Read MAASAI REVISED PROTESTANT 2 Ilkorinto 3 Bible Online

2 Ilkorinto 3 - MAASAI REVISED PROTESTANT bible

2 Ilkorinto 3

¹Ketaa ate kiingil aaiteru aaisis? Eikiaatayie iyiook tipat anaa enaatayie kulikae, tipat impala naarrepakinyieki iyiook intae aashu nirrepiepie intae iyiook?

²Intae maate empalai e rrepet ang, naigero too ltauja linyi pee eyiolouni neisum ltung'ana pooki.

³Keibala nchere irara intae empalai naing'uaa Kristo, naa iyiook ooitarasutua neme olng'eriantus eigerore kake Enkiyang'et e Nkai naishu, neme too soito eigero kake too ltauja loo ltung'ana.

⁴Te Kristo kidup iyiook aatejo nejia tialo Enkai.

⁵Ore tiatua ate nimikiaata toki. Nimikijo atua iyiook maate eing'uaa ae toki. Enkai eing'uaa enkidimata ang,

⁶naa ninye oishoo iyiook inaaidip nkolati ang pooki, ina kata pee eitaa iyiook ilaisiaayiak lo sotua ng'ejuk neme too nkitanapat ake naasira kake te nkiyang'et; amu keeya eyau nena kitanapat naasira, kake keyau Enkiyang'et enkishui.

⁷Ore enkishorunoto e nena kitanapat, naaigeroki too sirat lo soit, naa keeya eiting'oko. Kake ore ake eyia neewuo te nkitoo e nking'asia o metaa meitieu Isiraeli aaing'ura enkomom e Musa te nkaraki ewang'an enye, hoo naa enaishari apake.

⁸Kebaa elusoo naa enkitoo nalotu te nkishorunoto e Nkiyang'et?

⁹Naa amaa te neiriamunore enkitoo naba nejia enkishorunoto oo nkitanapat naayau endung'okinoto e nkiguana, kebaa naa elusoo enkitoo e nkishorunoto e ina Kiyang'et naitaa iyiook ilooata enkitoo,

¹⁰Metaa, ore eina naata apa enkitoo, neewuo aaku meeta enkitoo tukul, te nkaraki ina kitoo nalus teina.

¹¹Amu te neeta apa ina naishunye enkitoo enye, kebaa naa elusoo oleng enkitoo e ina nabik intarasi?

¹²Ore te nkaraki nikiata ele siligi lang, eikiro mikiata olng'ash.

¹³Mikitiu anaa Musa, oimulumul apa enkomom pee meduaaya Isiraeli eishari ina wang'an.

¹⁴Eitagoloki apa lukuny enye; amu ore o taata, eton ake eitu eiwuang'ieki ina kimulumulata te neisumi Lkigerot lo sotua musana. Tiatua Kristo ake eiwuang'ieki.

¹⁵Ee, ore o taata, te neisumi mbukui e Musa, netiu anaa keimulumula lukuny e lelo ooinining;

¹⁶Ena ejo ilkigerot tialo Musa: “Ore ake pee eibelekenyakino oltung'ani Olaitoriani neiwuang'ieki ina kimulumulata.”

¹⁷Ore Olaitoriani naa ninye Enkiyang'et, ore pooki wueji netii Enkiyang'et o Laitoriani, netii elakunoto.

¹⁸Ore iyiook pooki, nikitaa ilemeimulamula inkomomi, nikiwariwaru anaa kiok[1] teina kishiaa o Laitoriani, eibelekenyitai iyiook matotiu anaa ninye eponari ake ina kitoo. Enkias o Laitoriani ena, naa Enkiyang'et ninye.