Read MAASAI REVISED PROTESTANT 2 Ilkorinto 10 Bible Online

2 Ilkorinto 10 - MAASAI REVISED PROTESTANT bible

2 Ilkorinto 10

¹Nanu Paulo taata osai intae te nkaripo o te mborron e Kristo kewan, nanu oloshi obor enotote nkomomi kake neitieu intae enoshi kata mitii.

²Kaomon intae, te nalotu enitii pee meaku kaitodolu empijan natiu anaa enoshi naidim aitoduaa lelo oojo mbaa e nkop naadumu iyiook mataasisho.

³Ore hoo naa enkop kitii kinchu, mme mi.

⁴Ore imasaa nikiarare neme ake imasaa o larrabal; kake keeta nkunaang enkidimata e Enkai, enaa keparripar isempewueti.

⁵Eikiparripar iyiook enchankar oo monko; o pooki toki naitashe to lwuasa aibooyo eyiolounoto e Nkai; nikimbung aaen nkibirribirrat ake pooki metoning'o Kristo;

⁶naa ore pee eaku italaari aaishoru ate katukul, nikiterretenate pee kintame enkiaas pooki e ilo lemening'isho.

⁷Eng'ura nena baa naatii dukuya nkonyek inyi. Ketayiolo oltung'ani tukul ajo ole Kristo? Aisidai, kake enchoo ilo menyaaki aikenaa ena ae bae nchere: kira sii iyiook ile Kristo anaa pee era ninye.

⁸Ore te naa kanya naaji kutuk oleng awuasare enkidimata ai, naa Olaitoriani laaisho pee ashetunyie intae, neme pee aar intae, nemakurru sii aasishore ina kidimata.

⁹Emijo ake eji intae atem ajo aiture too mpala.

¹⁰Amu ejo ninche, “Keiroishi mpala e Paulo negol, kake te ning'or ninye, mijo hoo toki naa ore te neiro neme hoo nyoo ninye.”

¹¹Enchoo olojo nejia eyiolou nchere ore ina nitoduaa too mpala aainei alakuaniki intae, keyooki aasa atabawua ine nitii.

¹²Mme naaji emikiintieu iyiook aaitorisioki aashu kintanyaanyukie ate likae le lelo ooipang'u taata eisis ate, kake ore iltung'ana laa ate etemie ilkulikae, naa nkiasin enye eitorisioki ate, neidang'a oleng.

¹³Kake mikiwuasa iyiook aaitulus inaairirikino iyiook amu eidipa Enkai makewan aishoru nena kiririkinot, nebaiki sii intae.

¹⁴Iyiook ooiterutua aapuonu enitii kiyaki intae lelo Omon Supati le Kristo eton eitu hoo ebau likae, metaa ti nikiwuasare intae neitu taata kintogiroo nkiririkinot ang.

¹⁵Neme iyiook oopuo aagiroo nena kiririkinot kiwuasare enaa kulikae ootaasa kake kisilig nchere ore nkiririkinot ang naa pee eponari enkirukoto inyi, neponari murruna ang tiatua intae.

¹⁶Nikitumoki ina kata aatolikioi kulo Omon Supati too nkuapi naatii teidia alo intae, nemeitokini aata enalejishoi aajo kitawuasare iyiook esiaai naa kulikae ootaasa te wueji enye.

¹⁷“Te neyieu oltung'ani newuasa nchoo eaku Olaitoriani ewuasare.”

¹⁸Errepet o Laitoriani ake naata tipat, ene pesho errepet o ltung'ani makewan.