Read MAASAI REVISED PROTESTANT 1 Ilkorinto 14 Bible Online

1 Ilkorinto 14 - MAASAI REVISED PROTESTANT bible

1 Ilkorinto 14

¹Entuunokinoto enyorrata, kake entonyok eng'oru nkishoorot e nkiyang'et, neisul ina kishorunoto e likioroto o lkilikuai le Nkai.

²Ore ilo oiro to lng'ejep oje neme oltung'ani eirorie kake Enkai, amu meibung oltung'ani enajo; nkisudorot eiro aibonu.

³Kake ore ilo olimu olkilikuai le Nkai naa ltung'ana eirorie aliki mbaa naashetu, neisisaa, neilejilej.

⁴Ore ilo oiro te likae ng'ejep kewan eitubulu; ore ilo olimu olkilikuai le Nkai naa esirit eitubulu.

⁵Kayieu naaji nanu niroro pooki te lelo ng'ejepa, kake keisul ayieu oleng nilimumu olkilikuai le Nkai. Ore ololimu olkilikuai le Nkai ninye olkitok alang ilo oiro too lng'ejepa, aashu naa te neetae olowalu neretu esirit pooki metang'amu enkiti toki nashetu.

⁶Ore te nkaraki ina ilalashera o nkanashera, te nalotu naaji enitii nairo too lng'ejepa, kainyoo eret ina te intae aime enaikash te naa kairo irorei le mbolunoto aashu le ng'eno aashu le naibon aashu le nkiteng'enare ina kata airorie intae?

⁷Nejia sii etiu too ntokitin nemeishu anaa endule aashu enkawuo oo sinkolioitin. Te neaku ore eoshitoi, nemening'unoyu osinkolio ooshitoi, kaji eiko pee eyiolouni aajo kalo sinkolio ilo?

⁸Naa amaa te nemeibala enkorui e mowuo, aing'ae orretena alo olarrabal?

⁹Nejia naa etiu, te neitu ilimu ororei oibala to lng'ejep lino, kaji eiko pee ening'unoyu ina nilimu? Keaku enkijape ake irorie,

¹⁰kajo ake, keetae mpukunot kumok e nkorui te nkop, nemeetae hoo enemeeta ake enajo.

¹¹Neaku te nemayiolo enejo ina kutuk, naaku nanu oleeiking'a teina kutuk, neaku sii ninye olomoni te nanu.

¹²Nejia sii itiuu intae, ore amu kadol ajo iyieuu naleng niaatata inkitoduaarot e nkiyang'et, entonyok naa entejo maisulie nena naashetu esirit.

¹³Enchoo naa ilo oiro to lng'ejep oje, eomonu meishori enkidimata e walunoto.

¹⁴Amu te naomon to lng'ejep oje, enkiyang'et ai naomon, kake meeta enaitayu ndamunot aainei.

¹⁵Kaa naa aas? Kaomon ake te nkiyang'et ai kake naomon ake sii too ndamunot aainei, narany te nkiyang'et narany ake sii too ndamunot aainei.

¹⁶Amu ti ninchooyo enashe te nkiyang'et ino, kaji eiko likae oton teina tumo pee ejo “Eesai” teina kishooroto ino enashe, te nemeyiolo enijoito?

¹⁷Keidim ataa sidai alang ina kishooroto ino e nashe, kake eitu eret ina likae.

¹⁸Kashukoki Enkai enashe nchere kairo nanu too lng'ejepa alang intae pooki:

¹⁹kake ore tiatua entumo nayieu nairo irorei imiet loo ndamunot aainei, pee atum atuutai sii ninche lelo kulikae; alang te nairo irorei iip tomon te likae ng'ejep.

²⁰Ilalashera o nkanashera aainei emiaku nkera too ndamunot inyi. Ore too ntorrok entotiu ana nkera kutiti, kake ore too ndamunot inyi entimitunye.

²¹Etejo Lkigerot tiatua Nkitanapat: “Kairorie nanu ele orere too ltung'ana le kulie kutukie, too nkutukie oo ltung'ana leeiking'a, kake ore etiu nejia nemaaning ninche nanu.” Nejia ejo Olaitoriani.

²²Neaku ore ina kiroroto oo lng'ejepa mme olmonekie te lelo ooiruko kake te lelo leitu eiruk, kake ore elikioroto o rorei mme ene lelo leitu eiruk kake enoo looiruko.

²³Te neiturrurro entumo pooki te nebo neiro pooki ng'ae too lng'ejepa, nepuonu ltung'ana ake duoo leitu eiruk, eimejo lelo, “Oloirirua pae iatata?”

²⁴Kake te naa olkilikuai le Nkai elikioo pooki ng'ae nelotu oltung'ani ake duoo aashu ejing'u oleitu eiruk, ore embae pooki naning neputu metadamisho naleng.

²⁵Ore nkisudorot o ltau lenye neibalunyeki newang'u. Nebatata ina kata te nkomom enye neomon Enkai, neibalunye ajo, “Kesipa ketii Enkai te nebo intae.”

²⁶Aikijo aa naa, lalashera o nkanashera aainei? Te neaku nturrurrote, nebaiki neterretene likae eeta osinkolio anaa eeta enkiteng'enare aashu, embolunoto aashu e nkiroroto oo lng'ejepa aashu ewalunoto e nena, kake enchoo nena pooki eaku ine nchetunoto ake e ilo turrur.

²⁷Te neetae enkiroroto oo lng'ejepa, enchoo aare eiro aairukuruko anaa okuni nimintogiroo ine, naa enchoo eirukuruko, ninchosho oltung'ani obo ewalu, alimu enajo;

²⁸naa te nemeetae olowalu, ninchosho ilo oiro too lng'ejepa egira etiiki olturrur neirorie kewan neirorie Enkai.

²⁹Ore lelo ooata olkilikuai oing'uaa enetii Enkai, enchoo aare aashu okuni eiro, neineneng lelo kulikae irorei lenye;

³⁰naa te neaku ore eirorita obo neinepu likae otonita embolokinoto, neng'as ilo le dukuya agira.

³¹Itumutumu pooki erishata nilimunyenye olkilikuai oing'uaa Enkai, moobo, pee eyiolou pooki neitagoli.

³²Ore enkiyang'et e lelo ooata olkilikuai le Nkai ninche ooitore;

³³amu ore Enkai, mme Enkai e ng'uyan kake ene seriani anaa enatiu too sirito pooki oo sinyat.

³⁴Enchoo ng'oruo egira tiatua ntumoritin, amu meishoro meiroro. Ele kerreti esujita sirito pooki oo ltung'ana le Nkai. Enchoo ninche eigara olorere, amu nejia sii ninye ejo Olaitoriani.

³⁵Ore pee eeta enayieu neyiolou, enchoo eikilikuan ilewa lenye ti ang, amu embae e nkurruna te neiro eng'oruoi etiiki entumo.

³⁶Aainyoo! Ai te ntae etang'asua olkilikuai le Nkai anaa ai intae ake etabaikia?

³⁷Te neetae oltung'ani ojo keeta ninye olkilikuai le Nkai aashu ejo keeta nkishoorot e nkiyang'et, entiaaki ore kuna naigeroki intae, Olaitoriani oitanapishe.

³⁸Ore ake oloitaa ena parmetii enchoo sii ninye eaku parmetii.

³⁹Neaku ilalashera laainei, enosai olkilikuai le Nkai te nkisosion, naa emimit enkiroroto oo lng'ejepa,

⁴⁰kake enchoo ebarakini aas pooki toki too nkiririkinot.