Read MAASAI REVISED PROTESTANT 2 Ilkorinto 6 Bible Online

2 Ilkorinto 6 - MAASAI REVISED PROTESTANT bible

2 Ilkorinto 6

¹Ore kira ilaisiaayiak te nebo o Nkai, kisai intae eming'amaa empiris e Nkai pesho;

²amu ejo ninye, “Ore te nkata namunyak aatoning'o nanu iyie; ore te nkolong e njeunoto naatareto nanu iyie.” Ng'ura, Taata ina kata namunyak; taata ina olong e njeunoto.

³Mikiaata iyiook olkob likipikaki hoo likae tung'ani, pee metumi ake olopik esiaai ang entiyoto.

⁴Kira ilaisiaayiak le Nkai ooitobiraa ate to mbaa pooki etiu enatiu: niking'iri tiatua enkinyala, too ngolikinot o too nkirrikinot,

⁵o too ooshot o too o larrabali tiatua olorere, too nkiaasin naagol, nikitoni o mekenyu, nikiaata esumash.

⁶Ore mikiaata ntiyot, naa eikiaata eyiolounoto, o eng'iriata o lng'ur; te Nkiyang'et Sinyati, o te nyorrata.

⁷Kilikioo esipata te ngolon e Nkai; too masaa e supatisho te tatene o te kedianye,

⁸eyanyiti iyiook o meyanyiti; einorri iyiook o meinorri. Keitaai iyiook ilalejak, kake kira asipak;

⁹netiu anaa aimeyioloi iyiook neyioloi sii oleng; kiye, nikitiu anaa looena, naa eikinchu iyiook, kake eitu eari iyiook matuata;

¹⁰neinyalitai iyiook, niking'ida anaa ake; kira aisinak, kake kintaa iyiook ilkumok karsisi; kitiu anaa ilemeeta toki hoo nikiaata pooki toki.

¹¹Lo Korinto, eikirorie intae aabaraki, newang iltauja lang naleng;

¹²mikijo maibooi intae, intae ooning nimbooyoyo ate.

¹³Entawang'a sii taata ltauja linyi. Airorie intae anaa olpayian oirorie inkera enyena.

¹⁴Emishulare aaku nabo o lelo lemeiruk. Ai ti aji eshula supati o ntorrok? Kaa shula eeta ewang'an o enaimin?

¹⁵Kening'o aekata Kristo o Belial? Kainyoo eng'ar oloiruko o leitu eiruk?

¹⁶Kainyoo eng'arie enkaji e Nkai enoo nkitanyaanyukot naaitaai inkaitin? Amu kira iyiook enkaji e Nkai naishu. Anaa enatejo Enkai, “Kamany atua ninche nairiamariyie ninche; naaku Enkai enye, neaku ninche iltung'ana laainei.

¹⁷Ore te nkaraki ina, entupuku tiatua ninche, entoorunye entung'uai ninche, Olaitoriani ojo. Emiseyie entoki naiduruk, naa kang'amu nanu intae,

¹⁸naaku nanu Papa linyi niaakuku intae ilayiok o ntoyie aainei, Olaitoriani Magilani ojo.”