Read MAASAI REVISED PROTESTANT 2 Ilkorinto 1 Bible Online

2 Ilkorinto 1 - MAASAI REVISED PROTESTANT bible

2 Ilkorinto 1

¹Nanu Paulo, olkipaaret le Kristo Yes u te yieunoto e Nkai o lalashe lang Timoteo. Kingeroki esirit e Nkai natii Korinto o lelo sinyat ootii pooki wueji te Akaia.

²Enoto empiris o eseriani naing'uaa Enkai Papa o Laitoriani lang Yesu Kristo.

³Meisisi Enkai nara Papa lo Laitoriani lang Yesu, Papa lo lng'ur lemeish ntarasi enkilejilej enye.

⁴Ninye oilejilej iyiook tiatua isinaitin lang pooki pee kindim sii iyiook aailejileja ilkulikae ooata osina teina kilejilej nailejilejie iyiook Enkai.

⁵Ore anaa eniking'ar oleng emion e Kristo nejia sii kinko king'ar oleng enkilejilejata te nkaraki Kristo.

⁶Te neinosieki iyiook osina keji pee eilejileji intae neitajeuni; naa teneilejileji iyiook kejo Enkai pee eilejilej intae tinintasheshe to sina laaijo ele likitii.

⁷Ore osiligi lang te intae nemeigusugus, amu eikiyiolo aajo, ore pee ing'arierie iyiook osina, ning'arierie sii iyiook ina kilejilej.

⁸Amu mikiyieu nimiyiololo ilalashera lang eneba enyamali nikinoto te Asia. Eirotokoki iyiook inaalang engolon ang o metaba anaa neish iyiook osiligi le nkishui.

⁹O metaa aikitejo etudung'okoki iyiook enkiguana e keeya, naa keji apa pee mikingarakino ake ate kake nikingarakino Enkai, naitopiu ilootuata.

¹⁰Ninye otasarua iyiook te batisho naitureisho e keeya, naa keitoki ake aigil asaru iyiook. Ninye kitipika osiligi lang nchere keitoki ake aigil asaru iyiook.

¹¹Nenare niretirete iyiook te nkomono pee eisho ltung'ana kumok Enkai enashe te nkaraki iyiook te asata enye e mpiris naitaasa iyiook.

¹²Amu ena shakenisho ake oo ltoiloishi loo ltauja lang king'idare, nchere ore tiatua ltung'ana, neisul tiatua intae, kintoriokito iyiook aairo isipat naaisho iyiook Enkai, naa te mpiris e Nkai mme te nkarriyiano e ng'eno e tung'ani.

¹³Ore kulo rorei likingeroki intae naa ilindimidimi aaisuma nining'ung'u. Ore o taata naa inchot ake oo mbaa iyiololo te iyiook. Naisilig ajo iyiookiki aayiolou tukul aamitu.

¹⁴Ore teina olong o Laitoriani Yesu, niyiookiki ina kata aadol aajo iatata esipata niwuasarere te iyiook anaa enikiaata iyiook te intae.

¹⁵Te nkaraki apa naa kang'idare ena pee atejo kalotu abaiki intae. Kayieu apa naitaas intae kuna are sidain.

¹⁶Kayieu apa naimaa intae aloito Makedonia naitoki sii aimu intae ashukunye; nayieu sii apa nikiretoo alo Yudea.

¹⁷Amaa te kuna pooki, ijojo kanyaaka aing'ash? Ana ijojo kaiguane anaa oltung'ani le nkop kairiamaki ajo “Ee” najo sii “A'a?”

¹⁸Ore anaa enaisiligayu Enkai, mme ake ninye ororei lang te intae ole “Ee” o “A'a.”

¹⁹Ore ilo Inoti le Nkai Yesu Kristo, likitolikioitie iyiook tiatua intae o Silfanos o Timoteo o nanu, neme “A'a;” kake ore te ninye naa “Ee.”

²⁰Tiatua ninye etejo Enkai “Ee” too nkisiligat enyena pooki; naa ina paa te ninye kijo Eesai kisis Enkai.

²¹Enkai doi naitagol indung'ot pokira are, iyiook o intae tiatua Kristo. Enkai doi natubukoko iyiook eilata,

²²nepik iyiook olmishire ojo kira ilenyena, neisho iyiook Enkiyang'et tiatua ltauja lang anaa embae naiturumu kulie naapuonu.

²³Enkai aipot metaa olchakeni lai nchere intae atejo aduaaya pee eitu aigil alotu Korinto.

²⁴Mme doi nena baa nemeeta nchere pee eitu irukuruku kisikong'aki intae; eidipa pae atuunoyu enkirukoto inyi. Eikisiaaisho doi te nebo intae too mbaa e nchipai inyi maate.