Read MAASAI REVISED PROTESTANT 2 Ilkorinto 5 Bible Online

2 Ilkorinto 5 - MAASAI REVISED PROTESTANT bible

2 Ilkorinto 5

¹Amu aikiyiolo aajo te neidaikieki ele ng'obor te nkop likimanya nikiaata emanyisho naing'uaa Enkai, enkaji neme too nkaik eitobiraki, nabikoo te keper ntarasi.

²Ore doi kitii ele ng'obor eikiinchir kiyieu erripoto e ina ang e keper,

³paa ore eitoipito iyiook ina nemeinepuni iyiook mikinchopo.

⁴Amu ore kitii ele ng'obor, nikinchirita tele ola lang. Mikiyieu nikinturraa osesen le nkop, kake kiyieu nikitum erripoto e ilo ng'ejuk, paa ore ilo oye neijori te nkishui.

⁵Ore ilo oitobiraka iyiook ena toki naa Enkai, laa ninye oishoo iyiook Enkiyang'et anaa enkitisipata.

⁶Ore te nkaraki ina eikintieusho iyiook oshi ake, amu aikiyiolo aajo ore eton kitii ang tele sesen, nikilamita Olaitoriani.

⁷Enkirukoto kipuoyie, neme enduaata.

⁸Eikintieusho iyiook, naa aikiyieu naaji naa eikipuo aing'uaa ele sesen pee kitii ang te nebo Olaitoriani.

⁹Metaa ti nikitii ena ang, aashu ti nikitii idia, Enkai kiyieu nikintiship oleng.

¹⁰Amu eikintashe ake pooki te dukuya olorika le Kristo le nkiguana, neng'amu pooki ng'ae inaairirikino nena naataasa to sesen aa supati aashu aa torrok.

¹¹Ore naa, aikiyiolo euriata o Laitoriani, nikiyietu iltung'ana, keyiolo Enkai iyiook tukul enikinkununo, naisilig ajo iyiololo sii intae enikinkununo.

¹²Mme taa ate kintoki aaisisaki intae, intae doi kincho erishata entawuasare iyiook, nitumutumu eniwalikiki lelo oowuasare enkitoo o ltung'ani, neme enatiu oltau lenye.

¹³Te naa koloirirua kiaata iyiook naa te nkaraki Enkai naa tenelulung'a iyiook ilukuny naa te nkaraki intae.

¹⁴Amu enyorrata e Kristo naitore iyiook. Ena bae kinting'okito iyiook nchere: etua ilo obo te nkaraki pooki ng'ae; ore te nkaraki ina etuata pooki.

¹⁵Etua ninye te nkaraki pooki, paa ore lelo ooishu nemeishu te nkaraki ate ake kake te nkaraki ilo otua nenyaakaki aaitopiu te nkaraki ninche.

¹⁶Ore naa ebaiki ena kata neito dukuya, nimikishilaa iyiook oltung'ani, te mpukunoto e tung'anisho, hoo nikitishilaitie apa Kristo te mpukunoto e tung'anisho, meekure iyiook kishilaa ninye aaiko nejia,

¹⁷neaku te netii oltung'ani atua Kristo, netaa enkitayunoto ng'ejuk, etulusoyie enapa musana, nelotu eng'ejuk.

¹⁸Enkai eing'uaa nena pooki, naa ninye oitoning'o iyiook o kewan te Kristo neisho iyiook esiaai maitoning'o ilkulikae,

¹⁹aa taa, Enkai apa tiatua Kristo naitoning'o enkop o kewan enye. Meshum ninye nemeikenaki iltung'ana nkitadiaat enye, kake eisiliga iyiook aisho olkilikuai oning'oreki ninye.

²⁰Neaku kira ilbalusuni le Kristo, Enkai makewan, nairriwua iyiook matasai intae. Kitasayia intae te Kristo entoning'ore Enkai.

²¹Meeta apa Kristo ing'ok. Kake eitaa Enkai ninye eng'oki te rishata ang iyiook, paa te ninye king'ar esupatisho e Nkai.