Read MAASAI REVISED PROTESTANT Ile Efeso 1 Bible Online

Ile Efeso 1 - MAASAI REVISED PROTESTANT bible

Ile Efeso 1

¹Paulo, olkipaaret le Kristo Yesu te yieunoto e Nkai, esiraki lelo sinyat otii Efeso ooisiligayu tiatua Kristo Yesu.

²Enoto empiris o eseriani naing'uaa Enkai Papa lang o Laitoriani lang Yesu Kristo.

³Meisisi Enkai Papa lo Laitoriani lang Yesu Kristo, olaa ninye otamayiana iyiook tiatua Kristo too mayianat pooki e nkiyang'et naaing'uaa iwuejitin e keper.

⁴Ore eton eitu eitayuni enkop netegelua Enkai iyiook tiatua Kristo mataa sinyat nimikiaata entibili te ninye.

⁵Etegelua apa ninye iyiook te nyorrata mataa nkera enyena tiatua Yesu Kristo, te risioroto enkipirta enye makewan. Ninye otonyorra iyiook, negelaki iyiook kewan neel iyiook mataa nkera enyena kiimu Kristo Yesu. Neijia apa eikununo enyorrata e yieunoto enye.

⁶Neikuna ninye neijia pee kisipu iyiook nikiyiolou eneba enkishorunoto enye naikishiaan naishoo ninye iyiook pesho tiatua ilo Inoti lenye onyor.

⁷Tiatua ninye kiaata iyiook enkordunoto te nkaraki osarge lenye, aa empalakinoto oo ntorrok ang, te risioroto e mpiris enye sapuk

⁸natoponikia ninye iyiook,

⁹te ng'eno o te yiolounoto enye pooki te risioroto e mbarakinoto enye tiatua Kristo.

¹⁰Te nebau enkata nanarikino, ore te mbarakinoto enye naa keyooki aiturrur pooki toki naitayioki metaa nabo tiatua Kristo, ntokitin naatii keper o naatii enkop.

¹¹Keasi ntokitin pooki te risioroto e ina nayieu Enkai, ilo oitabaya intokitin pooki te risioroto e nkiguana enye.

¹²Ore iyiook ilooitera aairuk Kristo netegeluaki iyiook nesirakini enkitoo enye.

¹³Tiatua ninye, intae ilootoning'o ilo rorei le sipata, lelo omon supati le njeunoto inyi, iruko ninye, nemishiri intae teina Kiyang'et Sinyati e nkisiligata enye,

¹⁴naa ninye enkitisipata nauno e njung'ore ang, o metaba anaa niking'amu ina, te nkisisa o enkitoo enye.

¹⁵Ore te nkaraki ena bae, ebaiki apa pee aning enkirukoto inyi tiatua Olaitoriani Yesu o enyorrata ninyorrinyorro lelo sinyat,

¹⁶eitu apal maishooyo enashe te intae, nadamu intae te nkomono ai,

¹⁷pee eisho intae Enkai o Laitoriani lang Yesu Kristo, iloo papa le nkitoo, enkiyang'et nagut e ng'eno o ene mbolokinoto, entayiolo ninye.

¹⁸Kaomonoki ntae pee eitawang'i inkonyek oo ltauja linyi pee itumutumu aatayiolo ilo siligi oipotokoki intae,

¹⁹niyiolouu aajo kebaa ina golon enye nemetemayu naa ninye naasisho tiatua iyiook iloiruko, te risioroto easata enkidimata enye kitok,

²⁰enapa nataasishore tiatua Kristo pee eitopiu aitung'uaa keeya neisho metotona te nkaina enye e tatene too wuejitin e keper.

²¹Teine eitore tukul pooki ooitoreisho o nkidimat pooki o engolon e nkitoria, neitoreisho oleng te shumata pooki arna naipoti neme kuna ake e na kata kake o ne idia nalotu.

²²Netipika Enkai ntokitin pooki inkejek enyena nepik ninye metaa elukunya oo ntokitin pooki te nkaraki esirit,

²³nara osesen lenye, elulung'ata e ilo oitululung pooki toki tiatua pooki toki.