meetae hoo obo ooidim airoro te nkiyanget Enkai atejo, “Olaitoriani Yesu,” mme Enkiyang'et Sinyati naishoo metejo.

⁴Keetae mpukunot oo nkishoroot e nkiyang'et, kake ena kiyang'et nabo naishoru pooki;

⁵keetae enkisiaayiare oo mpukunot kumok, kake obo ake Olkitok oisiaai;

⁶neetae mpukunot kumok e ngolon e Nkai naasisho, kake ena Ai nabo naisiaaisho te nena kidimat pooki.

⁷Neishooki pooki tung'ani ewang'an e nkiyang'et naretie ilkulikae tung'ana pooki.

⁸Keetae oloishoo Enkai engolon nairorie mbaa e ng'eno te Nkiyang'et, neishori likae meiroro mbaa e nkarriyiano e ng'eno, anaa enaisho ake ina Kiyang'et,

⁹neishori likae enkirukoto, naa teina Kiyang'et nabo ake, neishori likae nkishoorot e mbaare, naa ina Kiyang'et ake ina,

¹⁰neishori likae engolon naasie mbaa naagol e nking'asia, neishori likae engolon nalikiorie lomon te naibon, neishori likae enkidimata nayiolounye atirisha iltauja, neishori likae enkidimata naasishore ilng'ejepa oopaasha, neishori likae enkidimata nawalunye nkutukie.

¹¹Ore kuna pooki naa esiaai e ina Kiyang'et nabo ake, naa ninye naoriki nerishaki iltung'ana aiko anaa enayieu ninye.

¹²Ore taa anaa enatiu osesen lo ltung'ani ara obo, neeta rubat kumok, ore nena rubat aa kumok naa osesen obo. Nejia sii etiu te Kristo;

¹³amu ti nikira apa Ilyahudi anaa kira ilgiriki, anaa ti nikira irrindiki aashu kira iltung'ana oolakuno, ore te nkibatisa teina Kiyang'et nabo, nikitaa pooki osesen obo neitookoki iyiook ina Kiyang'et nabo.

¹⁴Ore osesen lo ltung'ani mme erubata nabo kake oloo nkumok.

¹⁵Te nejo naaji enkeju, “Ore amu mara nanu enkaina, mara eno sesen,” nemeibelekenya aaku mme eno sesen te nkaraki ina.

¹⁶Naa te nejo enkiok, “Ore amu mara nanu enkong'u, mara nanu eno sesen,” nemeibelekenya aaku mme eno sesen te nkaraki ina.

¹⁷Amaa naaji te naa ke nkong'u osesen pooki, kaji eitoki atii enkiok? Naa amaa te neaku pooki enkiok, kainyoo naa eitokini aaing'ueishore?

¹⁸Ore enatiu, Enkai natipika irubat pooki, aa naabo, nepik ilo sesen anaa enayieu ninye.

¹⁹Amaa naaji te naa kerubata nabo pooki, kaji eitoki atii osesen?

²⁰Ore enatiu, keetae irubat kumok, kake obo osesen.

²¹Nemeidim enkong'u atiaki enkaina, “Maatayie nanu iyie tipat,” nemeidim sii ninye elukunya atiaki inkejek, “Maatayie nanu intae tipat.”

²²Aa, ore metii ina, ore noshi rubat o sesen naashal naa ninche naata tipat oleng;

²³nikiyanyit naleng nena rubat o sesen naaijo mme ne tipat; ore nena nemeing'urayu naa ninche kirrita oleng;

²⁴ore nena rubat sidain naaing'urayu nemeetayie tipat enkirrita. Kake eiruburuba Enkai osesen, neisho enkanyit sapuk nena rubat nemeeta,

²⁵pee mejing ake osesen eoro, kake pee etum ake erubata pooki airrita enkae rubata.

²⁶Ore pee eme erubata nabo, nemeyu rubat pooki te nebo ina; ore pee eisisi erubata nabo, neshipa nkulie rubat pooki te nebo ina.

²⁷Irara taata intae osesen le Kristo, nirara moobo irubat enyena.

²⁸Netipika Enkai atua ina sirit neiturukie lkipaareta, ile aare iloibonok le Nkai, liokuni laiteng'enak neitoki lelo ooas nkiasin e nking'asia, ilabaak, ilaretok, ilarikok o lelo ooiro too lng'ejepa oopaasha.

²⁹Ei ilkipaareta doi pooki? Ei loibonok le Nkai pooki? Ei laiteng'enak pooki? Keas pooki nkiasin e nking'asia?

³⁰Keeta pooki nkishoorot naaishiunye olorere? Keiro pooki too lng'ejepa oopaasha? Keyiolo pooki aatawalu ilng'ejepa?

³¹Kake entonyok eng'oru nena kishoorot naata tipat aaisul te pooki. Naa kaitodol intae enkoitoi nalus te pooki.