Read MAASAI REVISED PROTESTANT 2 Ilkorinto 4 Bible Online

2 Ilkorinto 4 - MAASAI REVISED PROTESTANT bible

2 Ilkorinto 4

¹Neaku, ore anaa ina naisho iyiook Enkai ena kisiaaiyiare to lng'ur lenye, mikidukenya[2] iyiook.

²Kitejo mikiyieu inkiaasin pooki e nkurruna o nemeeta enkanyit; nikinchu mikiaata ilosekin torrok. Nimikikordil ororei le Nkai kake esipata kiyau enewang pee kirrep ate to ltoilo lo ltau le pooki ng'ae, anaa loodolita Enkai.

³Amu te naa keimulumularo Lomon lang Supati, naa te lelo ake oopuo enkiminata eimulumularo.

⁴Ore enkai ena kop naa ninye naitamodoo nkonyek e kulo lemeiruk, pee medol ewang'an oo Lomon Supati le nkitoo e Kristo, laa ninye nyaanyukie e Nkai.

⁵Mme ate kilikioo iyiook; Kristo Yesu kilikioo aajo Olaitoriani, nikira iyiook isinkan linyi, te nkaraki Yesu.

⁶Amu ina Ai natejo, “Inchoo metawang'a ewang'an te naimin,” ninye natawang'a tiatua iltauja lang, ayaki iyiook ewang'an e yiolounoto e nkitoo e Nkai te nkomom e Kristo.

⁷Kake aikiaata iyiook ele shumati tiatua imasaa oo nkulupuok pee eliooyu nchere ore ina golon magilani naa Enkai eing'uaa, mme atua iyiook maate.

⁸Eironyitai iyiook te pooki oitoi, kake eitu epurdi iyiook, neimagitae iyiook kake eitu kipalari; nenang'ieki iyiook enkop, nebatati iyiook kake eitu sii emuti,

⁹neinosieki iyiook osina kake eitu sii eiturrarri iyiook.

¹⁰Kinapita anaa ake too seseni lang keeya e Yesu, pee eitoduaari enkishui e Yesu tiatua iseseni lang.

¹¹Amu ore iyiook, hoo nikinchu keishoori ake iyiook pooki kata aaisho keeya te nkaraki Yesu, peyie eitoduaari sii enkishui e Yesu te kulo seseni lang ooye kenya ake.

¹²Neaku keasisho ake keeya tiatua iyiook, kake enkishui naasisho tiatua intae.

¹³Kake kiaata enkirukoto anaa enajo Ilkigerot inchere, “Enkirukoto apa aata, pee airoro.” Ina kiyang'et ake e nkirukoto kiaata sii iyiook, naa ina sii iyiook pee kiro;

¹⁴amu aikiyiolo aajo ore ilo oitopiwuo Olaitoriani Yesu keitopiu sii ninche yiook te nebo Yesu neyau iyiook te nebo intae maetu enetii ninye.

¹⁵Naa te nkaraki intae pee etiu kuna pooki. Paa ore anaa enaponari empiris e Nkai too ltung'ana kumok o kulikae ake, neponaa enkishooroto e nashe te nkitoo e Nkai.

¹⁶Te nkaraki e na pee mikidukenya. Ore hoo naa kemusanu ake ele tung'ani li oriong amuta, kake ore ilo tung'ani lang li atua neitang'ejuki nkolong'i pooki.

¹⁷Ole nkiti kata ake osina lang, kake eyaki iyiook enkitoo kitok oo ntarasi nemeetae ae toki natemakini,

¹⁸amu mme kuna naalioo king'orita kake nena nemelioo. Ore kuna naalioo naa ine nkiti kata; ore nena nemelioo naa inoo ntarasi.