Read MAASAI REVISED PROTESTANT 1 Ilkorinto 4 Bible Online

1 Ilkorinto 4 - MAASAI REVISED PROTESTANT bible

1 Ilkorinto 4

¹Enkenai iyiook entejo kira laisiaayiak le Kristo ooisiligaki aaitanap nkisudorot e Nkai.

²Naa lelo ooitanapaki etiorie metaa ilooisiligayu.

³Mme hoo toki te nanu paa intae likipuonunu aajur aashu aaiguanare aashu likae ake tung'ani. Emaiguanare doi ninye kewan.

⁴Nemayiolo hoo toki namen tiatua kewan, kake mme taa keaku maata nanu ai tiyoto. Olaitoriani laaiguanare nanu.

⁵Neaku emipuny intae aadung'oki likae enkiguana eng'or enkata o meeu Olaitoriani. Ninye olotu aitupuku nkisudorot e naimin meetu enewang, nebolu iyieunot oo ltauja loo ltung'ana. Teina kata kenya etum pooki tung'ani enkisisa naing'uaa Enkai.

⁶Ilalashera laainei o nkanashera, oloji Apolos o kewan ai aimakinye kuna baa peyie aretu intae te nkitanyaanyukoto. Entuutarie ate iyiook pee iyiolouu enoshi naji, “Ilkigerot turubare iyie.” Kayieu naaji ning'enunu pee miwuasasa aaku lo ltung'ani obo nimbayuyu olikae.

⁷Kainyoo doi nailepie intae? Kainyoo doi ena niaatata neme enitang'amutua? Amaa naa te naa kenitang'amutua ake, kainyoo pee isisisisi ate anaa leitu eng'amu toki?

⁸Indipa naa doi aaiputakinoto? Metaa indipakinote? Itaa intae karsisi! Nitaa intae ilaiguanak mikitii iyiook! Wooi te naa indipa aataa ilaitoriak, pee kitum sii iyiook aataa ilaitoriak te nebo intae.

⁹Kadol nanu ajo eitaa Enkai iyiook lkipaareta, ilooisiadu te pooki, iltung'ana laa keeya ake eanyita, amu kitaa iyiook entoki ake nashil enkop, neshil ilmalaika neshil iltung'ana.

¹⁰Iyiook ootaa Ilmoda te nkaraki Kristo, nitaa intae ng'eni tiatua Kristo! Kishal iyiook; nigoligolo intae! Neyanyiti ninche intae, nemenuni iyiook.

¹¹Ore o tena kata, kiaata esumash nikiaata enkure, nimikinchopo toki, nelimanitae iyiook, nimikiaata enemanya iyiook,

¹²nikintanaur ate kiaasisho too nkaik ang. Ore pee emori iyiook, nikimayianisho, ore pee eisilisili iyiook niking'iri.

¹³Ore pee epiki iyiook imbaa e sulare nikintoborruo. Kitotiwuo anaa suut e nkop; ore o tene kitaa olchala loo suut e pooki toki!

¹⁴Aigero Kuna neme kajo pee aitukurru intae, kake intae aikok anaa nkera aainei nanyor.

¹⁵Te nera iip katitin iip ilaramatak linyi tiatua Kristo, mme kumok iloo papaai linyi! Amu ore tiatua Kristo Yesu, nanu otaa papaai linyi atolikio intae lelo Omon Supati.

¹⁶Asai naa intae pee kiduaayaya nanu.

¹⁷Ina pee airriwaki intae Timoteo. Enkerai ai nanyor ninye, neisiligayu tiatua Olaitoriani. Ninye olotu aitadamu intae nkoitoi aainei tiatua Kristo anaa oshi enaiteng'enisho tiatua sirito pooki.

¹⁸Kejo kulikae eji malotu ine nitii naa ina pee eitarriki lkulikae;

¹⁹kake kalotu asieku te neyieu Olaitoriani; mme kalotu ayiolou nena naajo lelo oowuasa, kake ayiolou enetii engolon enye.

²⁰Ore enkitoria e Nkai mme embae oo rorei kake ene ngolon.

²¹Kaa taa iyieuu? Ei pee alotu enitii te ng'udi; ana ei te nyorrata e nkiyang'et e mborron?