Read MAASAI REVISED PROTESTANT Ile Efeso 3 Bible Online

Ile Efeso 3 - MAASAI REVISED PROTESTANT bible

Ile Efeso 3

¹Ore te nkaraki ena bae, ore nanu Paulo, oloena le Kristo Yesu te rishata inyi intae Iloreren

²amu kajo sii ake itoning'o enkitanapa e mpiris e Nkai naaishooki te nkaraki intae

³o eneikuna pee aaboloki nkisudorot e yieunoto enye, anaa enaidipa aigeroki intae too ndorropu.

⁴Ore pee isumusumu ena niyiolouu aajo katabaraka ayiolou embae e Kristo naisudoro,

⁵eneitu apa elikini nkera oo ltung'ana te kulikae porori anaa ena taata naibalakinyeki ilkipaareta lenyena sinyat o loibonok le Nkai teina Kiyang'et.

⁶Naa ena naishoo Iloreren metang'arieki enjung'ore neaku irubat o sesen obo, le ncholiek e ina kisiligata tiatua Kristo Yesu eimu lelo Omon Supati.

⁷Te kulo Omon Supati aaitaaki nanu olaisiaayiani te risioroto e nkishorunoto e mpiris e Nkai naaishoo nanu te ngolon enye.

⁸Ore nanu hoo nara oloti aisul too sinyat pooki, nanu eishooki ena piris, matoliki Iloreren lelo Omon Supati le nkarsisisho nemejurroyu e Kristo,

⁹naaishooki maitoduaa ltung'ana pooki eneikunari enkitabaroto eina kishorunoto naisudoyioki apa too lporori tiatua Enkai naitayio pooki toki;

¹⁰paa ore to rrekie le sirit neboluni taata eng'eno enye oo mpukunot kumok metayiolo laitoriak enkitoo pooki too wuejitin e keper.

¹¹Ore ena nerubare enkiguana e Nkai oo ntarasi naitabayie ninye tiatua Kristo Yesu Olaitoriani lang,

¹²laa te ninye kiaata empijan o enkitieunoto nikinyikakinye Enkai to rrekie le nkirukoto ang tiatua ninye.

¹³Neaku ajoki intae emishalu to sina laainosieki te nkaraki intae, amu ninye enkisisa inyi.

¹⁴Te nkaraki ena pee agilaki kung ilo Papa,

¹⁵laa ninye eipotieki olmarei ake pooki te keper o te nkop,

¹⁶paa te risioroto e nkarsisisho e nkitoo enye eisho meitagoli intae te ngolon naimu Enkiyang'et enye te ilo tung'ani li atua,

¹⁷nemany sii Yesu atua iltauja linyi eimu enkirukoto; paa ore intae, inoto ntona nitonini te nyorrata,

¹⁸nitumutumu engolon niyiolounyenye te nebo o isinyat pooki eneba elalai o enkadori o elakuani e shumata o enguton,

¹⁹niyiolouu enyorrata e Kristo nalusoo te ng'eno pooki, nimitunyenye aaboreyu te nkiputakinoto e Nkai.

²⁰Ore taata ilo laa te ngolon naisiaaisho tiatua iyiook eidim ninye ataasa neitulusoo oleng alang nena pooki nikinkilikuanu aashu kidamu,

²¹metaa enenye enkitoo tiatua esirit o tiatua Yesu too lporori pooki intarasi o ntarasi. Eesai.