Read MAASAI REVISED PROTESTANT Ilgalatia 2 Bible Online

Ilgalatia 2 - MAASAI REVISED PROTESTANT bible

Ilgalatia 2

¹Ore etulusoitie Ilarin tomon oong'uan nanyaaka alo Yerusalem kiboita o Barnaba, narikito sii Tito.

²Ore pee ashomo ina kata, Enkai naataboloko mashomo. Anotore te nkilepata, lelo apa oitaaki larikok naibalakinye ninche kulo Omon Supati lalikioo nanu tiatua Loreren; mayieu nanu neaku esiaai ai nataasa apa o ena naasita taata ene pesho.

³Kake ore ninye Tito laboitare teine neitu earakini metumurati, hoo naa Olyunani ninye.

⁴Anaata doi ninye eitu eimakini ina bae te neme keiseleejakinote atua iyiook ltung'ana ooitaakuno ilalashera epuonu aajur elakunoto nikiaata iyiook tiatua Kristo Yesu. Kejo apa pee eitaa iyiook irrindiki,

⁵kake eitu hoo king'as aaisho enkiti rishata. Esipata apa e kulo Omon Supati kiyieu neserian tiatua intae.

⁶Ore lelo apa ooji eikituaak neme hoo toki ina te nanu etiu o metiu amu meeta ninye Enkai olkep, netalaita hoo toki naanyaakita aajo matoponiki.

⁷Ore hoo enatii, ketoduaa aajo aaisiligaki too Lomon Supati mayaki Ilmemurata anaa enaisiligaki Petero meyaki Iloomurata.

⁸Amu Enkai naidimie Petero metaa olkipaaret too Loomurata naaidimie sii nanu mataa olkipaaret too Loreren lememurata.

⁹Neaku Yakobo o Kefa o Yohana, lelo ooitaae ng'apeta e ina sirit ootoduaa kirotetisho naaishoo Enkai nanu neng'amaa Barnaba o nanu pee eitodolu aajo king'ar ena kisiayiare. Neaku kipuo iyiook Iloreren nepuo ninche enetii Iloomurata.

¹⁰Ena bae nabo ake eitanapa iyiook nchere pee kidamu laisinak naa ina bae apake airowuare pee aas.

¹¹Kake ore pee elotu Petero Antiok naitasheiki ashirraki maing'urata, amu kelioo apa ajo eitarruoyie.

¹²Etang'asa aaku kedaa te nebo Loreren, kake ore pee epuonu ltung'ana ooing'uaa enetii Yakobo neitoki aaku kekepari, amu eturia lelo ooyieu nemurati Loreren.

¹³Ore lelo kulikae Yahudi ooiriamunore nesuj sii ninche ilo kuaak le sunkuroisho, o meteyietakini sii ninye Barnaba ina sunkuroisho.

¹⁴Kake ore pee adol nanu ajo meiriamari olkuaak lenye o esipata e kulo Omon Supati, najoki Petero te dukuya ninche pooki, “Ira iyie Olyahudi inoti, naa nele iyie olotie olkuaak loo Loreren, nimitiu anaa Olyahudi. Aainyoo naa pee ijo aaraki Loreren metotiutu anaa Lyahudi?”

¹⁵Eikira doi iyiook iinot loo Lyahudi mikira, “Loreren aasak loo ng'ok.”

¹⁶Kake kiyiolo ake iyiook aajo mme te nkitabaroto oo Nkitanapat meitoki Enkai aatakinore oltung'ani, kake enkirukoto eimu ina tiatua Yesu Kristo. Naa ore iyiook maate te nkaraki enkirukoto tiatua Kristo Yesu nemeekure eetakinore iyiook Enkai neme nkitanapat kintabaitie. Anaa enajo Lkigerot, “Meetae hoo obo laa enkitabaroto oo Nkitanapat eimua pee meekure eetakinore Enkai ninye.”

¹⁷Kake amaa te niking'oru osotua o Nkai te Yesu Kristo, neton ake eji iyiook ilaasak loo ng'ok anaa loreren, keaku doi olaasani loo ng'ok sii ninye Kristo? Mme neijia pae!.

¹⁸Te neaku ilo rrekie loo Nkitanapat laturoyie aitoki aitasheyie, neitoduaaya naa ina nchere kesipa kara olotigila nkitanapat.

¹⁹Amu ore te nanu, nena Kitanapat ate naaiting'ie enkishui ai naitore nena Kitanapat. Ore tialo nena Kitanapat, atua nanu peyie atum ataa kaishu te nkaraki Enkai. Etashoki Kristo naatashoki nanu te nebo ninye.

²⁰Aatashoki nanu tenebo Kristo, meekure aa nanu oishu, kake etaa Kristo oishu tiatua nanu. Ore enkishui naishu nanu taata to sesen, naishu te nkirukoto natii atua enkerai e Nkai, Ilo laatonyorra nanu neishoru kewan te nkaraki nanu.

²¹Nemaany nanu empiris e Nkai. Te neaku te nkitabaroto oo nkitanapat eikenakini oltung'ani esipata, nemeitoki naa keeya e Kristo aata tipat.