Read MAASAI REVISED PROTESTANT 1 Ilkorinto 8 Bible Online

1 Ilkorinto 8 - MAASAI REVISED PROTESTANT bible

1 Ilkorinto 8

¹Oo taa endaa napolosakini nkitanyaanyukot naaitaae nkaitin, aikiyiolo doi enoshi nijojo, “Aikiata pooki eng'eno.” Kake ore ina “Ng'eno” inyi naa olwuasa epik iltung'ana, kake keshetu ninye enyorrata.

²Te nejo likae keeta ae nayiolo nemeeta ilo enayiolo anaa enaaishiaakino neyiolo;

³kake ore ake olonyor Enkai neyiolo Enkai ninye.

⁴Ore te nkinosata e ina daa napolosakini enkitanyaanyukoto naitaae enkai “Neme toki te nkop,” nikiyiolo aajo, “Meetae ae Ai neme nabo ake.”

⁵Naa te neetae nena naaji inkaitin, te keper aashu te nkop, amu kesipa keetae inkaitin kumok, o laitoriak kumok,

⁶kake ore te iyiook nabo ake Enkai, Papa, laa ninye eing'uaa ntokitin pooki, naa ninye kinchuyie iyiook naa obo Olaitoriani, Yesu Kristo laa ninye eimu ntokitin pooki naa ninye kinchuyie.

⁷Kake mme pooki ng'ae oata ena ng'eno. Ore amu etamoo kulikae tung'ana nena kitanyaanyukot naaitaae inkaitin, neton edol lelo endaa nanya etiu anaa enatopolosakaki ina kitanyaanyukoto; ore to ltau, lenye te nkaraki neton eshal neidurukie ina.

⁸Meisho iyiook endaa errepet te Nkai; nimikilau toki te neitu kinya endaa, nemeeta ae nikitum ti nikinya.

⁹Entodol naa ake ate meaku ina naishoro intae narror lelo ooshal.

¹⁰Te nedol intae oltung'ani oshal, intae taa lelo ng'eni, itonini aadaa te misa e nkaji nasayieki enkitanyaanyukoto, ijo meitagol ina oltau, teina shalan enye, nelo ninye anya endaa natopolosakaki nena kitanyaanyukot?

¹¹Neaku ina ng'eno inyi natara ilo tung'ani oshal, ilo alashe otua Kristo te nkaraki ninye.

¹²Ore pee intaasiasa ilalashera o nkanashera inyi iing'ok naaikununo nejia, iltauja lenye itipika ilbaa, niyiololo aajo keshal, Kristo intaasa nena ng'ok.

¹³Neaku te naa kendaa narror olalashe anaa enkanashe ai, nemaitoki ai kata anya nkiri, pee marror olalashe aashu enkanashe ai.